San Lucas 13 - Manityanati Tupax

Axtɨ uiñoxonkoka oñɨ

¹ Au axɨmanio naneneka aboma axɨbama yebomatɨ asaramati Jesús, urapoimia isukarɨti axti Pilato korauru uiti notoxɨma axɨmanuma mañoñɨnka auki Galilea eana noto axɨmanio numukianka axɨba mokoiño uimia ɨmo ñakumanataxɨma ɨmoti Tupax.

² Nanti Jesús ɨmoma: “¿Au napakionko axɨna sane sɨro ɨmo axɨmanuma mañoñɨnka auki Galilea ityopiki axɨma taruku nomɨnantɨ uimia pɨnanaki axɨmanuma makiataka auki nikɨxɨma?

³ Sukanañɨ aume ta chɨsanempɨ. Axtɨ chapiñokotapɨ nomɨnantɨ nauki abetato esati Tupax, aukonkaityo.

⁴ ¿Au napakionko axɨmanuma dieciocho koiñoma naukiche taɨbɨko onɨma axɨmanu petaisɨrɨ pox au Siloé sɨrɨmana nomɨnantɨ uimia pɨnanaki axɨmanuma makiataka po'osoma au Jerusalén?

⁵ Sukanañɨ aume chɨsanempɨ. Axtɨ axañointyo chabekapɨtɨ tato esati Tupax, aukonkaityo.”

Machepekatax soes chɨtaupɨ

⁶ Urapoiti Jesús sukarɨma axɨna machepekatax: “Tamanti ñoñɨnx sɨro kɨtu uiti taman nuyes au niyoxti, yebotitɨ asaraiti axtɨ tɨtau, champɨ tabɨko uiti.

⁷ Nanti ɨmoti maniki asaratitɨ tyaku niyoxti: ‘Tɨtabe, trex naskɨbeka niseki yapache nɨta axɨna soes, champɨ tabɨko sobi. Aityɨsɨna. ¿Champɨ ɨmoche atɨraiyaka au niyo?’

⁸ Tapɨti maniki asaratitɨ tyaku axɨmanu ñanaunx aiñumuti: ‘Yɨriabux, asiosane ɨmo axɨnainki nasɨkɨbeka. Ikɨnkana auna ityupeku iñana axɨna uxia kɨx.

⁹ Axtɨ kuñutui ɨmo ɨtau. Axtɨ champɨ, akamanu kaɨma aityɨsɨnata.’ ”

Bakurarati Jesús ɨmo taman paɨx au sabaru

¹⁰ Taman nanenes sabaru anankati Jesús manunekanati au sinagoga.

¹¹ Ananka akamanu taman paɨx tɨtabe dieciocho naskɨbeka ñaunxokokox. Uiti chobores mameso nichakux, chɨpueruxɨpɨ aipesɨnakanɨ.

¹² Naukiche asaratitɨ Jesús ɨmo, ityasutati nanti ɨmo: –Axɨkɨ paɨx, chauki tiñokonɨ axɨna noxokox aemo.

¹³ Auki iñatati ne'exti onɨ, isiukai axɨmanu paɨx besɨro tato nichakux auki omixhia nurax kɨtɨpɨti Tupax.

¹⁴ Tapɨti maniki yɨriabux ɨmo sinagoga ɨnantɨ ɨmoti, ityopiki axti Jesús bakurarati au axɨmanu nanenes sabaru, nanti ɨmo axɨmanuma amonkoma akamanu: –Abe seixh naneneka nauki uisamune nubachɨkoi. Ausiapata au axɨmanio naneneka nauki uxiankaño tato, tapɨ abekatɨ au axɨna sabaru.

¹⁵ Nanti Yɨriabux ɨmoti: –Axaño axɨbama chapisamutempɨ axɨna amukanaño, ¿ensapɨ chapityakisɨnatapɨ naupabu numukianx au axɨna nanenes sabaru, amenotɨ aɨbu nauki apichama tux?

¹⁶ Axɨna paɨx, nityakɨbaɨtuxti Abraham tyone ananka tomoeno uiti chobores ui axɨna noxokox tɨtabe dieciocho naskɨbeka nakax aɨbu, ¿ensapɨ chuxiampɨ uisokisɨna champɨ nɨmoche au axɨna nanenes sabaru?

¹⁷ Naukiche nanti Jesús axɨna sane, axɨmanuma chuxiampɨ uimia ɨmoti sɨsioma aɨbu nikɨsoxɨma. Tapɨ axɨmanuma makiataka taruku nipukɨnunkuxɨma oboi axɨba omixhankio uiti champɨ tastaimia.

Machepekatax niyo mostaza

¹⁸ Nantityo Jesús: “¿Takanache axɨna nɨriakaxti Tupax aɨbuchepɨ ichepeka?

¹⁹ Takana niyo mostaza sɨrokɨtu uiti taman ñoñɨnx au niyoxti, sunau takana axɨna yarusɨrɨx soes, taruku nisunaunx axɨba nutaumanka kuantio apasoni yokɨtɨpɨ nipiax.”

Machepekatax ɨmo levadura

²⁰ Nantityo Jesús: “¿Aɨbuchepɨ ichepeka nɨriakaxti Tupax?

²¹ Takana levadura axtɨ taman paɨx sɨro uixh eana trex nipesakax tubaxixh nauki aisumainkianɨ uixh.”

Tyurux tunumusiña

²² Isiu niyɨkɨxti au Jerusalén, manunekanati Jesús au nanaiña axɨmanio tube aukiche ikonɨtiyɨ.

²³ Tamanti ñankitioti pɨnanakiti: –Yɨriabux, ¿mɨmanamantai axɨbama taesɨburuma eanaki nomɨnantɨ ñana? Tapɨti aiñumuti:

²⁴ –Apapache nikiubu año kausane nauki ayepo aboi auki axɨmanu tyurux tunumusiña. Tyopiki sukanañɨ aume sɨrɨmanama ñana axɨbama xhanxɨma aɨromatɨpo, chiyebopɨ uimia.

²⁵ Axtɨ atɨraiti naki po'oso aiñamati tyurux, axaño, axɨbama abaka tyɨrɨpo, apabikia amukanaño: ‘Yɨriabux, aiyaɨbu suiñemo.’ Axti kaɨma aiñumuti: ‘Chɨtusiupɨ iñemo aukiche año.’

²⁶ Auki kaɨma amukanaño: ‘Amonko somɨ subaka suichakaityo achepekɨ, axɨkɨ anankɨ anunekaka yusiu suisutubiu.’

²⁷ Tapɨti aiñumuti: ‘Chɨtusiupɨ iñemo aukiche año. ¡Apakicho aukina yesakiñɨ, axɨbama chuxiampɨ nausɨboriki!’

²⁸ Auki kaɨma kuantio nareokox ichepe suchekixh, axtɨ amasakati Abraham, axti Isaac, chepeti Jacob namanañaintyo axɨbama profetas aboma au nɨriakaxti Tupax, tapɨ axaño aupeneka tyɨrɨpo.

²⁹ Tyopiki kuamatɨ ñana auki narɨkɨki makiɨtɨx aukityo mankax, auki tansɨrɨ aukityo nimɨmɨx, nauki atɨmoma a'ama kauta naka nɨriakaxti Tupax.

³⁰ Auki kaɨma axɨbama kosotikimia tyonema ñana axɨbama kusɨrɨboma, tapɨ axɨbama kusɨrɨboma kaɨma tyonema ñana axɨbama sɨroma ɨmo nityakɨrux.

Areoroti Jesús tyaku Jerusalén

³¹ Iñataimiaintyo axɨmanuma fariseos esati Jesús, namatɨ ɨmoti: –Akosi aukina, ityopiki xhanxti Herodes aityabairotiyɨ.

³² Aiñumuti nuraxɨma: –Amekosi aburaboi isukarɨti maniki ñatachemakax: ‘Asasatɨ, kaɨma tyubakaityo ikiaɨbukama machoboreka uxiankama tato sobi axɨbama maunxokono, pɨrɨkɨ tyubaka tyakɨrux.’

³³ Yɨkatɨki kaɨma isiu nisutubiu, tyubaka pɨrɨkɨ tyubaka, tyopiki chɨkoñopɨtɨ akonti taman profeta tyɨrɨpo auki Jerusalén.

³⁴ “¡Jerusalén, Jerusalén, axɨkɨ aityabaikiama axɨbama profetas aityabaikiamaintyo oboi kanka axɨbama bakɨpuruti Tupax aemo! ¡Chaɨbopɨ nixhanka iyoberabarama axɨbama aɨtaiki, takana kuruasɨx iyoberabario naɨbosixh ñokiana nipiax, tapɨ axaño chauxiankapɨ!

³⁵ Amasatɨ, axɨna naupo onkono ñana. Sukanañɨntyo aume chanantopɨ amasarañɨ tato ichepe axtɨ amukanaño ñana: ‘¡Yarusɨrɨxti naki kuatɨ au nɨrixhti Yɨriabux!’ ”