Mika 5 - Ilagano Linyale kwa Wanhu Weng'ha na Ilagano lya Katali kuli Chividunda

Chilongozi kulawa Betelehemu

¹ Mikungajizile wamizi, hemwe wanhu wa Yelusalemu, kwa vila natuzungulutwa na kutunyigwa, naye chilongozi wa Isilaeli wangumtowa mizeze na ng'hweku.

² Mkulu Nguluwi kangulonga, “Ila gwa Betelehemu kuli Efulata, hanga hegwe kwa mdodo hela hali lukolo lwa Yuda, ila kwa hegwe kolawa chilongozi, yawele kolongoza kuli Isilaeli. Lulelo lwake ndo lwa katali ng'hatu.”

³ Ahyo Nguluwi kowaleka wanhu wa heye kwa wang'honyo, mbaka yula mamo yawele na himila hoyoponda. Hamba wang'holoze wasigale hanze ha Isilaeli, wohiluka na kihanza na Waisilaeli wayawo.

⁴ Ayo chilongozi kowadima wanhu wa heye kwa mong'ho wa Mkulu Nguluwi, kwa ukulu wa itagwa lya heye Mkulu Nguluwi, Nguluwi wa heye. Wanhu wa heye wochikala kwa kikala goya, kwa vila kowa mkulu mbaka kuli isi zeng'ha.

⁵ Heye kowa ndo kikala goya kwa hewo. Waashulu howoivaba isi ya hetwe, na kukola kuli ngome za hetwe, towahilika wamizi kitowa na hewo, ena, towahilika vilongozi wa hetwe kwa winji.

Ugombozi na kuwifya

⁶ Kwa vinhu vya hewo vya kitowela ngondo woilongoza isi ya Ashulu na kuihola isi ya Nimulodi leka iwe ya hewo. Mndewa wa hetwe kotulohola kulawa kuli moko ga Waashulu, howofika kuli mbaka ja isi ya hetwe na kwaluka kuivaba isi ya hetwe.

⁷ Walelwa wa Yakobo wosigala wakomu, kwa vila nawenela hali wanhu wa isi nyinji, wowa kota nungwi ya Mkulu Nguluwi ilinguheweza, kota upesi ulingulagala kuli misolo, uwele haulingwambuzwa na munhu, ne kitumbila kuli ludali lwa munhu.

⁸ Walelwa wa Yakobo wosigala wakomu, wawele nawenela hali wanhu wa isi nyinji, wowa na mong'ho ng'hatu, kota isimba hali migongolo ja kisolo, kota isimba lyana hali vilundo vya ming'holo, liwele chila honhu holikola, lyangunyozochelaga upelembi wake na kuudadula, haduhu munhu yoneche wa kulohola.

⁹ Waisilaeli wowasumya wang'honyo wa hewo, na kuwadumya ng'hatu.

¹⁰ Mkulu Nguluwi nakalonga, “Mhela awo ndowosa falasi wa hemwe na kujiwifya mituka ja hemwe ja ngondo.

¹¹ Ndojiwifya miji ja isi ya hemwe, na kuzibomola ngome za hemwe zeng'ha.

¹² Ndoudumya uhawi wa hemwe, namwe hamuweza kahi kuwa na walingulagula.

¹³ Ndojiwifya jimalukolo ja hemwe na mizengo ja hemwe ja kufugamila, namwe moleka kuvifugamila vinhu vyomvigongomanye mwemwe.

¹⁴ Ndong'humbula jimalukolo ja Ashela hali hemwe na kujidumya miji ja hemwe.

¹⁵ Kwa ng'halazi na kuzudila kwa heni, ndohilula chibida kwa wanhu wa isi zeng'ha wohambe wanyhulichize.”