Amosi 3 - Ilagano Linyale kwa Wanhu Weng'ha na Ilagano lya Katali kuli Chividunda

¹ Hemwe Waisilaeli, muuhulichize ulonzi uwele Mkulu Nguluwi woyalonjile kwa chiwalo cha hemwe, hemwe wanhu weng'ha wa isi yawalavile kuli isi ya Misili.

² Nakalonga ahi, “Hali wanhu wa isi zeng'ha, hemwe ndo ndiwahagule. Ahyo ndowagaza hemwe, kwa chiwalo cha gehile ga hemwe geng'ha.”

Mijito ja mloli

³ Ndaze, wanhu weli wokwaluka majendo hamwe, ne kikundiza tandi?

⁴ Ndaze, isimba lyangubumaga kisolo kuno lyahela chilyo? Ndaze, isimba lyoweza kubuma kuli mhalika ya heye kuno halibatile chinhu?

⁵ Ndaze, idiwa ne nyhule lyogwiliza chideje? Ndaze, idiwa lyangugwilizaga ne kudolizwa na chinhu?

⁶ Ndaze, mhalamhanda ya ngondo hoipembigwa kuli muji, wanhu hambe wadumbe? Ndaze, muji wangufichigwa na kubagama kohakugaligwe na Mkulu Nguluwi?

⁷ Ndikomya, Mkulu Nguluwi hambe yadite chinhu ne kuwagubulila vitumagwa wa heye waloli kunuwila kwa heye.

⁸ Wone isimba libume, whaani halingudumba? Wone Mkulu Nguluwi yalonje, whaani yoleka kulavya uloli?

Kudumigwa kwa Samaliya

⁹ Muwikule kuli ng'handa za mndewa wa Ashidodi, na kuli ng'handa za mndewa za isi ya Misili. “Mikungajize kuli vidunda vilinguizunguluta isi ya Samaliya, mkalole lunhwinhwi lukulu na kubunza kulingukoleka amo.”

¹⁰ Mkulu Nguluwi kangulonga hino, “Wanhu wano nawazimemeza ng'handa za hewo vinhu vya kuhiza na kuboka. Hawavizelele ng'hatu kudita ganojile!

¹¹ Ahyo, mng'honyo koizunguluta isi ya hewo, kobomola honhu hawo ha kiyamila, na kuzihola ngome za hewo.

¹² Kota mdimi vyoyalingulisukula isimba kuli mlomo magulu meli hela ama chihande cha ikutu lya ing'holo, ahyo ndo vyowosulupuka wanhu wachefu hela wa Isilaeli walingikala Samaliya. Wosigala na itendego lya chinhanda na honhu hado ha chigoda.”

¹³ Mkulu Nguluwi Yawele na Mong'ho kangulonga hino, “Mhulichize, mkawakanye walelwa wa Yakobo.

¹⁴ Zuwa londiwadumya Waisilaeli kwa chiwalo cha gehile ga hewo, ndowifya chila honhu ha kulavila nhambiko kuli muji wa Beteli. Ndobena mbalati za chila honhu ha kulavila nhambiko na kuzigwisa.

¹⁵ Ndoziwifya ng'handa zeng'ha za kuli muji na vijiji, ndozibomola ng'handa zinolijigwe kwa mbalati, ng'handa ng'hulu haisigala ne imwe. Heni Mkulu Nguluwi nandonga.”