San Marcos 16 - Manityanati Tupax

Sɨborikoti tato Jesús

¹ Tɨsɨrotɨ axɨmanu nanenes sabaru, Mariax Magdalena ichepe nipiakɨtoti Santiago ichepetyo Salomé iyebo oboi axɨmanu uxiantai norixh axɨna uiche apisema nikɨtɨpɨxti Jesús.

² Au axɨmanu kusɨrɨbo nanenes ɨmo axɨmanu semana omenotɨ tansɨrapae esa axɨmanu nikɨxti, aɨbapae ane ape sux,

³ munantɨ ñomeampatoe: –¿Ñakusanempɨ uiche kaɨma aikiaɨbu oemo axɨmanu kanx nityabuxi nikɨx?

⁴ Naukiche, umasaratɨ, umastai axɨmanu kanx chanankapɨ kauta ananka. Axɨmanu kanx taruku nityabaikixh.

⁵ Naukiche omenompo au nikɨxti umastai, tɨmonsoti au nepanaunkux, tamanti yaɨx abaesa naibixhti purusubi. Chiyaupɨ niyupixhukux,

⁶ tapɨti nanti ñome: –Tapɨ aupixhuka. Axaño apapachekiokati Jesús auki Nazaret, axti maniki takubaxioti kɨtɨpɨ kurusɨx. Chauki tɨsɨborikoti tato. Champɨtiki auna. Amasasatɨ kauta aiñanamati.

⁷ Amekosi aburaboi isukarɨ axɨbama nesaxti apóstoles isukarɨtityo Peru: ‘Sɨrotitɨ au Galilea nauki oberabarama tatityo uiti. Ta'a amasakati, sane takana nuraxti aume tɨkañe.’

⁸ Auki axɨmanio paɨka kuantio tato tyɨrɨpo auki nikɨxti aɨbu niyopesɨbux, amonkio mupaichokonono, bupixhubu. Champɨti sukarɨche uburapoi, ui niyopixhukux. [

Ityusiankanatiyɨ Jesús sukarɨ Mariax Magdalena

⁹ Naukiche tɨsɨborikoti tato Jesús au axɨmanu kuatɨ nanenes ɨmo axɨmanu kusɨrɨbo nanenes ɨmo axɨmanu semana, ityusiankanatiyɨ isukarɨ Mariax Magdalena, axɨna kɨtɨpɨkiche bakaɨburuti tɨkañe siete machoboreka.

¹⁰ Tyone sɨrotɨ uraboi isukarɨ axɨbama amonkoma tɨkañe ichepeti Jesús, axɨma amonkoma sucheboma areoroma.

¹¹ Naukiche turapoi isukarɨma ta sɨborikoti tato Jesús, chikokotapɨma.

Ityusiankanatiyɨ Jesús sukarɨma toxɨma nesaxti apóstoles

¹² Iyau nanaiña axɨna sane, ityusiankanatiyɨ Jesús au kiatax nakaxti isukarɨ axɨmanuma tox isiu kutubiux niyɨkɨxɨma au niyoxɨma.

¹³ Sɨromatityo uraboimia isukarɨ makiataka. Isiatai chikokotapɨma.

Yakɨpukuxti Jesús ɨmo axɨbama nesaxti apóstoles

¹⁴ Ta'aiki pariu ityusiankanatiyɨ Jesús isukarɨ axɨmanuma once nesaxti apóstoles, amonkoma tɨmonsoma basoma. Akamanu kuasoma uiti ityopiki chikokotapɨma tyakuityo nityai nausasɨxɨma, ui axɨna chikokotapɨma nuraxɨma axɨbama ityusiankanatiyɨ isukarɨma, ta sɨborikoti tato.

¹⁵ Auki nanti ɨmoma: “Amekosi au nanaiña iku axɨna kɨx aburaboi axɨna omixhia nisura isukarɨ namanaiña.

¹⁶ Axti naki ikokotati axtɨ ɨrioti, taesɨburuti pɨnanaki nomɨnantɨ. Tapɨti naki chikokotatipɨ, toxioti ɨmo nikonkoxti.

¹⁷ Axɨba oboiche atusi abe ichepe axɨbama ikokotama: au nisɨri bakaɨburuma machoboreka. Iyebo uimia kiatax manityakax.

¹⁸ Iñenomaio noixhoboka. Axtɨ chaboma picharax, champɨ kausane uixh ɨmoma. Axtɨ iñatama ne'esɨma kɨtɨpɨ axɨbama maunxokono, uxiankama tato uimia.”

Sɨrotitɨ tato Jesús au napes

¹⁹ Naukiche tɨchauki nuraxti aɨbuma, axti Yɨriabux Jesús kamperoti niyɨkɨxti tato au napes atɨmoti au nepanaunkuxti Tupax.

²⁰ Axɨma sɨromatɨ uraboimia axɨba omixhia nuraxti au nanaiña. Axti Yɨriabux anankati chepema, ityusiankatati axɨmanio nuraxɨma oboi axɨba champɨ tastaimia.]