Zabuli 16 - Ilagano Linyale kwa Wanhu Weng'ha na Ilagano lya Katali kuli Chividunda

Kulanda kikala goya

(Zabuli ya Daudi.)

¹ Unyamile gwa Nguluwi, kwa vila kwa hegwe ndangubilimila kikala goya.

² Ndangumlonjela Mkulu Nguluwi, “Hegwe ndo Mkulu wa heni, ndahela linojile lyoneche ila hegwe.”

³ Kwa mbuli za welile wawele muisi, kikala na hewo ndo kusangalala kwa heni.

⁴ Ila walingujifugamila milungu jinji, wowa na magazo menji. Nhambiko ya danda sijilavila na matagwa ga milungu ajo sigalonga hebu.

⁵ Gwa Mkulu Nguluwi kwanguhega kwa heni, nakuzidita mbuli za heni zeng'ha ziwe goya.

⁶ Nakumha heni ndolendole zinojile ng'hatu, ena, uhalizi wa heni unoga.

⁷ Ndangumtogola Mkulu Nguluwi kwa kundongoza, mbaka mhela wa nechilo nhumbula ya heni yangundagusaga.

⁸ Ndangumuwika Mkulu Nguluwi kumwando kwa heni mazuwa gose, ka hamwe na heni, sitigasika.

⁹ Lelo nhumbula ya heni yeng'ha yangusangalala na kutowa luchenze, lukuli lwa heni lokwesela kwa kikala goya ng'hatu.

¹⁰ Ena hegwe huuleka muhe wa heni kuli isi ya wabagame, hambe undeche, Yelile wa hegwe, nyole mchilaga.

¹¹ Kwangundajila nzila ya ukomu, kuwa hamwe na hegwe kwangumemeza heni usangalalo wenele, kuli moko wa hegwe uwele na mong'ho hana usangalalo mazuwa gose.