Hoseya 14 - Ilagano Linyale kwa Wanhu Weng'ha na Ilagano lya Katali kuli Chividunda

Kumhiluchila Mkulu Nguluwi

¹ Hemwe Waisilaeli, mhiluche kwa Mkulu Nguluwi, Nguluwi wa hemwe, namikwang'hwala kwa chiwalo cha gehile ga hemwe.

² Mumhiluchile Mkulu Nguluwi na kumlonjela, “Utulechele gehile geng'ha, ubochele ndolendole za hetwe za lutogo, kota ndolendole za milogota milume.

³ Ashulu howeza kutulohola, hatuweza kitumbila kahi kuli falasi wa ngondo. Hambe tujicheme kahi, ‘Milungu ja hetwe,’ ajo ndo jimalukolo jotuhongole twetwe. Kwa hegwe walekwa wangupataga isungu.”

⁴ Mkulu Nguluwi kangulonga, “Ndowalohola kulawa kuli wihe wa hemwe, siwaleka, ila ndowagana kahi kwa kunuwila kwa heni, kwa vila ng'halazi ya heni ya haduhu kwa hemwe.

⁵ Ndowa kota nungwi kwa Isilaeli, kobahula kota uluwa wa yunjiyunji, kota mielezi ja Lebanoni, kodulisa mizabi jake hasi.

⁶ Nhagala zake zokwenela chila honhu, kunoga kwake kowa kota migodi ja mzeituni, kunhunyhilila kwake kunojile ndo kota mielezi ja Lebanoni.

⁷ Wanhu wochikala kahi kuli lubehelo lwake, yodedemka kota nyhule inojile, yobahula kota mizabibu, kuzeleka kwake kowa kota divai ya Lebanoni.

⁸ Gwa Isilaeli, ndina choni kahi na jimalukolo? Ndowedichila hemwe na kuwalolela, Heni ndo kota msonobali uwele na mahamba madodi kulela mafuza kwa hemwe kwangulawa kwa heni.”

⁹ Whaani yawele na luhala? Kozizela mbuli azi. Whaani yalinguvizela? Ayu kozizela. Nzila za Mkulu Nguluwi ndo zigoloka, watanganiche ndo wangujendaga kuli nzila azo, ila walingubelenhuka wochikwang'hwala amo.