Romanos 2 - Manityanati Tupax

Axɨna besɨro ñapanaunkuxti Tupax

¹ Tyopiki axɨna sane champɨ maximiakatax aemo, axtɨ asikia kuata nipɨnatema makiataka, champɨ nɨmoche isane naka. Axtɨ asikia kuata nipɨnatema makiataka, obiatoe aɨkatɨ ɨmo natakisɨrɨkɨ, tyopiki axɨkɨ aisamute tyoneantoe takana axɨna nipɨnatema.

² Tusiu oemo axti Tupax astaiti nosɨboriki isiuki axɨna ñemanauntu axtɨ urapoiti axɨna toxiobo ɨmoma axɨbama sane nisɨborikixhimia.

³ Tapɨ axɨkɨ axtɨ, asikia kuata nipɨnatema makiataka, aisamutentyo takana axɨna isamutema, tapɨ ukanɨ ta añekaka ñana uiti Tupax.

⁴ Axɨkɨ chaxiankapɨ asuriu axɨna taruku nipukɨruxti Tupax atakukɨ, axɨna taruku nakuasɨrɨkɨ ɨmoti, chɨkontopɨ ane nɨmoche uiti naipɨnate. Chɨtusiupɨ aemo, axɨmanu nipukɨruxti uixh aiñokota nomɨnantɨ nauki aɨkatɨ esati.

⁵ Tyopiki axɨkɨ, ui nityai natusi chaxiankapɨ ayetɨ tato esati Tupax, sane naukiche aikiamata aemoantoe axɨna atakisɨrɨkɨbokɨ ɨmo axɨmanu nanenes ñana taruku takisɨrɨkɨx uiti Tupax

⁶ toxio ñana uiti taikiana ɨmoti taman isiuki axɨna isamutenti.

⁷ Toxio ñana uiti isɨborikiboma axɨna champɨ nityakɨrux, ɨmoma axɨbama yapachetioma nanentakax manaunkux ɨmoti Tupax, taikiana aisamunema axɨna uxia.

⁸ Tapɨ axɨbama chuxiampɨ nisɨborikixhimia, toxio ñana ɨmoma ityakisɨrɨkɨboma, axɨbama chuxiampɨ ɨmoma axɨna besɨro ta uxia ɨmoma axɨna nomɨnantɨ.

⁹ Taruku ñana nityakisɨrɨkɨxɨma nisuchekixhimia axɨbama isamutema axɨna chuxiampɨ, kusɨrɨboma ñana axɨbama judíos takanaintyo axɨbama chɨtɨpɨ judíos.

¹⁰ Tapɨ ɨmoma axɨbama judíos takana axɨbamaintyo chɨtɨpɨ judíos axɨbama uxia yachɨkoimia, toxio ñana uiti Tupax ɨmoma, nauki asaraimia nanentax esati, yarusɨrɨx ñana nɨrixhimia uiti, taikiana uxiaintyo uimia ɨmomantoe.

¹¹ Tyopiki axti Tupax besɨro ñapanaunkuxti.

Bakɨpukux uiti Moisés

¹² Namanaiña axɨbama ane nipɨnatema kɨmenu axɨmanu bakɨpukux uiti Moisés, champɨ kausane ɨmoma axtɨ tɨkoiñoma ui axɨmanu bakɨpukux. Tapɨ axɨbama isuputakaimia axɨmanu bakɨpukux uiti Moisés, ui axɨmanu bakɨpukux asarai nisɨborikixhimia.

¹³ Chuxiampɨ nisɨborikixhimia sukarɨti Tupax axɨbama onsapetiomantai axɨmanu bakɨpukux uiti Moisés, ta axɨbama ikokotama axɨmanu bakɨpukux.

¹⁴ Tyopiki axɨbama chɨtɨpɨ judíos, chisuputakaipɨma axɨmanu bakɨpukux uiti Moisés, isamutema aukimiantoe takana axɨna nantɨ axɨmanu bakɨpukux, axɨmantoe astaimia axɨna uxia takana axɨna chuxiampɨ au nisɨborikixhimia,

¹⁵ ityusiankatama ui nisɨborikixhimia ta ane axɨmanu bakɨpukux uiti Moisés korobo au nausasɨxɨma. Ui ñakiokoxɨmantoe uraboi axtɨ uxia o chuxiampɨ axɨna isamutema

¹⁶ au axɨmanu nanenes ñana auche axti Tupax asaratitɨ uiti Jesucristo axɨba umanekana au nausasɨxɨma mañoñɨnka, isiuki axɨba omixhia manityakax xhanunekaka.

¹⁷ Axɨkɨ nɨri judíoxɨkɨ, onkatɨ ɨmo bakɨpukux uiti Moisés, onkatɨ ɨmoti Tupax aemo.

¹⁸ Asuputakai noñemaxti, axɨmanu bakɨpukux uiti Moisés iñununekanɨ apacherio axɨna besɨro.

¹⁹ Au nakionko axɨkɨ aɨkatɨ akusɨrɨ aɨbuma axɨbama supusu, basaruxɨkɨ ɨmoma axɨbama aboma au tomikianene.

²⁰ Aipiakaityo anuneka ɨmoma axɨbama chipiakapɨma, ɨmomaintyo masiomanka, tyopiki axɨmanu bakɨpukux uiti Moisés tyone nanaiña mapanaunkux ɨmo axɨna uxia.

²¹ Axtɨ sane, axɨkɨ anunekaka ɨmo makiataka, ¿kausane chanunekakapɨ aemoantoe? Axtɨ anunekaka chuxiampɨ basɨpɨ, ¿kausane akusɨpɨ?

²² Axtɨ ukanɨ tapɨ ane kiatax paɨx uiti ñoñɨnx, o paɨx axtɨ anati kiatax ñoñɨnx uixh pɨnanakiti ikiana, ¿kausane aisamune sane? Axtɨ atɨborikiatai kuata nityupa makiataka, ¿kausane asikia akusɨpɨ nenaxi nipo neankaxɨma?

²³ Yarusɨrɨxɨkɨ au nakionko aɨbu axɨmanu bakɨpukux uiti Moisés, tapɨ ɨmoti Tupax chanaunkapɨ ityopiki chaisamutempɨ isiuki axɨmanu bakɨpukux uiti Moisés.

²⁴ Sane naukiche nantɨ iku Nikorox: “Axɨbama chɨtɨpɨ judíos chuxiampɨ nuraxɨma ɨmoti Tupax autopiki.”

²⁵ Ñemanauntu, axti naki ikokotati bakɨpukux uiti Moisés, axɨmanu circuncisión ane niyaserebikixh ɨmoti. Tapɨ axtɨ chikokotatipɨ, sɨsioti takana axtɨ chicircuncidabotipɨ.

²⁶ Tapɨ axtɨ anati naki chɨcircuncidabotipɨ, isamutenti takana axɨna nantɨ bakɨpukux, sɨro ɨmoti takana axtɨ circuncidaboti.

²⁷ Axti naki ikokotati axɨmanu bakɨpukux uiti Moisés, champɨ nɨmoche axtɨ chɨcircuncidabopɨ nikɨtɨpɨxti, uiti ñana asaraiti axɨna isamutenti naki isuputakaiti bakɨpukux uiti Moisés, axtɨ chikokotatipɨ.

²⁸ Axti naki judío chɨtɨpɨ ɨmo aukiatai tyɨrɨpo, axtɨ circuncidaboti tapɨ aukiatai tyɨrɨpo nikɨtɨpɨxti.

²⁹ Axti naki ñemanaunkuxatoe judío, tyonenti naki isamutenti nanaiña auki nausasɨxti, axti naki circuncidaboti isamutenti au nausasɨxti: chɨtɨpɨ isiuki Nikorox ta ui noñemaxti Espíritu Santo. Axti naki isamutenti sane, uxia au nastaxti Tupax chɨtɨpɨ au nastaxɨma mañoñɨnka.