Mika 1 - Ilagano Linyale kwa Wanhu Weng'ha na Ilagano lya Katali kuli Chividunda

¹ Ulonzi wa Mkulu Nguluwi naumuyila Mika, mwenyeng'haye wa Molesheti, mihela ja Yotamu na Ahasi na Hesekiya vyowawele wandewa wa Yuda. Mika nakayona mbuli ilinguwala Samaliya na Yelusalemu.

Mkulu Nguluwi kanguya kuwatagusa

² Mhulichize hemwe wanhu weng'ha, mhulichize hemwe wanhu wa isi yeng'ha. Mkulu Nguluwi kanguya kuwahilika kuli chitala, Mkulu kanguwang'ung'utila hemwe kulawa kuli ng'handa ya heye yelile.

³ Ena! Mkulu Nguluwi kanguya kulawa haluga ha heye, kodulika na kujenda mchanya mwa vinhembenhembe vya isi.

⁴ Vidunda vyosungulumuka hanyi ha uzayo wa heye, kota ihota habehi na chiluli na mibalalika jotulika, kota mazi galingubogoma kuli chiduliko.

⁵ Aga geng'ha golawila, kwa chiwalo cha gehile ga walelwa wa Yakobo, kwa chiwalo cha gehile ga walelwa wa Isilaeli. Ndaze, wihe wa Yakobo wangoneka kohi? Kuli muji wa heye ukulu, Samaliya! Ndaze, honhu ha kujifugamila jimalukolo ha Yuda hangoneka kohi? Kuli Yelusalemu!

⁶ Ahyo, Mkulu Nguluwi kangulonga hino, “Muji wa Samaliya ndoudita uwe mahame kuchiwala, mgunda uwele wanhu wonyala mizabibu. Maganga ga lukanzi lwake ndogatoza kuli ibindi na kujileka mwanzi misisi jake.

⁷ Jimalukolo jake jeng'ha jobenangwa, ndolendole zake zeng'ha za kuli honhu ha kufugamila zolakazwa kwa chiluli. Ndojiwifya jimalukolo jake jeng'ha. Kwa vila wanhu wa Samaliya nawakungajiza ndolendole kota wang'hondwa, nazo zokolelwa mijito ja kuwalipa wang'hondwa.”

Mloli kangulombocheza kwa chiwalo cha Yelusalemu na Yuda

⁸ Kwa chiwalo acho, ndolila na kulombocheza, ndojenda mwanzi na ne makwamba. Ndobwaka kota ikanhu, na kulombocheza kota ituwe.

⁹ Vilonda vya Samaliya havipona, nayo Yuda naipata vilonda avyo, navifichila kuli lwizi lwa Yelusalemu, honhu howalingikala wanhu wa heni.

¹⁰ Mleche kulonga mbuli ayi ako Gati, na mleche kulila! Ako Beti-leafa mgalawate kuli nhimbwisi kwa masinzo.

¹¹ Mlute hemwe wenyeng'haye wa Shafili, muwele mwanzi na mlingudeula. Wenyeng'haye wa Saanani mleche kulawa mgati mwa muji wa hemwe. Wanhu wa Beti-eseli wangulila, utanzi wa hewo kwa hemwe nawusigwa.

¹² Wenyeng'haye wa Maloti wanguubeteza utanzi kwa maya ng'hatu, ila kudumya kwanguya kulawa kwa Mkulu Nguluwi, habehi ng'hatu na lwizi lwa Yelusalemu.

¹³ Hemwe wenyeng'haye wa Lakishi, muwohe falasi yalingubilima lukami kuli mituka ja ngondo. Namwali mwaluko wa gehile kwa mhinza Siyoni, kwa vila namdita gehile kota wanhu wa Isilaeli.

¹⁴ Ahyo, mwanguganigwa kilaga na kuwaleka wenyeng'haye wa Molasheti-gati. Nawo muji wa Akisibu hauwatanza wandewa wa Isilaeli.

¹⁵ Hemwe wenyeng'haye wa Malesha, Nguluwi kowegalila hemwe mng'honyo yawele kowasumya hemwe. Mndewa yawele ndo ukulu wa Isilaeli, koganigwa kivisa Adulamu.

¹⁶ Hemwe wanhu wa Yuda, mbeye mnvili za hemwe, leka kulombocheza kwa chiwalo cha wana wa hemwe muwaganile, muse mnvili za hemwe kota ikungule, kwa vila wana wa hemwe wowaleka hemwe na kuluta kuli isi zinji.