Zabuli 110 - Ilagano Linyale kwa Wanhu Weng'ha na Ilagano lya Katali kuli Chividunda

Kuwichigwa kwa mndewa na mtambika yahaguligwe

(Zabuli ya Daudi.)

¹ Mkulu Nguluwi kangumlonjela Mkulu wa heni, “Wikalise ubanzi wa kudilo kwa heni, mbaka ndiwawiche wang'honyo wa hegwe hasi ha magulu ga hegwe.”

² Mkulu Nguluwi koweneza undewa wa hegwe kulawa Siyoni, hegwe kolongoza mchanya mwa wang'honyo wa hegwe weng'ha.

³ Wanhu wa hegwe wokuyila kwa kunuwila, zuwa lyouluta kuwatowa wang'honyo. Mchanya mwa vidunda vyelile wokuyila wasongolo wa hegwe, kota nungwi ilingulawa lufuku ng'hatu.

⁴ Mkulu Nguluwi nakelaha, hogalula kunuwila kwa heye, “Hegwe ndo mtambika mazuwa gose kwa kuwinza utambika wa Melekisedeki.”

⁵ Mkulu ka ubanzi wa hegwe wa kudilo, kowahonda wandewa hoyozudila.

⁶ Kowatagusa na kuwakopola wanhu wenji wa isi zinji, kowahonda vilongozi chila honhu muisi.

⁷ Mndewa konwa mazi ga mnzila, naye kokwinula mutwi kuchanya kwa kusumya.