Zabuli 137 - Ilagano Linyale kwa Wanhu Weng'ha na Ilagano lya Katali kuli Chividunda

Kulombocheza kwa Waisilaeli kuli ujenzi

¹ Hafungo ha nzanda za Babuloni, natikalisa natwali tulila vyotukumbuchile Siyoni.

² Kuli migodi ja isi yila, natupatika migombogombo ja hetwe.

³ Watuholile tuwe wapogozi wa ngondo nawagana tuwembile, walingutugaza nawatugana tuwasangalaze, “Mtwimbile lwimbo lumwe hali nzimbo za Siyoni.”

⁴ Toweza ndaze kwimba lwimbo lwa Mkulu Nguluwi, kuli isi ya chijenzi?

⁵ Gwa Yelusalemu, wone ndikusemwe, moko wa heni wa kudilo usemwe uwanzi wa kutowa igombogombo.

⁶ Umyango wa heni unanahile na kulemwela kwimba, wone sikukumbuchile hegwe, gwa Yelusalemu, ena, wone ndogana choneche kusinda kusangalala kwa Yelusalemu.

⁷ Gwa Mkulu Nguluwi, uleche kusemwa gowaditile Waedomu, zuwa lila Yelusalemu vyoiholigwe kuli upogozi, ukumbuchile gowalonjile, “Mbomole muji wa Yelusalemu. Mng'humbule misisi jake.”

⁸ Gwa Babuloni, kodumigwa. Kotambichizwa yula yawele yokuhilusila chibida kwa gehile goutuditile,

⁹ yula yowahola wana wa hegwe, na kuwahondanga kuli mitalawe.