Zabuli 47 - Ilagano Linyale kwa Wanhu Weng'ha na Ilagano lya Katali kuli Chividunda

Nguluwi, Mndewa wa isi zeng'ha

(Kwa yalingwaluchiza kwimba. Zabuli ya Wakola.)

¹ Hemwe wanhu weng'ha mtowe vimbamba. Mumtogole Nguluwi kwa lizi lya kusangalala.

² Kwa vila Mkulu Nguluwi, Nguluwi Yawele Kuchanya, kangukabusa. Heye ndo Mndewa mkulu kuli isi zeng'ha.

³ Nakatudita tuwasumye wanhu wa isi, nakawawika wanhu wa isi hanyi, hali magulu ga hetwe.

⁴ Nakatuhagulila isi ayi iwe uhalizi wa hetwe, iwele ndo lutogo lwa walelwa wa Yakobo yalingumgana.

⁵ Nguluwi nakenuka kuchanya hali walingutowa luchenze, Mkulu Nguluwi hali walingutowa mhalamanda.

⁶ Mumwimbile Nguluwi lutogo, mumwimbile. Mumwimbile lutogo mndewa wa hetwe, mumwimbile.

⁷ Mumwimbile Nguluwi lwimbo lwa lutogo, kwa vila heye ndo mndewa wa isi zeng'ha.

⁸ Nguluwi yalinguwalongoza wanhu wa isi zeng'ha, nakekala kuli chigoda cha heye cha undewa chelile.

⁹ Vilongozi wa wanhu wa isi wangikungajiza, wangilumba na wanhu wa Nguluwi wa Abulahamu, kwa vila ludali lweng'ha lwa muisi ndo lwa Nguluwi, heye kana ukulu ng'hatu.