Zabuli 149 - Ilagano Linyale kwa Wanhu Weng'ha na Ilagano lya Katali kuli Chividunda

Lwimbo lwa kusumya

¹ Mumtogole Mkulu Nguluwi. Mumwimbile Mkulu Nguluwi lwimbo lunyale, mumtogole kuli nhing'hano ya walingukundigwa.

² Usangalale, gwa Isilaeli, kwa chiwalo cha yakulumbile hegwe, wenyeng'haye wa Siyoni, mtowe luchenze kwa chiwalo cha mndewa wa hemwe.

³ Mlitogole itagwa lya heye kwa ngoma, mmwimbile na kutowa ngoma na igombogombo.

⁴ Kwa vila Mkulu Nguluwi kangunojezwaga na wanhu wa heye, nakawanoliga ulohozi walingunyenyetela.

⁵ Wanhu walingukundigwa wangusangalala kwa kusumya, wasangalale mbaka howalinguwasa.

⁶ Wawe na lutogo lukulu lwa Nguluwi, na mipanga jiwele na kunoleche kwili mmoko mwa hewo,

⁷ wawahilulile chibida wanhu wa isi zinji, wawagaze wanhu wa isi zinji,

⁸ wawawohe wandewa wa hewo kwa minyololo, na vilongozi wa hewo kwa pingu za chuma,

⁹ leka weneze magazo gogalajizwe na Nguluwi. Alo ndo lutogo lwa walingukundigwa wa Nguluwi. Mumtogole Mkulu Nguluwi.