San Lucas 15 - Manityanati Tupax

Machepekatax nobixhama ensoro

¹ Namanaiña axɨbama bakaɨburuma monixh ɨmo Roma ichepe axɨbama makiataka chuxiampɨ nisɨborikixhimia sɨromatɨ esati Jesús, nauki onsaperioma nuraxti.

² Tapɨ axɨmanuma fariseos ichepe axɨbama manunekana bakɨpukux uiti Moisés ɨnantɨ ɨmoma tyopiki axɨna sane yachɨkoiti, namatɨ: –Axti naki uxia uiti ɨmo axɨbama chuxiampɨ nisɨborikixhimia basoti aɨbuma.

³ Auki nanti Jesús ɨmoma axɨna machepekatax:

⁴ “¿Ñakuti abaxɨpekuki, naki abe cien niyabuxti nobixhaka ensoro taman pɨnanakiti omeanaki, ensapɨ chomonkonopɨ uiti axɨmanio pikiataka noventa y nueve au xhoens nauki aɨrotitɨ apacherioti axɨmanu nobixhax ensoro, chepe nityabɨkɨx?

⁵ Axtɨ tabɨko uiti, pukɨnuñati kuata iñatati ompakɨti,

⁶ axtɨ iñataiti tato au nipoxti esa axɨbama tyurapataxti axɨbamaintyo iposapataxti, nanti ɨmoma: ‘Aupukɨnu ichepeñɨ, ityopiki tabɨko tato sobi niyabu nobixhama axɨna ensoro xhopɨnanakiñɨ.’

⁷ Sukanañɨ aume saneityo taruku pukɨnunkux au napes ityopikiti naki taman chuxiampɨ nisɨborikixhti axtɨ iñokotati nomɨnantɨ pɨnanaki axɨmanuma noventa y nueve uxia nisɨborikixhimia axɨbama champɨ nɨmoche asɨkɨbɨma tato.

Machepekatax taman paɨx ensoro nimonixh

⁸ “Kiatax machepekatax, ¿kausane ui taman paɨx umaɨburu uixh diez monikia axtɨ ensoro taman pɨnanaki, iñonokota basarux masunukunu aukipo masamuña yapachetio ichepe nityabɨkɨx uixh?

⁹ Axtɨ tɨtabɨko uixh, ityasuriu niposapax, nantɨ ñome: ‘Aupukɨnu ichepeñɨ, ityopiki tɨtabɨko sobi axɨna monixh ensoro xhopɨnanakiñɨ.’

¹⁰ Sukanañɨntyo aume sane nipukɨnunkuxɨma axɨbama ángeles esati Tupax ityopikiti naki taman chuxiampɨ nisɨborikixhti axtɨ basɨkɨbɨkoti tato esati.”

Machepekatax tabɨkoti tato yaɨx

¹¹ Urapoitityo Jesús axɨna sane: “Tamanti ñoñɨnx aboma toxɨma aɨtoxti,

¹² axti maniki yaɨxtiki nuxia nanti ɨmoti yaɨtoti: ‘Iyaɨ, aityoximia iñemo nenaxi axɨna toxiobo iñemo.’ Auki chepesɨro uiti yaɨtoti nenaxixhti ɨmoma.

¹³ Yopɨrɨkɨ mantukubatai nananeka axti maniki aɨtoxti yaɨxtiki nuxia pabenteo uiti nanaiña axɨmanu toxio ɨmoti enaxiboti, aɨbu axɨmanu nikuax sɨrotitɨ iche, au kiatax kɨx, akamanu nanaiña takɨrusu pɨnanakiti ui axɨna chuxiampɨ nisɨborikixhti.

¹⁴ Naukiche tɨtakɨrusu nanaiña uiti, ane yarusɨrɨx kɨrɨpɨx au axɨmanu kɨx, auki kaɨma kuatɨ ɨmoti taruku nikɨrɨpɨxti.

¹⁵ Yebotitɨ ankiti yachɨkoboiboti esati maniki taman po'oso auki axɨmanu kɨx, axti aikɨpuruti asaratitɨ yutaku niyabuxti nupaucheka au niyoxti.

¹⁶ Taruku nikɨrɨpɨxti takana xhanxti anenti niyubarata axɨmanio nupaucheka, ta champɨti ityoximiatati ɨmoti.

¹⁷ Au nityakɨrux kuatɨ au ñakionkoxti: ‘¡Au nipoxti iyaɨ sɨrɨmanama axɨbama ikumanakataxti ane kɨtɨpɨx utuburiboma, tapɨ axɨñɨ auna tɨsaimia nisonko ui nisɨrɨpɨ!

¹⁸ Yasɨkɨbɨra tato au nipoxti iyaɨ, nauki sukanañɨ ɨmoti: Iyaɨ, ane nipɨnate ɨmoti Tupax anentyo nipɨnate aemo.

¹⁹ Chauki chɨkoñopɨtɨki iñemo sukanañɨ aemo iyaɨkɨ. Aiña iñemo takana ɨmo axɨbama aesa kumanakax.’

²⁰ Aukimanu mapesɨnakanati tato iyo nipoxti yaɨtoti. “Naukiche icheki nakaxti, asaratitɨ yaɨtoti kɨmenuti taruku nipukɨruxti tyakuti. Auki aipiakɨnotiyɨ kɨmenuti, aityañumenoti aɨbu nikuaxti ɨmoti.

²¹ Nanti maniki aɨtoxti ɨmoti: ‘Iyaɨ, ane nipɨnate aɨbuti Tupax takanaintyo aɨbukɨ. Chɨkoñopɨtɨki iñemo sukanañɨ aemo iyaɨ.’

²² Tapɨti yaɨtoti bakɨpuruti ɨmo axɨmanuma ikumanakataxti: ‘Apikiasio tauna axɨba omixhia aibiboti apiñasio kɨtɨpɨti. Apiñaintyo isorotikiaboti apiña ipopetakiboti.

²³ Apikia tauna axɨna baɨro nuxia naɨmosimia apityabai. ¡Masamuna yarusɨrɨx pukɨnunkux!

²⁴ Tyopiki axti naki isaɨ anankati koiñoti axɨna kaɨma sɨborikoti tato. Ensoroti oñopɨnanaki tapɨ kaɨma tabɨkoti tato osoi.’ Auki iñatama nipukɨnunkuxɨma.

²⁵ “Tapɨti maniki, yarusɨrɨx aɨtoxti anankati au ñanaunx. Naukiche tɨkuatati tato tɨtanati saimia pox, onkoiti axɨmanu pukɨnunkux ichepe tokokox.

²⁶ Aityasuruti taman kumanakax ankirioti pɨnanakiti isane axɨna sane.

²⁷ Nanti maniki kumanakax ɨmoti: ‘Tusiu aemo axti aruki iñataiti tato. Tapɨti aɨma bakɨpuruti atabaimia taman naɨmosimia baɨro nuxia, tyopiki tabɨkoti tato uxia ɨmoti sɨborikotiki.’

²⁸ Taruku nityɨborixhti maniki yarusɨrɨx yarukityoxti, chixhanxtipɨ aɨrotitɨpo, sane naukiche sɨrotitɨ yaɨtoti nanti ɨmoti asamuti nuxia aɨrotitɨpo.

²⁹ Nanti ɨmoti yaɨtoti: ‘Axɨkɨ tusiu aemo mantukubu naskɨbeka niyaserebiki aemo, champɨ auche chixhakokonaunkapɨ aemo, kautapɨ takumanaka iñemo tamantai nukaurama nauki ipukɨnu aɨbu axɨbama ichurapataiki.

³⁰ Tapɨ kaɨma, iñataiti tato maniki aaɨ, naki uiche atakɨru namoni yupu paɨka, atabaikia ɨmoti taman naɨmosimia axɨna baɨro nuxia.’

³¹ “Aiñumuti yaɨtoti: ‘Isaɨ, axɨkɨ taikiana aka auna ichepeñɨ, nanaiña axɨna niñenaxi tyoneintyo nenaxi.

³² Koñotɨ basapa upukɨnu, tyopiki axti aruki, tɨkoiñoti, sɨborikoti tato. Ensoroti oñopɨnanaki tabɨkoti tato osoi.’ ”