Zabuli 122 - Ilagano Linyale kwa Wanhu Weng'ha na Ilagano lya Katali kuli Chividunda

Lutogo ako Yelusalemu

(Lwimbo lwa kuluta kuchanya. Lwimbo lwa Daudi.)

¹ Nasangalala vyowandonjele, “Tulute kaye kwa Mkulu Nguluwi.”

² Lelo twa hano natwima, mgati mwa lwizi lwa hegwe, gwa Yelusalemu.

³ Yelusalemu, muji uzenjigwe, leka wanhu weting'hane amo.

⁴ Amo ndo nhanzi zilinguluta, ena, nhanzi za Mkulu Nguluwi, kulonga malumbo kwa Mkulu Nguluwi kota vyoyalajize.

⁵ Amo namuwichigwa chitala cha utaguso wa hachi, chitala cha lukolo lwa chiundewa lwa Daudi.

⁶ Muulandile kikala goya muji wa Yelusalemu. “Weng'ha walinguugana, mbuli za hewo zilutilile goya.

⁷ Mgati mwa ng'hanzi za hegwe kuwe na kikala goya, na ngome ya hegwe iwe goya.”

⁸ Kwa chiwalo cha wanhu wa heni na wang'holozangu, ndangulonga, “Gwa Yelusalemu, ndangukuganila kikala goya.

⁹ Kwa chiwalo cha ng'handa ya Mkulu Nguluwi, Nguluwi wa hetwe, ndangukulandila ganojile.”