Ekistos 2 - Chuukese Bible

Moses a uputiu 2.1-10

¹ Lon ena fansoun, eman mwän seni ewe ainangen Lefi a pwülüeni eman fefin seni ewe ainangen Lefi.

² Ewe fefin a pwopwo o nöüni eman ät. Nge lupwen a küna äteöchün nöün we, a aopala lon ükükün ülüngat maram.

³ Nge lupwen esap chüen tongeni aopala, a föw eu pasikit seni wowo o pwiliongei ngeni mastik me apach. Iwe, a akonala ewe semirit lon o uwala lein wowoon aropen ewe chanpupu Nil.

⁴ Iwe, fefinen ewe ät a ütä ekis toau pwe epwe küna met epwe fis ngeni.

⁵ Mürin, nöün Farao fefin a etiu ren ewe chanpupu pwe epwe tütü lon, nge nöün kewe chon angang fefin ra fetal ünükün ewe chanpupu. Iwe, neminewe a küna ewe pasikit lein ekewe wowo o akünöü ngeni eman nöün chon angang pwe epwe uwato ren.

⁶ Lupwen neminewe a suki ewe pasikit, a küna eman ät, nge a kechü. Iwe, a tongei o apasa, “Iei i eman lein ekewe semiritin Ipru.”

⁷ Mürin, fefinan we a kapas ngeni nöün Farao we fefin, “Ifa usun, ka mochen üpwe feila o körato eman fin Ipru pwe epwe oupwu ngonuk ewe semirit?”

⁸ Iwe, nöün Farao we fefin a pälüeni, “Ewer, kopwe feila.” Iei mine ewe nengin a feila o kökköri inen ewe semirit.

⁹ Iwe, nöün Farao we fefin a üreni inen ewe semirit. “Kopwe eki ei semirit pwe kopwe oupwu ngeniei, nge ngang üpwe ngonuk liwinum.” Iei mine ewe fefin a eki ewe semirit o akoupwu.

¹⁰ Nge lupwen ewe semirit a märitä, neminewe a ekiela ren nöün Farao we fefin. Iwe, a nöüni o aita ngeni Moses, pun a apasa, “Üa ekiwu me lon koluk.”

Moses a süla Mitian 2.11-25

¹¹ Iwe, mürin eu fansoun, lupwen Moses a mwän, a feila ren aramasan ekewe chon Ipru o küneer lon ar angang weires. Iwe, a küna eman re Isip a wichi eman aramasan.

¹² Iwe, Moses a nenefetal, nge lupwen a mefi pwe esap wor eman a küna, a niela ewe re Isip o ireela fän pi.

¹³ Sorotän ewe rän, lupwen a pwal feila rer, a küna ruoman re Ipru ra aninifengen. Iwe, Moses a aisini ewe mi mwäl, “Pwota ka wichi chienom?”

¹⁴ Ätewe a pälüeni, “Iö a filuketä pwe kopwe samol me souapwüng wom? Ka ekieki pwe kopwe pwal nieila usun om niela ewe re Isip?” Mürin, Moses a niuokus o ekieki, “Ellet, ewe föför a pwä.”

¹⁵ Lupwen Farao a rong ei pworaus, a kütta Moses pwe epwe niela. Nge Moses a süla seni Farao o feila Mitian pwe epwe nonom ikenan. Iwe, a mottiu arun eu chönüttu.

¹⁶ Iwe, eman souasor seni Mitian a wor füman nöün föpwül, ra feito ren ewe chönüttu pwe repwe üfüf koluk o alölöü ekewe lenien ün, pwe repwe aünü nöün semer kewe sip.

¹⁷ Nge ekoch chon fofol man ra pwal feito o asüela ekewe föpwül. Mürin, Moses a ütä o alisi ekewe föpwül le aünü nöür kewe sip.

¹⁸ Lupwen ekewe föpwül ra liwiniti semer we itan Setiro, a aisiniir, “Pwota oua müttirito ikenai?”

¹⁹ Iwe, ra apasa, “Eman re Isip a penikem seni ekewe chon fofol man, a pwal üfi koluk fän itach o aünü ekewe sip.”

²⁰ Iwe, Setiro a aisini nöün kewe föpwül, “Ifa i ätena? Pwota oua likiti? Oupwe körato pwe epwe mongö rech.”

²¹ Nge Moses a tipeeu ngeni an epwe nonom ren ewe mwän. Mürin, Setiro a ngeni Moses nöün föpwül Sipora pwe epwe pwülüeni.

²² Iwe, neminewe a nöüni eman ät, nge Moses a aita ngeni Kersom, pun a apasa, “Ngang eman chon siamü lon fanüen ekis.”

²³ Mürin chomong ier ra la, ewe kingen Isip a mäla. Nge ekewe aramasen Israel ra chök ngüngü fän riaföün än chon Isip nöüniir amanau, ra pwal siö pwe eman epwe alisiir. Nge ar siö pokiten ar riaföü a tori Kot.

²⁴ Iwe, Kot a rongorong ar siö o chechemeni an we pwon ngeni Apraham, Isaak me Jakop.

²⁵ A küna ekewe aramasen Israel lon ar riaföü o ekieki usur.