Hechos 24 - Manityanati Tupax

Okɨmanati Pablo tyakutiatoe esati Félix

¹ Tomenotɨ cinco naneneka, axti Ananías, ɨriatu axɨmanuma sacerdotes. Iñataiti au Cesarea ichepe axɨmanuma mayɨriabuka aɨbutityo tamanti naki ipiakati nuxia anityati nɨrixhti Tértulo. Sɨromatɨ esati yɨriabux Félix nauki urabomati Pablo.

² Maemenkoti Félix iyoti Pablo, auki axti Tértulo uraboti Pablo, nanti sane sukarɨti Felix: –Chapie aemo yɨriabux, obi uxia subaka auna, chapietyo ityobo nanaiña axɨba omixhante obi au axɨna nɨriaka auna suibesa nación.

³ Nanaiña axɨna sane supasutiu nantax au nanaiñantai aɨbu suipukɨnunku, yarusɨrɨx yɨriabux Félix asusiu supachampienkaka.

⁴ Chɨsuixhankapɨ abaityux supanityaka asukarɨkɨ, asamu nuxia suiñemo, onsapesio axɨna suixhanka sukanasomɨ aemo.

⁵ Tabɨkoti soboi naki ñoñɨnx taruku nikumakaxti, au nanaiñantai axɨpekuma axɨbama judíos tɨborikomantai ɨmomantoe auki nakaxti, tyonenti ɨriatuxɨma axɨmanuma nazarenos.

⁶ Xhanxtityo aiñanti nomɨnantɨ au nipo meankax, tyaku naukiche sopityomoenoti.

⁷ Auki nakaxti yɨriabux ɨmo nipo masortaboka axti Lisias, kaɨburuti uiti somopɨnanaki.

⁸ Ankisio pɨnanakiti obiatoe nauki atusi aemo axɨna tyakuche suburaboti.

⁹ Axɨmanuma makiataka judíos amonkoma akamanu saneityo nuraxɨma.

¹⁰ Axti yɨriabux nanti ui ne'esti ɨmoti Pablo nauki anityati, auki aiñumuti Pablo: –Axɨñɨ tusiu iñemo tɨsɨrɨmana naskɨbeka yɨriabuxɨkɨ, sane naukiche xhanitya chakuñɨantoe auna asukarɨkɨ.

¹¹ Axtɨ axianka ankisio, tɨtabe doceatai naneneka naukiche iñanai xhanau ɨmoti Tupax au Jerusalén.

¹² Chichabɨkapɨ uimia suratokikia aɨbu makiataka, champɨityo axtɨ ausɨratai sobi au nipo meankax, ubau sinagogas o auna axɨpeku axɨba poka.

¹³ Axɨma champɨ uiche aityusiankama asukarɨkɨ axtɨ ñemanauntu axɨna nuraxɨma sɨtɨpɨñɨ.

¹⁴ Axɨna ixhanka suraboi asukarɨkɨ axɨñɨ xhanaunka ɨmoti Tupax ɨmoma axɨbama iyaɨtaiki. Axɨñɨ ikokota nanaiña axɨmanu Nikorox uiti Moisés, axɨmanuintyo ui axɨbama profetas.

¹⁵ Axɨna ane sobi, anentyo uimia, sɨborikoma tato ñana axɨbama tɨkoiñoma, axɨbama uxia takanaintyo axɨbama chuxiampɨ nisɨborikixhimia tɨkañe.

¹⁶ Sane naukiche nantax taikiana uxia nixhapanaunku sukarɨti Tupax takanaintyo sukarɨ namanaiña.

¹⁷ Yopɨrɨkɨ sɨrɨmana naskɨbeka niyɨkɨ au nanaiña, yasɨkɨbɨka tato au nisɨ'ɨ ityoximianio nixhakumanata ɨmoti Tupax.

¹⁸ Anankañɨ isamute axɨna sane, naukiche tɨkaɨburu nomɨnantɨ sɨtɨpɨkiñɨ takana nantɨ axɨmanu bakɨpukux, chubiupɨma nuxia champɨityo kausane uimia, auki iñataimia axɨmanuma judíos auki Asia, ichabɨka uimia akamanu au nipo meankax.

¹⁹ Axɨma tari yebamatɨ tauna aesakɨ nauki uraboimia asukarɨkɨ isane axɨna isamute chuxiampɨ ɨmoma.

²⁰ Axtɨ chisanempɨ tari axɨbama aboma auna uraboimia axtɨ ane nipɨnate, naukiche ityomonomañɨ esa mayɨriabuka au Jerusalén.

²¹ Axtɨ sane, axaño ɨnantɨ aume ityopiki axɨmanu rabotɨ nuxia nisura naukiche sukanañɨ: ‘Axaño amastai iñemo tyopiki axɨñɨ ikokota axɨna sɨborikoma tato axɨbama tɨkoiñoma.’ ”

²² Naukiche onkoiti axɨna sane, axti Félix, ityopiki tɨtusiu nuxia ɨmoti axɨmanu Aɨbo manunekatax, onkono uiti nanaiña, auki nanti ɨmoma: –Axtɨ kuatati Lisias yɨriabux ɨmo nipo masortaboka, tari uiti uraboiti sukarɨñɨ nanaiña axɨna chɨrɨri aboi.

²³ Auki bakɨpuruti Félix ɨmoti ɨriatu masortaboka, nauki asaramatɨ tyakuti Pablo, tari chebo uimia ɨmoti aɨrotitɨ tyɨrɨpo tari cheboityo aɨromatɨ axɨbama tyurapataxti asaparamati.

²⁴ Tomenotɨ mantukubatai naneneka, auki iñataiti tatityo axti Félix ichepe nikɨpostoti nɨrixh Drusila, tyone axɨpekuki axɨbama judíos. Bakɨpuruti iyoti Pablo, auki onsapetioti nuraxti kɨtɨpɨti Jesucristo.

²⁵ Naukiche manityanati Pablo ɨmoma nauki aipesɨnakama nisɨborikixhimia nauki aisamunema axɨna uxia, axti Félix kɨtobɨsoti auki nanti: –Au kiatax xhaemenka tatityo akɨ axtɨ champɨ niyachɨkoi.

²⁶ Baxɨperaratityo Félix axtɨ bacheboti Pablo monixh ɨmoti. Sane naukiche nantaxtai maemenkoti iyoti nauki apariti aɨbuti.

²⁷ Tomenotɨ tox naskɨbeka, sɨroti ityoboti Félix axti Porcio Festo. Tyopiki axti Félix xhanxti uxia ui axɨbama judíos ɨmoti, chɨtaesɨburutipɨ Pablo uiti.