Zabuli 99 - Ilagano Linyale kwa Wanhu Weng'ha na Ilagano lya Katali kuli Chividunda

Nguluwi ndo mndewa mkulu

¹ Mkulu Nguluwi kangulongoza, wanhu wa isi zeng'ha wangukakama. Nakekalisa hagati ha vilumbigwe viwele na mabawa, isi yangutigasika.

² Mkulu Nguluwi ndo mkulu ako Siyoni, kangwinuligwa hali wanhu wa isi zeng'ha.

³ Weng'ha walitogole itagwa lya heye likulu lya kukabusa. Yelile ndo heye.

⁴ Gwa mndewa uwele na mong'ho, ulingugana kutanganika. Nakutawiza hachi kuli Isilaeli, nawigala kutanganika na hachi.

⁵ Mumtogole Mkulu Nguluwi, Nguluwi wa hetwe, mugwe chifunama hali heye. Yelile ndo heye.

⁶ Musa na Aluni nawali watambika wa heye, Samweli nayali hali wala walichemile itagwa lya heye. Nawamlilila Mkulu Nguluwi naye nakawedichila.

⁷ Nakalonga nawo kulawa kuli izengo lya ng'hungugu, nawebatilila nhaguso za heye na mizilo joyawapele.

⁸ Gwa Mkulu Nguluwi, Nguluwi wa hetwe, hegwe nakuwedichila, kwa hewo nawali Nguluwi uwele ulinguwalechela wanhu, hanga nakuwagaza kwa nongwa za hewo.

⁹ Mumtogole Mkulu Nguluwi, Nguluwi wa hetwe, mfugamile kuli chidunda cha heye chelile. Mkulu Nguluwi, Nguluwi wa hetwe, ndo yelile.