San Lucas 22 - Manityanati Tupax

Bapacheroma nikiubuma aityabairomati Jesús

¹ Tɨsaimia axɨmanu pukɨnunkux auche ñana basoma pan champɨ levadura eana, axɨmanu pukɨnunkux nɨrixh Paxkua.

² Axɨmanuma ɨriatu axɨbama sacerdotes ichepe axɨmanuma manunekanama bakɨpukux uiti Moisés, bixhubuma ñɨnana makiataka, bapacheroma nikiubuma kausane aityabairomati Jesús.

³ Auki axti chobores sɨroti au nausasɨxti Judas, tamanti axɨpekukimia axɨmanuma doce nesaxti apóstoles, axti naki nɨrixhti uimia Iscariote.

⁴ Axti naki yebotitɨ apariti aɨbuma axɨmanuma ɨriatu axɨbama sacerdotes ichepe axɨbama mayɨriabuka auki nipo meankax, manityanati aɨbuma kausane nauki atoxiti Jesús uiti ɨmoma.

⁵ Axɨma taruku nipukɨnunkuxɨma auki namatɨ toxio monixh ñana ɨmoti Judas.

⁶ Axti uxia ɨmoti auki bapacheroti nikiubuti, kauta atabɨti uiti tamanti, nauki aityoximianati Jesús ɨmoma.

Tyakɨrux basoti Yɨriabux

⁷ Iñatai axɨmanu nanenes ɨmo pukɨnunkux axɨna ɨmoche basoma pan champɨ levadura eana, auche batabayoma nobixhax ɨmo Paxkua.

⁸ Bakɨpuruti Jesús ɨmoti Peru ichepeti Kuan, nanti sane: –Amekosi apisamune axɨna umatamoebo ɨmo axɨna Paxkua.

⁹ Axɨma ñankitioma pɨnanakiti: –¿Kauta axianka sopikoñoko?

¹⁰ Aiñumuti Jesús nuraxɨma: –Axtɨ apiñatai au axɨmanio poka, apikuñukati taman ñoñɨnx ane bausɨx ompakɨti ataso ui tux. Amekosi isiuti chepe axtɨ sɨrotitɨpo au taman pox,

¹¹ amukanaño ɨmoti maniki po'oso: ‘Axti Maestro ñankitioti: ¿Ñakusane axɨmanu pox kauta ixha ichepe axɨbama niyesa apóstoles axɨna Paxkua?’

¹² Axti ityusiankatati ausukarɨ taman pox sɨrɨmanax ape chauki tɨkoñokono ɨmo nubaka. Akamanu apikoñoko nanaiña.

¹³ Axɨma sɨromatɨ tabɨko uimia nanaiña takana nuraxti Jesús ɨmoma, akamanu mapemanama tuburiboma ɨmo axɨmanu Paxkua.

¹⁴ Naukiche tɨkoñokono nanaiña, axti Jesús ichepe axɨbama nesaxti apóstoles tɨmonsoma nauki a'ama.

¹⁵ Nanti Jesús ɨmoma: –¡Chaɨbopɨ nixhanka isamune auchepe axɨna tyakɨrux nubaka ɨmo axɨna Paxkua kɨmenu nisonko!

¹⁶ Tyopiki sukanañɨ aume chanantopɨ isamune tato ichepe axtɨ iñatai nɨriakaxti Tupax.

¹⁷ Auki aikianti mekuti taman taropes, achampienkati ɨmoti Tupax, nanti: –Apasusiu axɨna apityoximia aumeampatoe.

¹⁸ Tyopiki sukanañɨ aume, chanantopɨ icha'a tato nityɨpo axɨbama ikuki axɨna kɨx, ichepe axtɨ iñatai nɨriakaxti Tupax.

¹⁹ Auki aikianti axɨmanu pan mekuti, achampienkati ɨmoti Tupax, aichepesɨnati auki aityoximiati ɨmoma, nanti: –Axɨna tyone nisɨtɨpɨ, toxiobo ɨmo nikonkox autaku. Apisamuse axɨna sane au nisɨri.

²⁰ Saneityo uiti aɨbu axɨmanu taropes naukiche tichauki niyakaxɨma, nanti: –Axɨna taropes tyone axɨna ñemanauntu aɨbo tratox ui noto nisɨtɨpɨ arapara autaku.

²¹ Ne'esti naki uiche aityoximianañɨ ane auna, ichepe niñee.

²² Axti naki Aɨtoxti ñoñɨnx sɨrotitɨki isiu axɨmanu kutubiux samamekana ɨmoti, ¡takisɨrɨtiatai ñana axti naki uiche aityoximianati!

²³ Auki kaɨma ñankitioma pɨnanakimiantoe ñakutipɨ axti naki uiche aityoximianati.

¿Ñakuti naki taruku nɨriakaxti?

²⁴ Axɨmanuma nesaxti apóstoles amonkoma baparioma aɨbumantoe ñakutipɨ naki taruku nɨriakaxti axɨpekukimia.

²⁵ Auki nanti Jesús ɨmoma: “Axɨpekukimia axɨbama chikokoromatipɨ Tupax. Axɨbama mayɨriabuka isamutema isiu nixhankaxɨma aɨbu axɨbama champɨti okɨmana tyakuma, tapɨ ɨmo axɨbama makiataka yɨriabuka toxio ɨriboma axɨbama uxia yachɨkoimia.

²⁶ Axaño tapɨ apisamute isiukimia. Chɨsanempɨ, axti naki taruku nɨriakaxti abaxɨpekuki tari aisamunenti takanati naki yaɨxtiki nuxia, naki bakɨpuruti tari aisamunenti takanati naki baserebioti ɨmoti kiatax.

²⁷ ¿Ñakuti naki taruku nɨriakaxti, taki naki tɨmonsoti nauki a'ati, o axti naki baserebio? ¿Ensapɨ chɨtɨpɨti naki tɨmonsoti a'ati? Tapɨ axɨñɨ yaka auna abaxɨpeku takanati naki baserebio.

²⁸ “Axaño amonkañoantai ichepeñɨ ñome makokotoka iñemo.

²⁹ Sane naukiche, ityoximiata aume yarusɨrɨx nɨriakax, takana axɨñɨ toxio iñemo uiti Iyaɨ,

³⁰ axaño ñana aubaka auchakaityo ichepeñɨ kauta naka nisɨriaka, akamanu autɨmoka iku nityɨmo mayɨriabuka nauki amasarai ɨmoma axɨbama doce aɨtoxti Israel.”

Urapoiti Jesús axti Peru chisuputaratipɨ

³¹ Nantityo Yɨriabux: –Simón, Simón, axti chobores ñankitioti nauki aikɨtobiroti año takana yachɨkoiti ɨmo trigo.

³² Tapɨ axɨñɨ xhankikia atakukɨ, tapɨ takɨrusu apɨnanakikɨ nakokonaunku. Axtɨ axɨkɨ, ayekatɨ tato yesañɨ, aserebi ɨmo axɨbama arukityaiki nauki tapɨ tapenekoma.

³³ Nanti Simón ɨmoti: –Axɨkɨ Yɨriabux, yɨkatɨ tanu achepekɨ axtɨ iñamanamakɨpo, champɨ nɨmoche sobi axtɨ isonka achepekɨ.

³⁴ Aiñumuti Jesús nuraxti: –Axɨkɨ Peru, suraboira asukarɨkɨ kaɨma, kɨmenu nipuku po'ox, trex urapakai ta chasuputakapɨñɨ.

Tɨsaimia makokotox

³⁵ Auki ñankitioti Jesús pɨnanakimia: –Naukiche ikɨpukaño champɨ sɨrotɨ aboi monixh champɨ amutuburibo champɨityo naupopetaki, ¿isane amemakiyau? Axɨma aiñumuma: –Champɨ.

³⁶ Auki nanti ɨmoma: –Tapɨ kaɨma, axti naki ane nimonixhti, tari aikianti tauna, axɨnaintyo amutuburibo. Tapɨti naki champɨ nikɨsesti, tari aipiabentekati nikɨbuxixhti, nauki aye taman uiti.

³⁷ Tyopiki sukanañɨ aume, omixhankio ñana saɨbuñɨ axɨba nantɨ iku Nikorox: ‘Pakɨmunkunutityo axɨpekuma axɨbama chuxiampɨ nisɨborikixhimia.’ Nanaiña axɨna ane korobo sɨtɨpɨñɨ, ta omixhankio ñana.

³⁸ Axɨma namatɨ: –Axɨkɨ Yɨriabux, auna abe tox kɨseka. Axti aiñumuti: –Chauki numanityaka.

Meaboti Jesús au Getsemaní

³⁹ Auki sɨrotitɨ Jesús, takana axɨna yacheataxti, sɨrotitɨ onɨ axɨmanu yirityux Olivos. Axɨmanuma nesaxti apóstoles sɨromatɨ ichepeti.

⁴⁰ Naukiche tiñataimia axɨmanu kauta, nanti ɨmoma: –Amea, tapɨ autapeneka au makokotox.

⁴¹ Sɨrotitɨ iche'eña pɨnanakimia takana nicheki axtɨ baruka taman kanx, akamanu bachesoiyoti nauki eanti.

⁴² Nanti: “Iyaɨ, axtɨ axianka, tapɨ ichabauta axɨna ichɨpoboñɨ pichananene. Tapɨ uxiante isiuki nixhanka, tari uxiante isiuki naxianka.”

⁴³ Akamanu iñataiti tamanti ángel auki napes esati, nauki acheti narukux ɨmoti.

⁴⁴ Eana taruku nityakisɨrɨkɨxti Jesús, taruku neankaxti, axɨna numuɨnkɨx ɨmoti xɨkio akɨ takana notox.

⁴⁵ Naukiche atɨraiti auki neankaxti, sɨrotitɨ kauta amonkoma axɨmanuma nesaxti apóstoles, tabɨkoma uiti manumuma, ui nisuchekixhimia.

⁴⁶ Nanti ɨmoma: –¿Kausane aumpanu? Apatɨsai amea, nauki tapɨ autapeneka ui makokotox.

Enoti Jesús uimia

⁴⁷ Anankatiki manityanati Jesús, naukiche iñataimia sɨrɨmanama. Axti maniki nɨrixhti Judas, tamanti axɨpekuki axɨmanuma doce nesaxti apóstoles, kusɨrɨboti aɨbuma. Sɨrotitɨ esati Jesús aiñanti naruxti isuti,

⁴⁸ tapɨti Jesús nanti ɨmoti: –Axɨkɨ Judas, ¿ui axɨna sane aisamute aityoximiakati Aɨtoxti ñoñɨnx?

⁴⁹ Axɨmanuma amonkoma ichepeti Jesús, naukiche astaimia axɨna sane, ñankitioma pɨnanakiti: –Yɨriabux, ¿supaira ɨmoma yupu kɨseka?

⁵⁰ Tamanti axɨpekukimia obɨrio uiti ɨmoti maniki ikumanakataxti yɨriabux sacerdote, iyokitati nepanaunku numasuxti.

⁵¹ Nanti Jesús: –Asioma sane. Akamanuantai. Aiñenti numasuxti maniki kumanakax, uxiankati tato uiti.

⁵² Auki nanti Jesús ɨmo axɨmanuma ɨriatu axɨbama sacerdotes, ɨmo axɨmanuma masortaboka auki nipo meankax ɨmo axɨmanumaintyo mayɨriabuka, axɨbama kuamatɨ iyoti: –¿Kausane abekatɨ yupu kɨseka yupu soeka, takana axtɨ yatabayoxɨñɨ?

⁵³ Naneneka anankañɨ auchepe au nipo meankax, champɨti iñenotiñɨ. Tyone mapakɨmunkutux aume, tyone mapakɨmunkutux ɨmo axɨna taruku nityomikianenekixh.

Nanti Peru ta chisuputaratipɨ Jesús

⁵⁴ Auki iñenomati Jesús sɨrotitɨ uimia au nipoxti yɨriabux sacerdote. Sɨrotitɨ Peru isiuti auki icheatai.

⁵⁵ Akamanu, kɨmuintya nusuara maunximianama pes, tɨmonsoma ityupeku. Axtityo Peru tɨmonsoti axɨpekuma.

⁵⁶ Aukimanu, taman kumanakax, naukiche asaratɨ ɨmoti tɨmonsoti esa pes, sɨsio astayotɨ ɨmoti auki nantɨ: –Axɨnaintyo ananka ichepe.

⁵⁷ Tapɨti Peru nanti ta chisuputaratipɨ, nanti: –Axɨkɨ paɨx, axɨñɨ chisuputakatipɨ.

⁵⁸ Koboi pariu, anati kiatax asaratitɨ ɨmoti nanti: –Axɨkɨtyo anankɨ chepema. Aiñumuti Peru: –Champɨ, naki, chɨtɨpɨ axɨñɨ.

⁵⁹ Taman horax pɨrɨkɨ, tamanti kiatax yachɨroti tatityo: –Axti naki anankatityo ichepeti. Tyopiki kuatati auki Galilea.

⁶⁰ Nanti Peru: –Axɨñɨ, chɨtusiupɨ iñemo isane axɨna ukanɨ. Isiukai, naukiche anankatiki baparioti Peru, puru taman po'ox.

⁶¹ Auki basɨkɨbɨkoti tato Yɨriabux asaratitɨ ɨmoti Peru, akamanu akionotiyɨ Peru axɨmanu nanti Yɨriabux ɨmoti: “Kaɨma, kɨmenu nipuku po'ox, trex urapakai ta chasuputakapɨñɨ.”

⁶² Auki sɨrotitɨ Peru aukimanu tarukapae nareoxti.

Unumati Jesús

⁶³ Axɨmanuma mañoñɨnka asaramatɨ tyakuti Jesús unumati okɨsioma ɨmoti.

⁶⁴ Ityamuxiankatama nisɨtoxti, ñankitioma pɨnanakiti: –¡Tusio aemo ñakuti naki okɨsioti aemo!

⁶⁵ Unumati oboi axɨba chɨtamampɨ nuraxɨma kɨtɨpɨti.

Axti Jesús anati kutakikibo mayɨriabuka

⁶⁶ Naukiche tɨtaneneka, iyoberabaramakɨ axɨbama mayɨriabuka axɨpekukimia axɨbama judíos, axɨbama ɨriatu axɨbama sacerdotes ichepe axɨbama manunekanama bakɨpukux uiti Moisés, auki aikianamati esa mayɨriabuka. Akamanu ñankitioma pɨnanakiti:

⁶⁷ –Urasoi suisukarɨ, ¿axɨkɨ tyonenti Mesías? Aiñumuti nuraxɨma: –Axtɨ sukanañɨ aume axɨñɨ, chapikokotapɨ.

⁶⁸ Axtɨ ane xhankitio amopɨnanaki, chapiñumutapɨ nisura.

⁶⁹ Aukina kaɨma axti Aɨtoxti ñoñɨnx tɨmonsoti ñana au nepanaunkuxti Bae Tupax.

⁷⁰ Auki namanaiña ñankitioma pɨnanakiti: –¿Axɨkɨ tyonenti Aɨtoxti Tupax? Aiñumuti Jesús nuraxɨma: –Axañoantoe amukanaño ta axɨñɨ.

⁷¹ Auki axɨma namatɨ: –¿Champɨki nɨmoche osoi axɨbama sukarɨche nanti sane? Namanaiña axɨbama usaka auna oñonkoi aikitiatoe.