Nhelo 1 - Ilagano Linyale kwa Wanhu Weng'ha na Ilagano lya Katali kuli Chividunda

Vyoilinguganigwa kuli luhala

¹ Azi ndo nhelo za Solomoni, mndewa wa Isilaeli, mwana wa Daudi.

² Nhelo azi zanguwapa wanhu luhala na kuhulichiza na kuwadita waweze kutang'hula ulonzi uwele na mana ivisigwe.

³ Zanguwalangusa ndaze vyowalinguganigwa kikala kwa luhala na ndaze vyowalinguganigwa kudita mbuli kwa kutanganika na kwa hachi ne kuwa na uganililo.

⁴ Zanguwapaga wapoka kuvizela na wasongolo uwanzi wa kuhagula goya.

⁵ Yawele na nyhala yazihuliche na konjeza luhala lwa heye na yawe na ulonzi ulingumlongoza.

⁶ Munhu yauzele goya ulonzi na nhelo na ulonzi wa wala wawele na nyhala na vitendawili vya hewo.

⁷ Kumdumba Mkulu Nguluwi ndo msisi wa luhala, ila wapoka wangubeza luhala na malanguso.

Ulonzi ulinguwala wana

⁸ Mwana wa heni, uhulichize malajizo kulawa kwa mhaza wa hegwe, uleche kugabeza malanguso ga mayako,

⁹ ago gowa chipembelo kumutwi kwa hegwe, na ugasi kuli singo ya hegwe.

¹⁰ Mwana wa heni, wawele na gehile howokuhada, uleche kukunda.

¹¹ Wone wolonga, “Tuche tukamibate munhu na kumkopola, kwa usangalalo wa hetwe, uye leka tuwatowe walihela nongwa,

¹² kota kuli isi ya wabagame, tuwambuze wameligwe kuno wawele wakomu, wowa kota wala walingudulika kuli isimo.

¹³ Tohola vinhu vyeng'ha vya sendi nyinji, ng'handa za hetwe zeng'ha tozimemeza vinhu vyotuholile.

¹⁴ Uye tihanze, vyeng'ha vyotupata tochigawila.”

¹⁵ Mwana wa heni uleche kihanza nawo, ulemeze mgulu wa hegwe uleche kulutasa nawo,

¹⁶ kwa vila magulu ga hewo gangubilimilaga kudita wihe, kudita himahima kwa hewo kweng'ha ndo kubohola danda.

¹⁷ Idiwa liwichigwe kuno chideje chilola, lyanguwichigwa hihi hela,

¹⁸ ila wangupelembaga na kikopola hewo wawo, wanguwikaga idiwa lya kigwiliza hewo wawo.

¹⁹ Ndo vyoziwele nzila za wala walingikala kwa maya ga lufufu, nhumbula za hewo zangudumyaga ukomu wa hewo wawo.

Luhala lwanguchema

²⁰ Luhala lwanguchemaga kwa lizi mnzila, lwangulonga kwa lizi lyake kuli honhu ha kuguzila vinhu,

²¹ hawele na iyowe likulu lwangulandulaga lizi, kuli lwizi lwa muji lwangulongaga,

²² “Hemwe wapoka! Mogana kuwa wapoka mbaka nili? Mbaka hanili walingubeza wosangalala kwa chiwalo cha kubeza kwa hewo, na wasowile nyhala kuuzudila uwanzi?

²³ Mhulichize makanyo ga heni, ndowajidila majesa ga heni, ndowazelesa ulonzi wa heni.

²⁴ Kwa vila nandiwachema, ila namlema kuhulichiza, nandiwalajila moko kwa kuwalalika leka muye, namlema,

²⁵ kwa vila kahi namgabeza majesa ga heni geng'ha, hamgakundile makanyo ga heni,

²⁶ nani ndosechelela magazo ga hemwe. Ndowabeza kwa ulonzi ung'hang'hale vyomuwa kuli kukabuswa,

²⁷ na lunhwinhwi holuwafika kota nhigu, ndowabeza kahi kubagama kwa hemwe vyokuwavaba kota chivuluvumbi, mhela wa kugaya na usungu houwafika.

²⁸ Ahyo homnyhema ila sikwidika, momhala kwa kikangaza ila hamuweza kumbona.

²⁹ Kwa vila namuuzudila uwanzi, hamhagule kumdumba Mkulu Nguluwi,

³⁰ hamkundile kulongozwa na heni, nambeza makanyo ga heni geng'ha,

³¹ lelo, molya mafuza ga madito ga hemwe, mogutizwa mbuli zihile za mwemwe baho.

³² Kwa vila wapoka wangikopola kwa kubelenhuka kwa hewo, wasowile nyhala wangikopolaga kwa ugata wa hewo,

³³ ila chila yalingunyhulichiza kochikala kwa kikala goya, kosindamala ne kudumba magazo.”