San Lucas 8 - Manityanati Tupax

Axɨba paɨka amonkio ichepeti Jesús ɨmo yachɨkoiti

¹ Yopɨrɨkɨ nanaiña axɨna sane, sɨrotitɨ Jesús au nanaiña axɨmanio tube, urapoiti axɨna uxia nɨriakaxti Tupax. Axɨmanuma doce nesaxti apóstoles amonkoma ichepeti,

² amonkioityo ichepeti axɨmanio paɨka uxia tato ñome uiti axɨba anankati chobores yokɨtɨpɨ takanaityo pikiataka noxokoka. Axɨmanio omenotɨ Mariax, nɨrixh Magdalena, axɨna kɨtɨpɨkiche kaɨburuma siete machoboreka.

³ Anankaityo Kuanax, nikɨpostoti Cuza, naki asaratitɨ yutaku nenaxixhti Herodes. Anankaityo Susana. Sɨrɨmanaintyo pikiataka axɨba opityoximiata ɨmoti axɨna ane oboi.

Chepekanati naki mankɨturu

⁴ Sɨrɨmanama auki axɨmanio tube sɨromatɨ asaramati Jesús, sane naukiche iyoberabaramakɨ sɨrɨmanama. Auki uraboiti sukarɨma axɨna machepekatax:

⁵ “Tamanti ñoñɨnx sɨrotitɨ anti kɨtu axɨna sɨrobo kɨtu uiti. Isiu ñankaxti kɨtu, axɨna sɨrobo kɨtu uiti pakio isiu kutubiux, tyone kaɨma ikɨmotema, auki kuantio nutaumanka ñumate.

⁶ Kiatax pakio omeana kanka. Naukiche ubaɨro, sɨɨbo tyopiki champɨ tux ɨmo.

⁷ Kiatax pakio eana nansaɨbox. Ubaɨro chepe nisunaunx nansaɨbox, axɨmanu nansaɨbox butabuxio uixh.

⁸ Tapɨ kiatax pakio kauta uxia kɨx. Sunau, chama iyebo auki, ane axɨna bachebo cien auki taman.” Sane nanti Jesús, bapatayo nuxia nuraxti: “¡Axɨbama onauma, tari onsaperioma!”

Isane nɨmoche axɨba machepekatax

⁹ Axɨmanuma nesaxti apóstoles ñankitioma pɨnanakiti Jesús isane urapoi axɨmanu machepekatax.

¹⁰ Nanti ɨmoma: “Aume toxio uiti Tupax nauki ausuputario axɨba champɨ tamastai au nɨriakaxti. Tapɨ ɨmo makiataka xhanityaka oboi machepekataka, sane naukiche tai asaramatɨ ta champɨ astaimia, onkoimia champɨ iyebo uimia.

Manunekanati Jesús kɨtɨpɨ machepekatax

¹¹ “Tyone nantɨ axɨna machepekatax: Axɨna sɨrobo kɨtu tyone takana nuraxti Tupax.

¹² Axɨmanu pakio isiu kutubiux takana axɨbama onkoimia axɨba omixhia manityakax, kuatati chobores ikiaɨbutati auki nausasɨxɨma, tapɨ ikokotama sane chɨtaesɨburupɨma eanaki nomɨnantɨ.

¹³ Axɨmanio sɨrobo kɨtu bupakio omeana kanka takana axɨbama onkoimia axɨba omixhia manityakax yasutiuma aɨbu nipukɨnunkuxɨma, champɨ nixhanakax. Ikokotama mantukubatai naneneka, axtɨ ane makokotox ɨmoma iñokotama.

¹⁴ Axɨmanu sɨrobo kɨtu pakio eana nansaɨbox takana axɨbama onkoimia, taikiana simia iñokotama ityopiki taruku ñakionkoxɨma yubapa chɨtamampatai, nenaxixhimia takana nipukɨnunkuxɨma au nisɨborikixhimia, sane naukiche champɨ uxia isamutema.

¹⁵ Tapɨ axɨmanu sɨrobo kɨtu pakio au axɨna uxia kɨx, tyonema axɨbama uxia nausasɨxɨma xhanxɨma onkoimia isamutema isiuki axɨba omixhia manityakax, sɨsioma aɨbu ñakokonaunkuxɨma, isamutema axɨba omixhia.

Chepekana basarux

¹⁶ “Champɨti iñonokotati basarux nauki aityamuxikiati o aiñanti kiana nikɨruxti, ta iñatati ape, nauki anentax ɨmo axɨbama sɨromatɨpo.

¹⁷ Saneityo, champɨ anekana nauki chɨtusiupɨ kauta nakax, champɨityo axɨna chɨtusiankanapɨ chisɨropɨ ñana au nanentax.

¹⁸ “Sanente, amonsapesio nuxia, axti naki ane nenaxixhti toxioki uɨbo ɨmoti. Tapɨti naki champɨ nenaxixhti, axɨna nenaxixhti au ñakionkoxti nanaiña kaɨburu pɨnanakiti.”

Axɨbama yarukityoxti Jesús ichepe nipiakɨtoti

¹⁹ Nipiakɨtoti ichepe axɨbama yarukityoxti iñataimia kauta anankati Jesús, chiñataipɨma esati ityopiki sɨrɨmanamampae tyupekuti.

²⁰ Tamanti urapoiti isukarɨti Jesús: –Napakɨma ichepe axɨbama arukityaiki aboma tyɨrɨpo, xhanxɨma asaramakɨ.

²¹ Axti aiñumuti: –Axɨbama onkoimia axɨba omixhia nuraxti Tupax iñatama nisɨborikixhimia isiuki, tyonema axɨbama isarukityaiki ichepe nipiakɨ.

Tochenko yarusɨrɨx makiɨtɨx uiti Jesús

²² Taman nanenes, axti Jesús sɨroti au taman canoa aɨbu axɨbama nesaxti apóstoles, nanti ɨmoma: –Kuri ta'a tyopɨ axɨna narubaityu tux. Auki, sɨromatɨ,

²³ naukiche ityompɨkatama axɨmanu narubaityu tux, axti Jesús manumuti. Auki kaɨma kuatɨ yarusɨrɨx makiɨtɨx onɨ axɨmanu tux, axɨmanu canoa sɨro tux a'u tɨniyɨkɨx ubaka.

²⁴ Auki aisɨtopɨnanamati Jesús, namatɨ ɨmoti: –¡Maestro! ¡Maestro! ¡Tɨsaiyapae uyubaka! Auki atɨraiti Jesús aikuansomokoti makiɨtɨx ichepe tux, auki nanaiña tochenko champɨ pokoro.

²⁵ Auki nanti ɨmo axɨmanuma nesaxti apóstoles: –¿Kausane ui napakokonaunku? Tapɨ axɨma, kɨtobɨsoma aɨbu nixhukuxɨma, ñankitioma pɨnanakimiantoe: –¿Isanempɨ nakaxti naki, bakɨpuruti ɨmo makiɨtɨx ɨmo tux, opikokota yakɨpukuxti?

Uxiankati tato taman ñoñɨnx auki Gerasa

²⁶ Iñataimia au axɨmanu kɨx Gerasa, ane tyopɨ axɨmanu narubaityu tux, kutakikibo Galilea.

²⁷ Naukiche sɨroti akɨ Jesús, kuatati kɨmenuti tamanti ñoñɨnx auki axɨmanu tube anati chobores kɨtɨpɨti, sɨrotitɨ esati. Tɨkoboi chiñatatipɨ naibixhti kɨtɨpɨti chɨpo'osotipityo au pox, po'osoti eana nikɨ makoiñoka.

²⁸ Naukiche asaratitɨ ɨmoti Jesús, bachesoiyoti esati, aɨbu nityosibixhti: –¡Tapɨ asikia suatañɨ, Jesús, Aɨtoxti Tupax auki ape! ¡Asamu nuxia iñemo tapɨ ichakisɨrɨka obi!

²⁹ Nanti sane maniki chobores tyopiki tɨnanti Jesús ɨmoti nauki aɨrotitɨ kɨtɨpɨkiti. Yacheataxti maniki chobores aɨroti kɨtɨpɨti. Axɨbama makiataka ityomoentama ne'esti yochepe nipopesti ui karenax tapɨ taesɨburuti, botopɨro uiti axti maniki chobores besɨburuti aɨbuti kauta champɨ sɨborikixh.

³⁰ Ñankitioti Jesús pɨnanakiti: –¿Isane nɨri? Aiñumuti nuraxti: –Axɨñɨ nisɨri Legión. Nanti sane ityopiki sɨrɨmanama machoboreka aboma kɨtɨpɨti,

³¹ axɨma kaɨma ñankitioma pɨnanakiti Jesús tapɨ bakɨpuruti ɨmoma au axɨmanu kauta taruku tomikianene.

³² Akamanu amonkio sɨrɨmana nupaucheka bubaso onɨ axɨmanu yirityux, axɨmanuma machoboreka ñankitioma pɨnanakiti asamuti nuxia chebo uiti aɨroma yokɨtɨpɨ. Axti Jesús chebo uiti ɨmoma.

³³ Aukimanu ikiaɨburumakɨ machoboreka kɨtɨpɨkiti maniki ñoñɨnx sɨroma yokɨtɨpɨ nupaucheka, aukimanu opipiakɨnaño kɨmama opiñatai au tux, akamanu mokoiño.

³⁴ Axɨmanuma asaramatɨ yutaku nupaucheka, naukiche astaimia axɨna sane, besɨburuma aukimanu sɨromatɨ uraboimia sukarɨ namanaiña au tube.

³⁵ Axɨmanuma po'oso yebomatɨ asaborimia axɨmanu sane. Naukiche iñataimia kauta anankati Jesús, tabɨkoti uimia tɨmonsoti yobesa nipopesti axti maniki ñoñɨnx amonkoma machoboreka kɨtɨpɨti, ane naibixhti kɨtɨpɨti champɨ kausane ɨmoti. Auki bixhubuma.

³⁶ Axɨmanuma astaimia axɨna sane, urapoimia sukarɨ makiataka kausane uxiankati tato maniki amonkoma machoboreka kɨtɨpɨti.

³⁷ Namanaiña axɨmanuma po'oso auki Gerasa namatɨ ɨmoti Jesús asamuti nuxia tari yɨrakatitɨ aukimanu, ityopiki taruku nixhukuxɨma. Sane naukiche sɨroti Jesús au canoa auki sɨrotitɨ.

³⁸ Tapɨti maniki ñoñɨnx kɨtɨpɨkiche kaɨburuma machoboreka nanti ɨmoti asamuti nuxia tari chebo uiti aɨrotitɨ isiuti, tapɨti Jesús bakɨpuruti ɨmoti tari sɨsioti, nantityo ɨmoti:

³⁹ –Akosi tato au napo urasoi nanaiña axɨna uxia yachɨkoiti Tupax atakukɨ. Axti maniki ñoñɨnx sɨrotitɨ tato uraboiti au tube axɨna yachɨkoiti Jesús tyakuti.

Taman paɨx maunxokono ichepe nityakiumukutuxti Jairo

⁴⁰ Naukiche basɨkɨbɨkoti tato Jesús tyopɨ axɨmanu narubaityu tux, axɨmanuma po'oso yasuriurumati aɨbu nipukɨnunkuxɨma, ityopiki namanaiña amonkoma tochenkoma kɨmenuti.

⁴¹ Auki iñataiti tamanti ñoñɨnx nɨrixhti Jairo, yɨriabuxti au sinagoga. Axti maniki ñoñɨnx bachesoiyoti esati Jesús nanti ɨmoti asamuti nuxia aɨrotitɨ au nipoxti,

⁴² ityopiki kunauntañantai nityakiumukutuxti, abe doce naskɨbeka ɨmo, tɨsaimia nikonkox. Isiu niyɨkɨxti Jesús, onkisioti isimianamati axɨmanuma taruku nububikixhimia sɨromatɨ isiuti.

⁴³ Akamanu axɨpekuma ananka taman paɨx maunxokono, tɨtabe doce naskɨbeka narapaka notox kɨtɨpɨki, takɨrusu nanaiña nenaxixh ui niyɨkɨx esa axɨbama ipiakama akurama, champɨti uiche uxia tato ɨmo.

⁴⁴ Axɨmanu paɨx sɨrotɨ esati Jesús chakukiti auki aiñe nabeu naibixhti, isiukai tochenko axɨmanu narapaka notox kɨtɨpɨki.

⁴⁵ Auki ñankitioti Jesús: –¿Ñakuti naki iñenotiñɨ? Tyopiki champɨti xhanx uraboiti ñakuti iñenoti, nanti Peru: –Maestro, namanaiñantai isimianamakɨ ipenenomakɨtyo auki nanaiñantai. Axɨkɨ kaɨma ankitio, ¿ñakuti naki iñenotiñɨ?

⁴⁶ Tapɨti Jesús xhanxtiapae atusi ɨmoti: –Anati naki iñenotiñɨ, ityopiki ñonkisio sɨrotɨ sɨtɨpɨkiñɨ axɨna ane sobi.

⁴⁷ Axɨmanu paɨx, naukiche astai champɨ kauta aiñanekanɨ, sɨrotɨ aɨbu nipiaichokonokox achesoi esati Jesús. Urapoi sukarɨti namanaiña isane ityopikiche aiñenoti, ityopiki uxia tato ɨmo naukiche iñenoti.

⁴⁸ Nanti Jesús ɨmo: –Nichakiumuku, ui axɨna nakokonaunku uxia tato aemo. Akosi tato taikiana uxia aemo.

⁴⁹ Anankatiki Jesús manityanati, aiñanainti taman uraboiti sukarɨti maniki yɨriabux au sinagoga: –Natakiumuku tɨkoiño. Tapɨ asikiaiki kuatati Maestro.

⁵⁰ Ontañanti Jesús nanti ɨmoti: –Tapɨ aixhuka. Akokonau, sane natakiumuku sɨboriko tato.

⁵¹ Naukiche aiñanainti au pox, chichebopɨ uiti aɨromatɨpo ichepeti axtiatai Peru, Santiago, axtityo Kuan, ichepeti iyupux aɨbu nipiapax axɨmanu kupikimia.

⁵² Namanaiña amonkoma areoroma ui nisuchekixhimia tyaku, tapɨti Jesús nanti ɨmoma: –Tapɨ abareoka. Axɨna kupikimia chɨkoiñopɨ, ane manumu.

⁵³ Namanaiña iyabomati, ityopiki tusiu ɨmoma ta tɨkoiño.

⁵⁴ Auki axti Jesús iñentati ne'es nanti bapatayo nuxia nuraxti: –¡Kupikimia, atɨsai!

⁵⁵ Auki tyone sɨboriko tato. Isiukai atɨrai, bakɨpuruti Jesús nauki asapanema.

⁵⁶ Axti yupux ichepe nipiapax sɨsioma aɨbu nikɨtobɨxɨma. Nanti Jesús ɨmoma tapɨ urapoimia sukarɨ makiataka axɨna uxiante sane.