Zabuli 65 - Ilagano Linyale kwa Wanhu Weng'ha na Ilagano lya Katali kuli Chividunda

Lwimbo lwa kuta malumbo

(Kwa yalingwaluchiza kwimba. Zabuli ya Daudi.)

¹ Kwanguganigwa kutogoligwa, gwa Nguluwi, ako Siyoni, wanhu wokwenezela hegwe kulagana kwa hewo,

² kwa vila hegwe kwanguhulika kulanda kwa hetwe. Wanhu weng'ha wokuyila.

³ Vyotuwele tugubikwe ng'hatu na gehile, gwegwe baho nakugubika nongwa za hetwe.

⁴ Wotambichizwa wala ulinguwahagula na kigaligwa habehi, wekale haluga ha hegwe. Tugutizwe ganojile ga ng'handa ya hegwe, ganojile ga ng'handa ya hegwe yelile.

⁵ Kwangutwidichila kwa hachi na kudita madito makulu, gwa Nguluwi wa ulohozi wa hetwe, hegwe ndo kitumbila kwa wanhu weng'ha, muisi yeng'ha na kutali mbahali.

⁶ Kwa mong'ho wa hegwe nakuvimiza vidunda honhu hake. Hegwe kuna mong'ho lukami,

⁷ ulinguvidita bahali na nhigu visindamale, kahi ivuche lya wanhu lisindamale.

⁸ Weng'ha walingikala kutali wangububuwazwa kwa madito ga hegwe. Kwangwambuza usangalalo chila honhu, kulawa kolilawilaga isanya mbaka kolizinjilaga isanya.

⁹ Hegwe kwanguilolela isi kwa kuitowela nhonya, kwanguitambichiza mboto na kujidita mizuchila jidedemche. Lwanda lwa hegwe Nguluwi nalumema mazi heko, kwanguidita isi iwe na vilyo vinji. Ahi ndo vyoulinguigongomanya isi.

¹⁰ Migunda kwangujitowela nhonya nyinji, na kujidodeza kwa mazi, isi kwanguidita idode kwa upesi, na kujitambichiza mizuchila jizuche.

¹¹ Kwanguutambichiza mwaka weng'ha kwa ganojile ga hegwe, chila houkolile nahamema ganojile.

¹² Kisolo nakumema migongolo, vidunda navyo navigubikwa usangalalo.

¹³ Honhu ha kudimila migongolo nakugubikwa ming'holo, mibindi najigubikwa na ngano. Chila chinhu changutowa luchenze na kwimba.