San Marcos 13 - Manityanati Tupax

Urapoiti Jesús iñaxio ñana nipo meankax

¹ Naukiche tɨniyɨkɨxti Jesús auki nipo meankax, tamanti axɨpekuki axɨmanuma nesaxti apóstoles nanti ɨmoti: –¡Maestro, asasatɨ ñome axɨba kanka axɨbaityo poka!

² Aiñumuti Jesús: –¿Asakio axɨba yarusɨrɨka poka? Champɨ ñana onkono taman kanx onɨ kiatax. Nanaiña iñaxio ñana.

Axɨba oboiche atusi axtɨ tɨsaimia nityakɨrux

³ Auki sɨromatɨ eana axɨmanu nɨunx Olivos, ane kutakikibo axɨmanu nipo meankax. Atɨmoti Jesús, axti Peru, chepeti Santiago, axti Kuan axtityo Andrés ñankitioma axɨmantai pɨnanakiti

⁴ auche ñana aiñanai axɨna sane, isane uiche atusi axtɨ tɨsaimia aiñanai nityakɨrux.

⁵ Aiñumuti Jesús: “Amasasai nuxia, tapɨ anati naki matachemakanati aume.

⁶ Tyopiki sɨrɨmanama ñana kuamatɨ au nisɨri. Namatɨ ñana: ‘Unka axɨñɨ’, sɨrɨmanama ñana axɨbama tapenekoma uimia.

⁷ “Axtɨ apipiate ane batabaikixh au nanaiñantai, tapɨ aupixhuka. Tyopiki sane ñana axɨna kuabotɨ. Ta chityonempɨ nityakɨrux.

⁸ Tyopiki taman nación baiyo aɨbu kiatax mayɨriabuka baiyomaintyo aɨbumantoe. Pokoro kɨx au nanaiñantai, ane ñana yarusɨrɨx kɨrɨpɨx. Tyoneio axɨba bukusɨrɨbo ñana takisɨrɨkɨx.

⁹ “Amasasai nuxia autakuapatoe. Tyopiki ityoximianama año ñana meku mayɨriabuka okɨsioma aume ubau sinagoga. Ikianama año esa axɨbama yarusɨrɨx nɨriakaxɨma ichopikiñɨ. Sane apityusiankata isukarɨma ta yaka auchepe.

¹⁰ Axtɨ tɨsaimia nityakɨrux ñana, axɨba omixhia manityakax urapoimia sukarɨ namanaiña iku axɨna kɨx.

¹¹ Tapɨ amontarabeka iyo axɨna aburapoboibo, axtɨ ityoximianama año meku mayɨriabuka. Akamanu amukanaño axɨna toxio aume aburapoboibo uiti Tupax, ityopiki chɨtɨpɨ axaño apanityaka, ta axti Espíritu Santo.

¹² Axɨbama yarukityoxɨmantoe ityoximianama ñana yarukityoxɨmantoe ɨmo nikonkoxɨma, ui yaɨtoxɨma ñana toxioma ɨmo nikonkoxɨma axɨbama aɨtoxɨmantoe. Axɨbama aɨtoxɨma champɨ ñana nikuaxɨma yaɨtoxɨma ɨmoma ta ityabairoma.

¹³ Namanañantai ñana tɨborikoma aume ichopikiñɨ. Tapɨti naki chɨtapenekotipɨ ichepe nityakɨrux, iyebo uiti champɨ nityakɨru nisɨborikixhti.

¹⁴ “Axtɨ amastai axɨna taruku nomɨnantɨ uxiante auna kauta chɨkoñopɨtɨ ane–axti naki astaiti Nikorox, tari aye uiti–, auki axɨbama aboma au Judea, tari yesɨburama omonɨ yirityuka.

¹⁵ Naki anati chaku nipoxti, tapɨ kuati tato akɨ'ɨ aɨrotipo akanti nenaxixhti.

¹⁶ Naki anati au niyoxti, tapɨ basukɨbɨkoti tato aikianti nikɨbuxixhti.

¹⁷ ¡Butakisɨratai axɨba paɨka au axɨmanio naneneka axtɨ anati simia yokɨtɨpɨ axɨbaityo paɨbotiki niñupaɨmakax!

¹⁸ Apankisio pɨnanakiti Tupax tapɨ iñatai axɨna sane axtɨ tarukapae xhimianene,

¹⁹ ityopiki axɨmanio naneneka ñana ta ɨmo taruku nautakisɨrɨkɨ tyopiki champɨ tɨtane auki maɨbo naukiche aisamutenti Tupax axɨna kɨx, aukina kaɨma chanantopɨ ane tato.

²⁰ Axtɨ chɨmɨmanampɨ uiti Yɨriabux axɨmanio naneneka, champɨti añekana. Ta mɨmanantai uiti ityopiki axɨbama taruku nikuaxɨma ɨmoti, axɨbama sɨroma pe'ese uiti.

²¹ “Axtɨ anatityo naki nanti aume: ‘Amasasatɨ, auna nakaxti Mesías’, axtɨ namatityo ‘Amasasatɨ, ta'a nakaxti’, tapɨ apikokota.

²² Kuamatiki ñana axɨbama chɨtɨpɨ mesías axɨbamaintyo chɨtɨpɨ profetas. Masamunuma ñana axɨna champɨ tamastai, oboiche atachemakama ɨmo axɨbamampae sɨroma pese uiti Tupax.

²³ ¡Amasasai nuxia! Nanaiña axɨba sane chauki tɨsurapoi ausukarɨ.

Niyekixhti tato Aɨtoxti ñoñɨnx

²⁴ “Au axɨmanio naneneka ñana, axtɨ tɨchauki nautakisɨrɨkɨ, sux otochebo, panx chɨkuarapɨ,

²⁵ nostoñeka bupakio ñana auki napes nanaiña axɨba abe iku napes mupaichokonono.

²⁶ Auki kaɨma amasakati Aɨtoxti ñoñɨnx niyekixhti tato omonɨ kɨsaɨboka aɨbu yarusɨrɨx nɨriakaxti.

²⁷ Axti bakɨpuruti ñana ɨmo axɨmanuma ángeles, yakɨna aiyoberabama axɨbama sɨroma peese uiti auki nanaiña nityakɨru kɨx, aukityo nityakɨru napes.

²⁸ “Apipia axɨna machepekatax kɨtɨpɨ nutachens: Axtɨ aɨbapae anentato nasux, tɨtusiu aume ta tɨsaimia tyanaunx.

²⁹ Isiuityo, axtɨ amastai opiñatai axɨba sane, tusinau aume ta axti Aɨtoxti ñoñɨnx tɨtanati abeu tyurux.

³⁰ Ñemanaunkuxatoe sukanañɨ ñanaiña axɨba sane uxiante ñana isukarɨmainki axɨbama kaɨma aboma.

³¹ Axɨna kɨx ichepe napes omiñaxio ñana, tapɨ axɨba nisura ta omixhankio ñana.

³² “Ta axɨmanu nanenes, champɨti ɨmoche atusi, axɨbama ángeles auki napes chɨtusiupityo ɨmoma, axti naki Aɨtoxti isiatai chɨtusiupɨ ɨmoti. Kunautañati Yaɨtoti tusiu ɨmoti.

³³ “Sane naukiche, taikiana amastaikiatɨ amasasatɨ autakuapatoe, tyopiki chɨtusiupɨ aume auche ñana aiñanai axɨmanu nanenes.

³⁴ Apisamuse takanati maniki ñoñɨnx, naukiche tɨsaimia niyɨkɨxti iche, iñokotati nipoxti mekuma axɨmanuma nikumanakataxti yakɨna asaramatɨ tyaku. Onkonoma uiti taikianati taman aɨbu niyachɨkoiti, bakɨpuruti ɨmoti maniki yɨriabux uiti tari asaratitɨ nuxia.

³⁵ Taikiana amastaikiatɨ nuxia, ityopiki chɨtusiupɨ aume auche ñana aiñanainti tato naki esache axɨmanu pox, axtɨ tixhanx ɨtobi, axtɨ kɨmuintya tobixh, axtɨ tɨpuru po'ox o tansɨrapae.

³⁶ Tapɨ autabɨka uiti aupanuka.

³⁷ Axɨna sukanañɨ aume, sukanañɨntyo ɨmo namanaiña: ¡Taikiana amastaikiatɨ nuxia tapɨ aupanuka!”