Zabuli 54 - Ilagano Linyale kwa Wanhu Weng'ha na Ilagano lya Katali kuli Chividunda

Kulanda kwa kiyamila na wang'honyo

(Kwa yalingwaluchiza kwimba. Na vinhu vya ng'weso vya muziki. Ilanguso lya Daudi mhela munhu yumwe kulawa Sifu loyamlutile Sauli na kumzelesa kota Daudi nakevisa kwa hewo.)

¹ Undohole, gwa Nguluwi kwa itagwa lya hegwe, kwa mong'ho wa hegwe, ulajile kota ndahela nongwa.

² Gwa Nguluwi, uhulichize kulanda kwa heni, uhulichize ulonzi wa mlomo wa heni.

³ Wajenzi wangunhowa, wanhu wawele na nhumbula zigagadale wanguuwinga ukomu wa heni, wanhu wohambe wamdumbe Nguluwi.

⁴ Ndivizela Nguluwi ndo utanzi wa heni, Mkulu ndo yalingunyimiza nzinzili.

⁵ Heye kowagaza wang'honyo wa heni kwa wihe wa hewo wawo, kwa kukundigwa kwa hegwe, gwa Nguluwi, uwadumye.

⁶ Ndokulavila nhambiko ya kunuwila, gwa Mkulu Nguluwi, ndolitogola itagwa lya hegwe kwa vila ndo linoga.

⁷ Kwa vila nakundohola kuli magazo ga heni geng'ha, nani ndiwona wang'honyo wa heni nawalemwela.