Zabuli 98 - Ilagano Linyale kwa Wanhu Weng'ha na Ilagano lya Katali kuli Chividunda

Nguluwi chilongozi wa isi zeng'ha

¹ Mumwimbile Mkulu Nguluwi lwimbo lunyale, kwa vila nakadita mbuli za vinduzanduza. Moko wa heye wa kudilo uzidahe, moko wa heye welile naumha heye kusumya.

² Mkulu Nguluwi nakalajila ulohozi wa heye, nakawalajila wanhu wa isi zeng'ha kutanganika kwa heye.

³ Nakalikumbuchila igano lya kwimilila na kukundigwa kwa heye kwa Waisilaeli. Banzi zeng'ha za isi nazona ulohozi wa Nguluwi wa hetwe.

⁴ Isi yeng'ha itowe luchenze kwa chiwalo cha Mkulu Nguluwi, imtogole kwa nzimbo za usangalalo.

⁵ Mumtogole Mkulu Nguluwi kwa kutowa luchenze, mumtogole kwa lizi linojile lya igombogombo.

⁶ Mumtowele luchenze Mkulu Nguluwi mndewa wa hetwe, msangalale kwa mhalamhanda na mbalati.

⁷ Bahali ibogome na vyeng'ha viwele mumo, isi zeng'ha na weng'ha walingikala mgati mwake.

⁸ Hemwe nzanda mtowe vimbamba, hemwe vidunda mwimbe hamwe kwa kusangalala.

⁹ Visangalale hali Mkulu Nguluwi, kwa vila kanguya kuitagusa isi yeng'ha. Kozitagusa isi zeng'ha kwa hachi, kowatagusa wanhu kwa kutanganika.