Nahumu 1 - Ilagano Linyale kwa Wanhu Weng'ha na Ilagano lya Katali kuli Chividunda

¹ Ulonzi wa Nguluwi kuwala muji wa Ninawi kuli isi ya Ashulu. Chitabu cha kulola kwa Nahumu wa Elikoshi.

Kuzudila kwa Nguluwi hali Ninawi

² Mkulu Nguluwi ndo Nguluwi yawele na fihi, yalinguhilula chibida, Mkulu Nguluwi kanguhilula chibida na kana ng'halazi, Mkulu Nguluwi kanguhilula chibida kwa wang'honyo wa heye, kangulutilila kuwazudila wang'honyo wa heye.

³ Mkulu Nguluwi hambe yazudile hima, ila nakamema mong'ho, Mkulu Nguluwi mazuwa gose hambe yaleche kuwagaza wawele na nongwa. Nzila yalingukola Mkulu Nguluwi, changulawilaga chivuluvumbi chikulu, ng'hungugu ndo chivuluvumbi chilingwenezwa na nzayo za heye.

⁴ Kanguing'hanuchilaga bahali na kuikaza, heye kangwambuza nzanda zeng'ha zikale. Viwala viwele Bashani na chidunda cha Kalimeli vyanguswina, uluwa wa Lebanoni wanguswina.

⁵ Vidunda vyangukakama hali heye, navyo vidunda vyangusungulumuka, isi na vyeng'ha viwele amo vyangukakama hali heye.

⁶ Whaani yalinguweza kuwa habehi na kuzudila kwa Mkulu Nguluwi? Whaani yalinguweza kwimilila kung'hang'hala kwa ng'halazi ya heye? Heye kangubohola ng'halazi ya heye ilingwaka kota chiluli, na mitalawe jangutulika vihandevihande hoyojihejelela.

⁷ Mkulu Nguluwi kagoya, heye ka ngome ya kikala goya mhela wa magazo. Heye kanguwamilaga weng'ha walingubilimila kikala goya kwa heye.

⁸ Ila kwa mazi menji ng'hatu koidumya Ninawi, kanguwosaga na kuwawinga mbaka kuli jiza.

⁹ Lekachoni mwangijesa kudita chinhu chihile hali Mkulu Nguluwi? Heye kogadumya, na yalingitwanza na heye howeza kwima kahi.

¹⁰ Wodumigwa kota chisosolo cha miwa, na kugala kwa ujimbi wa hewo wawo, wolakazwa kota vila mibeleje jikalile.

¹¹ Kulawa hegwe Ninawi, nakalawa munhu yalingugana kudita wihe hali Mkulu Nguluwi, yalingunuwila kudita vinhu vya udesi.

¹² Mkulu Nguluwi nakawalonjela hino wanhu wa heye, “Hanga wanhu wa Ninawi ndo wenji na wawele na mong'ho, woduliswa na kudumigwa. Hanga nandiwagaza hemwe wanhu wa heni, siwagaza kahi.

¹³ Lelo ndoibena ngwamo ya Ashulu kuli singo za hemwe, na minyololo jowowahindile ndojidumulanga”

¹⁴ Mkulu Nguluwi nakalonga hino kuwala Ninawi, “Huweza kuwa na walelwa. Jimalukolo ja hegwe ja kuhongola na ja kuponda, ndojibena kuli haluga ha milungu ja hegwe. Ndokubawila chilaga cha hegwe, kwa vila hegwe haulingukundigwa.”

¹⁵ Hemwe wanhu wa Yuda mlole, kanguya kulawa kuli chidunda, munhu yalingigala mbuli zinojile, msenga yalinguwikula kikala goya. Mdite mvina za hemwe, hemwe wanhu wa Yuda, mweneze kilaha kwa hemwe, kwa vila wehile hawowavaba kahi, kwa vila wodumigwa ng'hatu.