1. Tesalonika 1 - Chuukese Bible

Kapong 1.1

¹ Äm Paulus, Silas me Timoty aia kapong ngeni chon ewe mwichefel lon Tesalonika, ir nöün Samach Kot me ach Samol Jesus Kraist: Ümöümöch me kinamwe epwe nonom remi.

Än chon Tesalonika manau me lükülük 1.2-10

² Äm aia kilisoufochofoch ngeni Kot fänäsengesimi meinisin lupwen aia chechemenikemi lon äm iotek.

³ Pun aia chechemeni me mwen ach Kot i Samach usun ämi lükülük mi pwä lon ämi föför, usun ämi tong mi pwä lon ämi angang weires, pwal usun ämi apilükülüköch mi nüküchar lon ach Samol Jesus Kraist.

⁴ Ämi pwiim kana, aia silei pwe Kot a echenikemi o afilikemi pwe oupwe nöün.

⁵ Pun aia uwato ewe Pworausen Manau ngenikemi, sap lon kapas chök, nge ren manaman me Ngünmifel, pwal ren äm wesewesen lükü pwe a let ewe kapas. Ämi oua silei ifa usun nonomum lupwen aia nonom remi lon fansoun äm alisikemi.

⁶ Ämi oua apirükem me ach Samol. Inamwo ika oua tolong lon watten riaföü, oua etiwa ewe Kapasen Kot fän pwapwa mi feito seni ewe Ngünmifel.

⁷ Iei usun oua wiliti eu lenien apirü fän iten ekewe chon lükü meinisin mi nom lon Masetonia me Akaia.

⁸ Pun esap chök ewe kapas usun ach Samol a towu senikemi o chöfetal lon Masetonia me Akaia, nge pwal ewe pworaus usun ämi lükü Kot a chöfetal ekis meinisin. Esap wor och mine aipwe chüen tongeni apasa.

⁹ Ekei aramas meinisin ra kapas usun ämi etiwakem lupwen aia churikemi, pwal usun ämi kul ngeni Kot o kul seni ekewe uluulun anümwäl, pwe oupwe angang ngeni ewe Kot mi manau o wesewesen Kot,

¹⁰ pwal usun ämi witiwiti nöün we epwe feito seni läng. Iei i Jesus nöün we i a amanauasefäli seni mäla, epwe angasakich seni än Kot song epwe feito.