San Marcos 15 - Manityanati Tupax

Anati Jesús kutakikiboti Pilato

¹ Tansɨrapae, iyoberabaramakɨ axɨmanuma ɨriatu axɨbama sacerdotes ichepe mayɨriabuka axɨbamaintyo manunekanama bakɨpukux uiti Moisés, namanaiñantyo mayɨriabuka. Ikianamati Jesús tomoenoti, auki ityoximianamati ɨmoti Pilato.

² Ñankitioti Pilato pɨnanakiti: –¿Axɨkɨ Ɨriatu axɨbama judíos? –Aiñumuti Jesús–sane takana ukanɨ.

³ Axɨbama ɨriatu axɨbama sacerdotes aruki nanaiñantai urabomati,

⁴ ñankitioti tatityo Pilato pɨnanakiti: –¿Kausane chaiñumutapɨ? Omsapesio chɨtamampatai nuraxɨma akɨtɨpɨkɨ.

⁵ Chiñumutatipɨ Jesús. Sane naukiche axti Pilato sɨsioti kɨtobɨsoti.

Toxioti Jesús ɨmo nikonkoxti

⁶ Ɨmo axɨmanu pukɨnunkux, yacheataxti Pilato aityaesɨmunuti tamanti naki amanatipo, Axti naki ñankiriomati pɨnanakiti.

⁷ Tamanti ñoñɨnx nɨrixhti Barrabás, anankati axɨmanio naneka amanatipo, ichepe makiataka axɨbama batabayoma tɨkañe naukiche baiyoma aɨbu mayɨriabuka.

⁸ Iñataimia sɨrɨmanama, auki ankirioma pɨnanakiti Pilato aisamunenti takana yacheataxti.

⁹ Aiñumuti Pilato: –¿Auxianka ataesɨbuti sobi aume Ɨriatuxɨma axɨbama judíos?

¹⁰ Tyopiki tusiatai ɨmoti Pilato axɨmanuma ɨriatu axɨbama sacerdotes toxioti uimia ɨmoti ityopiki ubatiomati.

¹¹ Axɨmanuma kaɨma ɨriatu axɨbama sacerdote ityɨmoniankanama makiataka, nauki ankirioma ataesɨbuti Barrabás.

¹² Ankirioti Pilato pɨnanakimia: –¿Isane nauxiantɨmo isamune aɨbuti naki amukanaño Ɨriatu axɨbama judíos?

¹³ Aiñumuma aɨbu nityosibixhimia: –¡Aityakubaxisoti kɨtɨpɨ kurusɨx!

¹⁴ Nanti Pilato ɨmoma: –¿Isane nipɨnatenti? Axɨma tosibikoma tatityo: –¡Aityakubaxisoti kɨtɨpɨ kurusɨx!

¹⁵ Axti Pilato, xhanxti nauki uxia uimia ɨmoti, sane naukiche iñemekanati Barrabás. Naukiche tɨbakɨpuruti akɨboriti Jesús, auki aityoximianati nauki aityakubaxiromati kɨtɨpɨ kurusɨx.

¹⁶ Masortaboka sɨromatɨ aɨbuti Jesús tyɨrɨpo au nusuara, nɨrixh pretorio au nipoxti yɨriabux, akamanu iyoberabaramakɨ namanaiña masortaboka.

¹⁷ Iñatama aibiboti kɨturiki, masamunuma ityarusɨboti kɨmeka iñatama ityati.

¹⁸ Auki tosibikoma kuatati: –¡Tari abaityux nisɨborikixhti naki Ɨriatu axɨbama judíos!

¹⁹ Bacheboma ityati ui soema, utureuruma kɨtɨpɨti, bachesoiyoma esati nauki anauma aɨbu nunkuxɨma ɨmoti.

²⁰ Naukiche tɨchauki nunkuxɨma ɨmoti, ikiaɨbutama ikɨtɨpɨkiti axɨmanu naibixhti kɨturiki, iñatama tato kɨtɨpɨti naibixtiatoe auki sɨromatɨ aɨbuti tyɨrɨpo, nauki aityakubaxiromati kɨtɨpɨ kurusɨx.

Takubaxioti Jesús kɨtɨpɨ kurusɨx

²¹ Tamanti ñoñɨnx auki Cirene, nɨrixhti Simón, yaɨtoti Alejandro axtityo Rufo, aɨbo aiñanainti tato auki ñanaunx. Naukiche ikonɨtiyɨ aukimanu, ikɨpurumati nauki aikianti nikurusɨxti Jesús.

²² Aikianamati Jesús au axɨmanu kauta nɨrixh Gólgota, (axɨna nɨrixh: “Nipiai nityanu makoiñoka.”)

²³ Bacheboma ityɨpoboti vino aɨbu xoriokox eana, tapɨti Jesús chiyasutiutipɨ.

²⁴ Auki ityakubaxiromati kɨtɨpɨ kurusɨx. Auki kaɨma masortaboka sorteabo uimia naibixhti, sane atusi ɨmoma isane sɨrobotɨ uiti taman.

²⁵ Nueve tɨkañe ɨmo tansɨrɨ naukiche aityakubaxiromati.

²⁶ Iñatamaintyo nikorox kɨtɨpɨ nikurusɨxti, nauki atusi axɨna tyakuche atoxiti ɨmo nikonkoxti: “Axti naki tyonenti Ɨriatu axɨbama judíos.”

²⁷ Ichepeti takubaxiomaintyo toxɨma mayatabayoka, tamanti au nepanaunkuxti axti kiatax au nepautuxti.

²⁸ Sane kokono axɨna nantɨ iku Nikorox: “Pakɨmunkunuti chepema axɨbama taruku nomɨnantɨ uimia.”

²⁹ Axɨbama ikɨnomakɨ aukimanu unumati, ityatobiromakɨ namatɨ: –¡Axɨkɨ, ukanɨ aukutanu aiñaximiakata nipo meankax yopɨrɨkɨ trex naneneka atɨrai tato obi,

³⁰ okɨma atakukɨatoe atobɨ akɨ kɨtɨpɨki kurusɨx!

³¹ Saneityo uimia axɨmanuma ɨriatu axɨbama sacerdotes axɨmanumaintyo manunekana bakɨpukux uiti Moisés. Namatɨ: –Okɨmanati tyaku makiataka, tapɨ tyakutiatoe ta chokɨmanatipɨ.

³² ¡Tari yebatitɨ akɨ kɨtɨpɨki kurusɨx axti maniki Mesías, naki Ɨriatu Israel, nauki basarai, sane kaɨma uikokoroti! Axɨmanuma amonkoma takubaxioma kɨtɨpɨ nikurusɨxɨma chepeti unumatityo.

Nikonkoxti Jesús

³³ Naukiche tɨtose, tomikianene iku nanaiña kɨx chepe trex isiu nimɨmɨx.

³⁴ Isiukai axti Jesús rabotɨ nuxia nityosibixhti: “Eloí, Eloí, ¿lemá sabactani?” (nantɨ sane: “Tupax, Tupax, ¿kausane aiñokonoñɨ?”)

³⁵ Aboma axɨbama axɨpekukimia axɨmanuma amonkoma akamanu, onkoimia namatɨ: –Amonsapesio, yabiroti profeta Elías.

³⁶ Auki aipiakɨnotiyɨ maniki taman axɨpekukimia, aipiankati taman xɨrɨpɨtɨx ui vino pichananene, aityomoenti kutaku soema aiñanti saimia ɨmoti Jesús nauki aichabauti, nanti: –Asioti sane, basaraira axtɨ kuatati Elías aikiaɨburuti kɨtɨpɨki kurusɨx.

³⁷ Auki rabotɨ nuxia nityosibixhti Jesús, koiñoti.

³⁸ Isiukai axɨmanu cortina au nipo meankax kiopɨro kɨmuintya auki ape iñatai akɨ.

³⁹ Axti maniki ɨriatu masortaboka, anankati kutakikiboti Jesús, naukiche astaiti tɨkoiñoti, nanti: –Ñemanaunkuxatoe Axti naki ñoñɨnx tyonenti Aɨtoxti Tupax.

⁴⁰ Amonkio akamanu paɨka mastayotɨ auki icheatai. Akamanu yochepe ananka Mariax Magdalena, ichepe Mariax nipiakɨtoti Santiago naki simiantiki pɨnanakiti Kiosen axtityo Salomé.

⁴¹ Axɨba paɨka omenotɨ isiuti Jesús axɨba amonkio chepeti ɨmo yachɨkoiti naukiche anankatiki au Galilea. Akamanu amonkioityo pikiataka axɨba obebotɨ ichepeti au Jerusalén.

Iñanamati kɨtu Jesús

⁴² Axɨmanu nanenes nesa makoñokokox, kɨmenu axɨmanu kiatax nanenes sabaru, chauki tɨtɨmɨmɨka.

⁴³ Axti Kiosen, auki Arimatea, axɨpekukimia axɨmanuma mayɨriabuka, anankatityo baxɨperarati kɨmenu nɨriakaxti Tupax, sɨrotitɨ ankirioti pɨnanakiti Pilato nikɨtɨpɨxti Jesús.

⁴⁴ Axti Pilato, kɨtobɨsoti naukiche ipiatenti tɨkoiñoti Jesús, sane naukiche aityasuruti maniki ɨriatu masortaboka nauki ankirioti pɨnanakiti axtɨ tɨkoboi akonti.

⁴⁵ Naukiche turapoiti sukarɨti maniki ɨriatu masortaboka ta ñemanauntu, axti Pilato ityoximiatati nikɨtɨpɨxti ɨmoti Kiosen.

⁴⁶ Auki axti Kiosen iyebo uiti kɨbuxikia omixhia, ikiatati akɨ nikɨtɨpɨxti uiti auki kiñoenoti oboi axɨmanio kɨbuxikia. Aukimanu sɨroti uiti au axɨmanu kanx sɨtokono tabuxio uiti ui kiatax kanx.

⁴⁷ Mariax Magdalena ichepe Mariax nipiakɨtoti Kiosen, umasaratɨ kauta aiñanamati.