1. Johannes 1 - Chuukese Bible

Ewe Kapasen Manau 1.1-4

¹ Äm aia mak ngenikemi usun ewe Kapasen Manau mi nonom chök seni me lepoputän. Aia fen rongorong ren selingem me küna ren mesem, ewer, aia fen küna o atapa ren pöüm.

² Lupwen ei manau a pwäla, aia küna. Iei mine aia kapas usun o asile ngenikemi usun ewe manau esemüch mi nom ren ewe Sam, nge a pwä ngenikem.

³ Mine aia fen küna o rongorong aia pwal asile ngenikemi, pwe ämi oupwe etikem lon äm chiechifengen me ewe Sam me Jesus Kraist Nöün we.

⁴ Aia makkei ei pwe ämi pwapwa epwe unusöchüla.

Kot i Saram 1.5-10

⁵ Iwe, iei ewe kapas aia rongorong seni Nöün we o aronga ngenikemi: Kot i saram, esap fokun wor rochopwak lon.

⁶ Are sia apasa pwe sia chiechi ngeni Kot, nge sia nom lon rochopwak, sia chofona lon ach kapas pwal lon ach föför.

⁷ Nge are sia nonom lon ewe saram usun i a nonom lon saram, iwe, sia chiechifengen lefilach, nge chaan Jesus Nöün we a limetikich seni ach tipis meinisin.

⁸ Iwe, are sia apasa pwe esap wor ach tipis, sia püsin atupukich, nge esap wor let loch.

⁹ Nge are sia pwärätä ach tipis ngeni Kot, i epwe apwönüetä an pwon o föri mine a pwüng: Epwe amusala ach tipis o limetikich seni ach pwüngingau meinisin.

¹⁰ Are sia apasa pwe sisap tipis, sia achofonai Kot, nge an kapas esap nom loch.