Hebreos 5 - Manityanati Tupax

¹ Axti Tupax tyonenti naki uiche samamekanama ɨriatuxɨma axɨbama sacerdotes axɨpekuki mañoñɨnka, sɨroma nauki anityanama ɨmoti Tupax au nɨri namanaiña nauki aityoximiama makumanataka yutaku nomɨnantɨ.

² Tyopiki axti maniki sacerdote tusiutyo ɨmoti ta ane makokotox ɨmoti, sane naukiche pukɨrusuti tyakuma axɨbama champɨ nipiakaxɨma axɨbamaintyo ane nomɨnantɨ uimia.

³ Tyopiki champɨ nikusɨuxti ñome axɨmanio makokotox, sane naukiche makumananati tyobo nomɨnantɨ uiti takanaintyo ui namanaiña.

⁴ Champɨti naki yɨriabuxti ɨmotiatoe, ta uiti Tupax samamekanati aiñantityo ɨriakaboti, takanati Aarón.

⁵ Sanentityo Cristo, chɨtɨpɨ auki noñemaxtiatoe yɨriabuxti ɨmoma axɨbama sacerdotes, ta uiti Tupax atoxi ɨriakaboti, tyopiki tyonenti nanti ɨmoti: “Axɨkɨ Isaɨkɨ. Axɨna nanenes sobi asɨborikia.”

⁶ Nantityo ɨmoti au kiatax narɨkɨkixh iku Nikorox: “Axɨkɨ sacerdotekɨ ñome nanaiña naskɨbeka, sane takana nakaxti Melquisedec.”

⁷ Naukiche anankatiki Cristo iku axɨna kɨx, tosibikoti nuxia aɨbu nareoxti mankioti pɨnanakiti Tupax asamuti nuxia nauki añekati uiti pɨnanaki nikonkoxti, tyopiki axti Tupax ane nɨriakaxti aisamunenti sane. Tyopiki ñakokonaunkuxti Cristo, axti Tupax onsapetioti neankaxti.

⁸ Axti Cristo Aɨtoxti Tupax, auki nityakisɨrɨkɨxti ipiakati akokonaunti.

⁹ Sane, naukiche tisamutenti Cristo nanaiña axɨna yakɨpukuxti Tupax, tyonenti kaɨma naki uiche ane maximiakatax ɨmoma axɨbama ikokoromati,

¹⁰ sane naukiche yɨriabuxti uiti Tupax ɨmoma axɨbama sacerdotes, takanati Melquisedec.

Usuputaratiya nuxia Tupax

¹¹ Abiki sɨrɨmana axɨba suburapoboibo ɨmo axɨna sane, ta kuextaxapae sopiñununekanaño, tyopiki axaño chɨkontopɨ aye aboi.

¹² Ui axɨna tɨsɨrɨmana naskɨbeka napakokonaunku ñome axɨba omixhia manityakax, chaukipɨ tapipiaka apanuneka. Ta aninki nɨmocheti naki manunekanabo aume axɨba omixhia manityakax kɨtɨpɨti Tupax. Iyebo aboi takana masiomanka paɨbomainki, chɨbasopɨma pemakax,

¹³ axɨbama paɨbomainki takana masiomanka axɨbama aɨbo aboma iku kɨx, chipiakapɨma asaraimia axɨna besɨro mapanaunkux.

¹⁴ Tapɨ axɨbama tipiakama asaraimia axɨna besɨro mapanaunkux, tyopiki tɨniyachetaxɨma aisamunema, tyonema takana axɨbama mayarusɨrɨka tipiakama a'ama pemakax.