Yoeli 1 - Ilagano Linyale kwa Wanhu Weng'ha na Ilagano lya Katali kuli Chividunda

¹ Ulonzi wa Mkulu Nguluwi naumuyila Yoeli, mwana wa Petueli.

Wanhu wangulombocheza kwa chiwalo cha mizuchila

² Mhulichize chinhu achi hemwe wasekulu, muwiche goya ikutu weng'ha mlingikala Yuda. Ndaze, mbuli kota ayi naiwahika kulawila kuli kikala kwa hemwe kweng'ha, ama mhela wa wasekulu wa hemwe?

³ Muwasimile wana wa hemwe mbuli ayi, nawo wawasimile wana wa hewo, na wana wa hewo walusimile lulelo lulinguya.

⁴ Nzije zilingutemanga nazijivaba mizuchila, chilechigwe na nzije zilingutemanga nachilika na nzije vilundo kwa vilundo, chilechigwe na nzije vilundo kwa vilundo, nachilika na nzije zilingunomoka, chilechigwe na nzije zilingunomoka, nachilika na nzije zilinguwifya.

⁵ Hemwe mlingugala, mgale na kulila, mtowe iyowe, hemwe mlingugala divai, zabibu zeng'ha za kugongomanya divai inyale naziwifigwa.

⁶ Nzije nyinji naziivaba isi ya hetwe, zina mong'ho na nyinji lukami, mizino jawo ndo kota ja isimba, na mizeje ja milomo jawo ndo kota ja isimba idala.

⁷ Naziwifya mizabibu ja hetwe, na kudakula mitini ja hetwe. Nazidadula mibadu ja migodi na kujitoza hanyi, na nhagala zake nazilechigwa ne chinhu.

⁸ Mlile kota mhinza yavalile ivalo lya igunila yolombocheza kwa chiwalo cha kubagama kwa mlume yawele nakambanichila.

⁹ Nhambiko za nyhule na za kunwa za haduhu kuli ng'handa ya Mkulu Nguluwi. Watambika, vitumagwa wa Mkulu Nguluwi, wangulombocheza.

¹⁰ Migunda jahela chinhu, isi yangulombocheza, kwa vila nyhule naziwifigwa, divai inyale ya haduhu, mizeituni najikala.

¹¹ Mlombocheze hemwe mlingulima, mtowe iyowe hemwe mlingulolela mizabibu. Ngano na shayili naziwifigwa, mbeta zeng'ha kuli migunda nazidumigwa.

¹² Mizabibu najikala, mitini najiwa ng'hochele, mikomamanga na mitende na mitofaa najikala, ena migodi jeng'ha kuli migunda najikala. Kusangalala kwa haduhu hali wanhu.

Nyhemo ilinguwala kulonga gehile

¹³ Hemwe watambika, mvale migunila mlombocheze, mlile hemwe vitumagwa wa honhu ha kulavila nhambiko. Mwinjile kuli ng'handa ya Mkulu Nguluwi mlombocheze nechilo yeng'ha. Nhambiko za nyhule na za kunwa za haduhu kuli ng'handa ya Nguluwi.

¹⁴ Mlavye mzilo leka wanhu wesele kulya, mcheme nhing'hano yelile. Muwakungajize wasekulu na weng'ha walingikala kuli isi, wenjile kuli ng'handa ya Mkulu Nguluwi, Nguluwi wa hemwe, na amo mumlilile Mkulu Nguluwi.

¹⁵ Tochona kwa chiwalo cha lila zuwa lya Mkulu Nguluwi, zuwa alyo lya Mkulu Nguluwi lya habehi, lyanguya hamwe na kudumya, kulawa kwa Nguluwi Yawele na Ludali.

¹⁶ Ndaze, vilyo vya hetwe naviwifigwa kuno tulola. Kusangalala na kuseka vya haduhu kuli ng'handa ya Nguluwi wa hetwe.

¹⁷ Nyhadikwa zangola hali misanga, ng'hano za nyhule zahela chinhu, ng'hano nazibomoligwa, kwa vila kuduhu nyhule za kuwika.

¹⁸ Lole migongolo vyojilingulila kwa masinzo. Vilundo vya misenga vyangusanzalima, kwa vila vyahela honhu ha kulya, na vilundo vya ming'holo vyangugazika.

¹⁹ Ndangukulilila hegwe, gwa Mkulu Nguluwi, chiluli nachilakaza misolo kuli chiwala, milapi ja chiluli najilakaza migodi kuli migunda.

²⁰ Migongolo ja kisolo jangukulilila, kwa vila nzanda za mazi nazikala, chiluli nachilakaza misolo kuli chiwala.