Hebreos 3 - Manityanati Tupax

Chepekanati aɨbuti Moisés

¹ Sane naukiche, masarukityaiki, axɨbama samamekana año, batasukux aume uiti Tupax nauki aɨtoxti año, apiñanaunsuti nuxia Cristo Jesús naki yakɨpusuxti Tupax naki Yɨriabuxti ɨmoma axɨbama sacerdotes, naki tyopikiche uikokokati Tupax.

² Axti Jesús makokonaunxti ɨmoti Tupax tyopiki uiti aiñanati ɨmo axɨna niyachɨkoiti, sanentityo tɨkañe Moisés makokonaunxti aɨbu niyaserebikixhti au nipoxti Tupax.

³ Tapɨti Jesús taruku nɨriakaxti uiti Tupax pɨnanakiti Moisés, sane takanati naki masamunuti pox taruku nɨriakaxti pɨnanaki axɨmanu pox.

⁴ Nanaiña poka anati uiche aisamunenti, tapɨti Tupax tyonenti naki uiche aisamunenti nanaiña axɨba abe iku axɨna kɨx.

⁵ Sane, axti Moisés makokonaunxti tɨkañe au nipoxti Tupax, axɨna yaserebikixhti ta uraboiti nanaiña axɨba nixhantɨmoti Tupax uraboiti ñana.

⁶ Tapɨti Cristo, naki Aɨtoxti, makokonaunxti au nipoxti Tupax axɨmanu pox ta axoñɨ, axtɨ oñonkatɨ nuxia aɨbu nupukɨnunku.

Bakɨpukux ɨmo makokonaunkux

⁷ Sane, takana nuraxti Espíritu Santo iku Nikorox: “Axtɨ kaɨma amonsapetio nuraxti Tupax,

⁸ tapɨ chiyasutiupɨ nabausasɨ takana axɨmanuma chixhanxɨpɨma akokonauma ɨmoti Tupax ta iñatama ñakokotoxɨma ɨmoti naukiche amonkoma kauta champɨti sɨborikixh.

⁹ Akamanu iñatama ñakokotoxɨma iñemo axɨbama aubaɨtaiki tɨkañe, champɨ nɨmoche uimia axɨmanio isamute sukarɨma au axɨmanio cuarenta naskɨbeka.

¹⁰ Sane naukiche ichɨbori ɨmoma tɨkañe, sukanañɨ: ‘Nabausasɨ amenkatai, chauxiankapɨ amenotɨ yusiuki nisutubiu.’

¹¹ Sane naukiche sukanañɨ ɨmoma auki nichɨbori ta chiyebopɨ ñana uimia au axɨmanu kɨx toxiobo ɨmoma.”

¹² Masarukityaiki, amasasai nuxia, tapɨ anati taman abaxɨpeku axti naki champɨ nuxiantu nausasɨxti naki chɨmakokonaumpɨ naki iñanatiyɨ pese pɨnanakiti Tupax naki sɨborikoti.

¹³ Apakuansomoko aumeampatoe naneneka, ɨmo napakokonaunku. Sane tapɨ anati naki kuatɨ au ñakionkoxti axtɨ isamutenti axɨna nomɨnantɨ ta uxia yachɨkoiti, chiñokotatipityo ñakokonaunkuxti ɨmoti Tupax.

¹⁴ Tyopiki axoñɨ toxioityo ñana oemo axɨmanu toxiobo ɨmoti Cristo, axtɨ oñonkatɨ nuxia aɨbu narukux oemo chepe nityakɨrux takana aukiapae maɨbo.

¹⁵ Sane naukiche nantɨ Nikorox: “Axtɨ amonkoi kaɨma nuraxti Tupax, tapɨ chiyasutiupɨ nabausasɨ takana axɨmanuma chixhanxɨpɨma akokonauma ɨmoti Tupax.”

¹⁶ ¿Ñakusanema axɨmanuma chixhanxɨpɨma akokonauma ɨmoti Tupax naukiche tonkoimia nuraxti? Namanaiña axɨmanuma kaɨburuma auki Egipto uiti Moisés.

¹⁷ ¿Ñakusanema axɨbama aɨbuche nityɨborixhti Tupax ñome kuarenta naskɨbeka? Aɨbuma axɨmanuma isamutema nomɨnantɨ, tyonema axɨmanuma koiñoma kauta champɨ sɨborikixh.

¹⁸ ¿Ñakusanema axɨmanuma nanti Tupax ɨmoma ta chiyebopɨ ñana uimia au nikɨxti? Axɨmanuma chɨmakokonaumpɨma.

¹⁹ Sane bastai, ta chiyebopɨ uimia tyopiki chɨmakokonaumpɨma.