San Juan 9 - Manityanati Tupax

Bakurarati Jesús ɨmoti naki supusu

¹ Naukiche tɨsɨrotitɨ tyɨrɨpo Jesús aukimanu, asaratitɨ isiu kutubiux ɨmoti taman yaɨx naki supusuti aukiapae aɨbo anati iku kɨx.

² Axɨmanuma apóstoles ñankitioma pɨnanakiti: –Maestro, ¿kausane anati iku kɨx naki ñoñɨnx supusuti? ¿Ensapɨ ui axɨna nomɨnantɨ ui axɨbama yaɨtoti, o ui axɨna nomɨnantɨ uixhtiatoe?

³ Aiñumuti Jesús nuraxɨma: –Chiyotopikipɨ nomɨnantɨ ui axɨbama yaɨtoti. Anati iku kɨx sane nauki axaño amasarai uxiankati tato ui nɨriakaxti Tupax.

⁴ Axɨna yakaiki auchepe, uisamunena nubachɨkoi axɨna yakɨpukuxti Tupax naki Iyaɨ. Kuantionki axɨmanio naneneka auche ñana chichebopɨ ane napachɨkoi.

⁵ Axɨna yakaiki iku axɨna kɨx, axɨñɨ basaruxɨñɨ ɨmo namanaiña.

⁶ Isiukai utureuruti Jesús akɨ, uxiante simiantai tauma ui axɨmanu nutureuxti, auki mosemana uiti nisɨtoxti maniki yaɨx.

⁷ Auki nanti ɨmoti: –Akosi atasubi a paurux Siloé (nantɨ sane “Kɨpuruti”). Axti maniki supusu sɨrotitɨ ubaxɨbio uiti nisɨtoxti, naukiche tɨkuatati tato asaratitɨ.

⁸ Axɨmanuma iposapataxti namanaiña axɨbama isuputaramati ta tyonenti maniki mankioti monixh tɨkañe, ñankitioma pɨnanakimiantoe: –¿Chityonentipɨ naki tɨmonsoti nantax ankiti monixh?

⁹ Aboma axɨbama namatɨ: –Unkamo tyonenti. Makiataka namatɨ: –Chityonentipɨ, isiuapae nakaxti. Tapɨ axtiatoe nanti: –Unka axɨñɨ.

¹⁰ Auki ñankitioma pɨnanakiti: –¿Kausane naukiche asakatɨ tato?

¹¹ Axti aiñumuti nuraxɨma: –Axti maniki ñoñɨnx nɨrixhti Jesús uxiante uiti tauma, isematati omonɨ nisɨto, auki nanti iñemo: ‘Akosi esa axɨmanu tux au Siloé akamanu aiyaxɨbisio nasɨto.’ Axɨñɨ yakatɨ, naukiche tu baxɨbio sobi nisɨto auki yasakatɨ tato.

¹² Auki ñankitioma pɨnanakiti. –¿Kauta nakaxti maniki ñoñɨnx? Chɨtusiupɨ iñemo: –Nanti ɨmoma.

Axɨmanuma fariseos ichepeti maniki supusu

¹³ Sɨromatɨ esama axɨmanuma fariseos aɨbuti maniki supusu.

¹⁴ Axɨmanu nanenes tɨkañe ta sabaru naukiche axti Jesús masamunuti tauma auki asaratitɨ tato uiti maniki supusu.

¹⁵ Ñankitioma tatityo pɨnanakiti axɨmanumaintyo fariseos kausane naukiche uxia tato nastaxti. Nanti ɨmoma: –Sɨro uiti tauma au nisɨto, auki iyaxɨbikio, sane yasakatɨ tato.

¹⁶ Aboma axɨbama fariseos namatɨ: –Axti maniki uiche aisamunenti axɨna sane, kanapae chɨtɨpɨ uiti Tupax aikɨpuruti, ityopiki chiñanauntatipɨ axɨna nanenes sabaru. Tapɨ makiataka namatɨ: –¿Kausane axti naki chuxiampɨ nisɨborikixhti aisamunenti axɨba champɨ tu bastai takana axɨba sane? Chichepepɨ ñakionkoxɨma.

¹⁷ Auki ñankitioma tatityo pɨnanakiti maniki supusu tɨkañe: –Axti maniki ñoñɨnx uxia tato nasata uiti, ¿urakɨ sane kɨtɨpɨti? –Axɨñɨ sukanañɨ ta profetati.

¹⁸ Tapɨ axɨmanuma judíos chixhanxɨpɨma aikokoma axtɨ supusuti tɨkañe aukiapae, tapɨ axɨna kaɨma asaratitɨ, sane naukiche maemenkoma iyoti yaɨtoti ichepe nipiakɨtoti

¹⁹ auki ñankitioma pɨnanakimia: –¿Ñemanauntu tyonenti naki aubaɨti? ¿Ñemanauntu anati iku kɨx supusuti? ¿Kausane axɨna kaɨma asaratitɨ?

²⁰ Axɨmanuma yaɨtoti aiñumuma: –Tusio suiñemo tyonenti suisaɨti, anati iku kɨx supusuti.

²¹ Chɨtusiupɨ suiñemo kausane naukiche kaɨma asaratitɨ, chɨtusiupityo suiñemo ñakuti naki uiche kaɨma asaratitɨ tato. Apankisio pɨnanakiti. Chauki tɨyarusɨrɨxti, tari uixhtiatoe uraboiti ausukarɨ.

²² Namatɨ sane ui nixhukuxɨma ñɨnana axɨmanuma ɨriatu axɨbama judíos, ityopiki axɨma tɨchepe ñakionkoxɨma nauki aipenenomati tyɨrɨpo auki sinagoga axti naki ikokoroti Jesús axtɨ namati tyonenti Mesías.

²³ Sane naukiche namatɨ axɨmanuma yaɨtoti “Apankisio pɨnanakiti, chauki tɨyarusɨrɨxti”.

²⁴ Axɨmanuma ɨriatuxɨma axɨbama judíos ityasurumati tatityo maniki supusuti tɨkañe, namatɨ ɨmoti: –Urasoi suisukarɨ axɨna ñemanauntu. Axɨsomɨ tusiu suiñemo axti maniki ñoñɨnx chiyaupɨ nomɨnantɨ uiti.

²⁵ Aiñumuti nuraxɨma: –Chɨtusiupɨ iñemo axtɨ chiyaupɨ nomɨnantɨ uiti, axɨna tusiu iñemo, axɨñɨ tɨkañe chiyasakapɨtɨ, tapɨ kaɨma yasakatɨ tato.

²⁶ Ñankitioma tatityo pɨnanakiti: –¿Kausane uiti aemo? ¿Kausane yachɨkoiti nauki asakatɨ?

²⁷ Aiñumuti nuraxɨma: –Chauki tɨsurapoi ausukarɨ, axaño chapikokotapɨ nisura. ¿Isane nɨmoche aboi nauki suraboi tatityo? ¿Auxiankaityo amenotɨ isiuti?

²⁸ Auki uratokioma ɨmoti, namatɨ: –Taki axɨkɨ aɨkatɨ isiuti maniki ñoñɨnx. Tapɨ axɨsomɨ somekatɨ isiuti Moisés.

²⁹ Tusiu suiñemo axti Tupax manityanati tɨkañe ɨmoti Moisés, tapɨti maniki Jesús chɨtusiupɨ suiñemo aukicheti.

³⁰ Aiñumuti maniki ñoñɨnx nuraxɨma: –¡Kausane axɨrabotɨ sane! Axaño chɨtusiupɨ aume aukiche ayetitɨ, tapɨ axɨñɨ uiti yasakatɨ.

³¹ Tusiu oemo axti Tupax chonkoitipɨ neankaxɨma axɨbama ane nomɨnantɨ uimia, kunauntaña onkoiti neankaxɨma axɨbama iñanaunumati isamutemaintyo isiu noñemaxti.

³² Champɨ toñonkoi auki ñemonkox axtɨ anati naki taman uyaxɨpekuki asaratitɨ uiti naki anati iku kɨx supusuti.

³³ Axtɨ axti naki ñoñɨnx chɨkuatatipɨ ui noñemaxti Tupax, champɨ isane isamutenti takana axɨna sane.

³⁴ Auki namatɨ ɨmoti: –Axɨkɨ, aka iku kɨx yupu nomɨnantɨ akɨtɨpɨkɨ, ¿axianka anuneka suiñemo? Auki aipenenomati tyɨrɨpo auki axɨmanu sinagoga.

Axɨbama supusuma au nastaxti Tupax

³⁵ Ipiatenti Jesús axɨna penekoti uimia axti manki supusu. Naukiche ikuñunuti ñankitioti pɨnanakiti: –¿Axɨkɨ aikokokati Aɨtoxti ñoñɨnx?

³⁶ Aiñumuti maniki yaɨx nuraxti: –Axɨ Yɨriabux, urasoi sukarɨñɨ ñakuti, nauki ikokoroti.

³⁷ Aiñumuti Jesús nuraxti: –Chauki tasakati: unka axɨñɨ, axti naki manityana aɨbukɨ.

³⁸ Auki bachesoiyoti maniki ñoñɨnx esati Jesús, nanti ɨmoti: –Ikokota, Yɨriabux.

³⁹ Auki nantityo Jesús: –Axɨñɨ isekatɨ iku axɨna kɨx nauki yasarai axɨna isamutema namanaiña. Nauki asaramatɨ sobi axɨbama supusu tapɨ axɨbama uxia nastaxɨma sɨsioma supusuma.

⁴⁰ Axɨmanuma fariseos amonkoma akamanu ichepeti, onkoimia axɨna nuraxti sane, auki ñankitioma pɨnanakiti: –¿Axɨsomɨntyo supux somɨ?

⁴¹ Aiñumuti Jesús nuraxɨma: –Axtɨ ñemanauntupɨ axaño ausupuka, champɨ napipɨnate oboi axɨmanio nomɨnantɨ aboi. Ui axɨna amukanaño amasakatɨ, ane napipɨnate oboi axɨmanio nomɨnantɨ aboi.