Zabuli 101 - Ilagano Linyale kwa Wanhu Weng'ha na Ilagano lya Katali kuli Chividunda

Kulagana kwa mndewa

(Zabuli ya Daudi.)

¹ Ndokwimba kuwala igano lya kwimilila lya hegwe na hachi ya hegwe, gwa Mkulu Nguluwi, kwa hegwe ndokwimba lutogo.

² Ndobatilila nzila iwele inojile. Ndaze, kokuya nili kwa heni? Ndochikala kwa kugoloka haluga ha heni,

³ sikwimilila hebu upoka. Ndangugazudila madito ga wanhu wajilile, mbuli za hewo haziwa hamwe na heni.

⁴ Kwajilila koneche kula kuwe kutali na heni, heni ndowa haduhu ng'hatu hali wihe.

⁵ Yalingumlonga vibi kwa uviso yawele habehi na heye, ndomdumya, siweza kumwimilila munhu yalingidaya.

⁶ Meho ga heni gowa mchanya mwa wanhu wawele wa kukundigwa kuli isi, leka wekale hamwe na heni. Wanhu wagoloche ndo wong'holela mijito.

⁷ Mhadi yoneche hochikala haluga ha heni ha undewa, haduhu yalingulonga udesi yochikala kwa heni.

⁸ Zuwa mbaka zuwa ndowasumya wehile weng'ha kuli isi, ndowawinga wehile weng'ha kuli muji wa Mkulu Nguluwi.