San Mateo 28 - Manityanati Tupax

Nisɨborikixhti tato Jesús

¹ Tɨsɨrotɨ axɨmanu nanenes sabaru, naukiche tɨtobikia aɨbapae aiñanai axɨmanu kusɨrɨbo nanenes ɨmo semana, Mariax Magdalena ichepe kiatax Mariax omenotɨ amasarai nikɨxti Jesús.

² Auki paichokonono kɨx, tyopiki tamanti ángel uiti Yɨriabux kuatati auki napes, auki sɨrotitɨ esa axɨmanu nikɨxti, ikiaɨbutati axɨmanu kanx ityuruki nikɨxti auki tɨmonsoti onɨ.

³ Kuara nikɨtɨpɨxti maniki ángel takana axtɨ masɨnaka, naibixhti champɨ takanache nipurusubikixh.

⁴ Naukiche astaimia axɨmanuma masortaboka, paichokononoma ui nixhukuxɨma sɨsioma takanati naki tɨkoiñoti.

⁵ Nanti maniki ángel ñome axɨmanio paɨka: –Tapɨ aupixhuka. Tusiu iñemo apapacheka iyoti Jesús, axti maniki takubaxioti kɨtɨpɨ kurusɨx.

⁶ Champɨti auna, tɨsɨborikoti tato, takana nuraxti. Ausiapata amasarai kauta anankati.

⁷ Isiukai amekosi aburaboi sukarɨma namanaiña axɨbama amonkoma isiuti: ‘Tɨsɨborikoti tato, sɨrotitɨ au Galilea nauki oberabarama tatityo uiti. Akamanu amasakati.’ Tyone axɨna surapoboibo ausukarɨ.

Ityusiankanatiyɨ Jesús yusukarɨ paɨka

⁸ Axɨmanio paɨka isiukaɨ omenotɨ esaki nikɨxti, aɨbu niyopixhukux aɨbuityo niñupukɨnunkux, omenotɨ yuparukux aburaboi axɨna umastai sukarɨma axɨbama amonkoma isiuti.

⁹ Isiukai, axti Jesús ityusiankanatiyɨ yusukarɨ mankioti nuxia ñome. Axio omenotɨ esati Jesús panaunu ɨmoti, opityañumeta nipopesti,

¹⁰ nanti Jesús ñome: –Tapɨ aupixhuka. Amekosi aburaboi sukarɨ axɨbama masarukityaiki tari yɨrakamatɨ au Galilea, akamanu asaramañɨ.

Masortaboka toxio ɨmoma monixh

¹¹ Naukiche tomenotɨ tato axɨmanio paɨka, aboma axɨpekukimia axɨmanuma masortaboka iñataimia au axɨmanio poka auki urapoimia sukarɨma axɨmanuma ɨriatuxɨma axɨbama sacerdotes nanaiña axɨna astaimia.

¹² Axɨma sɨromatɨ aparimia aɨbu mayɨriabuka nauki chepe ñakionkoxɨma. Bacheboma chama monixh ɨmo masortaboka,

¹³ auki namatɨ ɨmoma: –Axaño amukanaño au tobixh naukiche aupanuka, axɨmanuma apóstoles kuamatɨ akusɨpɨrioma nikɨtɨpɨxti.

¹⁴ Axtɨ ipiatenti yɨriabux axɨna sane, axɨsomɨ supaparikia aɨbuti, tapɨ axaño champɨ kausane aume.

¹⁵ Axɨmanuma masortaboka yasutiuma axɨmanu monixh isamutema isiu axɨmanu nuraxɨma ɨmoma. Tyone axɨna kaɨmainki ikokotama axɨbama judíos.

Axɨna yakɨpukuxti Jesús ɨmo axɨbama nesaxti apóstoles

¹⁶ Sane naukiche, axɨmanuma once amonkoma isiuti sɨromatɨ au Galilea onɨ axɨmanu yirityux kauta ityusiakatati Jesús sukarɨma.

¹⁷ Naukiche asaramati Jesús, manaunuma ɨmoti, aboma axɨbama chikokotapɨma nuxia.

¹⁸ Sɨrotitɨ Jesús esama, nanti ɨmoma: –Axti Tupax ane nisɨriaka uiti au napes ikunaintyo axɨna kɨx.

¹⁹ Sane naukiche, amekosi au nanaiña iku axɨna kɨx, apiñununekasama namanaiña nauki aikokoromañɨ. Apaunimia ɨmoma au nɨrixhti Iyaɨ, axti Aɨtoxti axtityo Espíritu Santo.

²⁰ Apiñununekasama nauki akokonauma ɨmo nanaiña nixhakɨpuku aume. Tapɨ axɨñɨ yasikia auchepe nanaiña naneneka, ichepe axtɨ iñatai nityakɨrux ɨmo axɨna kɨx.