Zabuli 46 - Ilagano Linyale kwa Wanhu Weng'ha na Ilagano lya Katali kuli Chividunda

Nguluwi ka hamwe na hetwe

(Kwa yalingwaluchiza kwimba. Lwimbo lwa Wakola. Kwa kiwhana na Alamoti.)

¹ Nguluwi ndo honhu ha hetwe ha kubilimila na mong'ho wa hetwe, heye ndo utanzi wa hetwe mazuwa gose mhela wa magazo.

² Ahyo hatudumba choneche, hanga limachinyhina holilawila na vidunda kugwa mbahali,

³ hanga bahali yobuguma na kukabusa na vidunda hovikakama kwa kukabusa kwake.

⁴ Hana lwanda luwele mazi gake ganguusangalaza muji wa Nguluwi, honhu helile ha kikala Nguluwi Yawele Kuchanya.

⁵ Nguluwi ka kuli muji awo, nawo hauweza kutigaswa, Nguluwi koutanza lufuku.

⁶ Wanhu wa isi zeng'ha wangulila kwa kukabuswa, na ulongozi wangukakama, Nguluwi kangubuma na isi yangusungulumuka.

⁷ Mkulu Nguluwi Yawele na Mong'ho ka hamwe na hetwe, Nguluwi wa Yakobo ndo ngome ya hetwe.

⁸ Muye mlole madito ga Mkulu Nguluwi, mlole vinduzanduza vya kudumbiza vyoyaditile muisi.

⁹ Kangudumya ngondo muisi yeng'ha, kangubenanga mipinde na migoha, ngawo kanguzilakaza kwa chiluli.

¹⁰ Kangulonga, “Mnyamalile na kuvizela kota heni nda Nguluwi. Ndina ukulu kuli wanhu wa isi zeng'ha, ndikomya, ndina ukulu muisi.”

¹¹ Mkulu Nguluwi Yawele na Mong'ho ka hamwe na hetwe, Nguluwi wa Yakobo ndo ngome ya hetwe.