Än Salomon Köl 1 - Chuukese Bible

Ewe fin apwüpwülü söfö me ekewe fin Jerusalem 1.1-7

¹ Iei ewe köl mi öch seni ekewe köl meinisin Salomon a föri.

Fefin

² Amwo kopwe mitiriei. Pun om tong a mürina seni wain.

³ Epitom lö a fokun pwokus. Itom a wewe ngeni lö mi niiniila. Iei mine ekewe föpwül ra tongeek.

⁴ Kopwe nukiei pwe sipwe müttir le sä. Ai king, kopwe emwenieila lon rumwom. Sipwe pwapwaituk o mwäneketuk, sipwe pwal mwareiti om tong lap seni wain. A fokun pwüng ach tongeek.

Chienan fefin Fefin

⁵ Ämi föpwülün Jerusalem, üa liechochol, nge üa liöch. Üa chol usun chök ekewe imw mangaku lon Ketar, üa pwal öch usun chök ekewe cheech lon imwen Salomon.

⁶ Ousap nenengeniei, pun ngang üa liechochol pokiten akkar a acholaei. Iwe, nöün inei kewe mwän ra song ngeniei. Ra awisaei pwe üpwe tümwünü ekewe tanipin wain, nge püsin tanipii üsap tümwünü.

⁷ Kopwe aiti ngeniei, en ewe üa tongei seni lon letipei, ia kopwe foleni ie noum kewe sip? Ia kopwe asösöör ie leoloas? Pwota üpwe usun chök eman mi mwalechfeil lein nöün chienom kewe pwiin sip?

Ewe mwän apwüpwülü söfö me ewe fin apwüpwülü söfö 1.8–2.17 Mwän

⁸ Are kosap silei ewe leni, en mi liöch mwen ekewe fefin, kopwe tapwala mürin ipwen ekewe pwiin sip. Kopwe foleni noum nienifön kuuch ünükün imwen ekewe chon mas imw mangaku.

⁹ En mi wor tongom me rei, üa awewe ngonuk eman liefefinin oris mi nuki wän Farao woken.

¹⁰ Sapom a ling ren foutan, nge üom a ling ren mwärämwär seni fau aüchea.

Chienan fefin

¹¹ Sipwe föri fän itom fout seni kolt me silifer.

Fefin

¹² Lupwen ewe king a kon won an peet, ai lö a fokun pwopwonfeil.

¹³ Ätewe mi wor tongan me rei a usun chök eu tükütükün säfei mi aüchea itan mör, a nonom lefilen oupwi.

¹⁴ Ätewe mi wor tongan me rei a usun chök epilük pilükün pön irä mi pwokus, ra mär lon ekewe tanipin wain lon Enketi.

Mwän

¹⁵ Nengeni, en ka fokun liöch, en mi wor tongom me rei. Ka fokun liöch, föün mesom ra wewe ngeni föün mesen lisom.

Fefin

¹⁶ Nengeni, en ka fokun äteöch, en mi wor tongom me rei, ka wesewesen äteöch. Lenien ach kon a anüen fetil,

Mwän

¹⁷ irän imwach ewe irä setar, nge etippen imwach ewe irä saipires.