Hebreos 10 - Manityanati Tupax

Axɨna bakɨpukux uiti Moisés champɨki nanenekiche

¹ Tyopiki axɨmanu bakɨpukux tɨkañe uiti Moisés, tyone ta nausɨpɨtuatai nanaiña axɨba omixha botoxiobopɨ oemo uiti Tupax, chityonempɨ axɨna toxiobo oemo. Sane naukiche, champɨti naki besɨro nisɨborikixhti axɨpekukimia axɨmanuma taikiana aɨromatɨ au nipo meankax akumanama numukianka ɨmoti Tupax.

² Axtɨ ui axɨmanupɨ bakɨpukux karɨbu nomɨnantɨ kɨtɨpɨki mañoñɨnka, ta chonkisiopɨma nipɨnatema, iñokotapɨma ñakumanakaxɨma numukianka.

³ Uxia axɨba ñakumanataxɨma tyopiki oboi akionomakɨ iyo axɨmanio chomixhampɨ isamutema au axɨba naskɨbeka.

⁴ Tyopiki noboto numukianka chɨbakaɨburupɨ nomɨnantɨ.

⁵ Sane naukiche axti Cristo, naukiche kuatati iku axɨna kɨx nanti ɨmoti Tupax: “Axɨkɨ chaxiankapɨ ñome makumanataka, axɨkɨ acheka isɨtɨpɨboñɨ.

⁶ Chuxiampɨ aemo numukianka omomo iku altar, chepe axɨba makumanataka uiche amoximiaka nomɨnantɨ.

⁷ Sane naukiche sukanañɨ aemo: ‘Auna niyaka, sane takana ane korobo sɨtɨpɨñɨ iku kichonimiakax, nauki isamune nakɨpuku iñemo, axɨkɨ Tupax.’ ”

⁸ Nanti Tupax ta chuxiampɨ ɨmoti makumanataka chuxiampityo ɨmoti numukianka omomo iku altar, nauki xhimiakana nomɨnantɨ, abo nantɨ iku nikorox ui axɨmanu bakɨpukux.

⁹ Pɨrɨkɨ axɨna sane nantityo: “Isekatɨ auna nauki isamune auki noñema.” Uiti Cristo bukaɨburu nanaiña axɨmanio chaɨbopɨ makumanataka ityobo axɨba iyebo makumanatax.

¹⁰ Axoñɨ ukunusɨankaka uiti Tupax tyopiki axti Jesucristo isamutenti noñemaxti. Ta ityoximiatati nikɨtɨpɨxti taman niyɨkɨx ɨmo nanaiña naskɨbeka, takana makumanatax nauki amoximiaka nomɨnantɨ osoi.

¹¹ Namanaiña axɨbama sacerdote judío makumananama numukianka ɨmoti Tupax naneneka taikiana tyone tatityo, axɨmanio makumanataka champɨ nobɨriakax nauki apikiaɨbu nomɨnantɨ okɨtɨpɨki.

¹² Tapɨti Jesucristo kunauntañantai ñakumanataxti ɨmoti Tupax ɨmo nanaiña naskɨbeka, sane naukiche moximiakana tato nomɨnantɨ osoi. Auki tɨmonsoti au nepanaunkuxti Tupax.

¹³ Ta'a anati baxɨperarati chepe axtɨ axti Tupax sɨroma uiti ñokiana nipopesti namanaiña axɨbama chuxiampɨ uimia ɨmoti,

¹⁴ tyopiki ui kunauntañantai ñakumanataxti kicheseña tato nakaxɨma axɨbama samamekanama ɨmoti Tupax ɨmo nanaiña naskɨbeka.

¹⁵ Axti Espíritu Santo saneityo nanti:

¹⁶ “Axɨna ɨriotɨ sobi ɨmoma yopɨrɨkɨ axɨmanio naneneka ñana, tyone axɨna sane, nanti Yɨriabux: Iñakio ñana nixhakɨpuku au nausasɨxɨma ikonomokio au ñapanaunkuxɨma.

¹⁷ Auki chanantopɨ tato xhakionoñɨ iyo nomɨnantɨ uimia.”

¹⁸ Ui axɨna sane, nanaiña axɨba nomɨnantɨ osoi moximiakana tato, champɨ nɨmoche makumanainki numukianka ɨmoti Tupax nauki aixhimiakati nomɨnantɨ.

Kausane kunauntaña makokonaunkux

¹⁹ Masarukityaiki, axɨmanu arapara notoxti Cristo naukiche koiñoti uixh kaɨma toxio oemo nauki basarati saneityo nauki aye osoi kauta nakaxti Tupax.

²⁰ Tyopiki naukiche koiñoti Jesús, uiti aurɨbo axɨmanu uiche chuiñataipɨ esati. Ta kaɨma axti Jesús sɨborikoti tato, isiukiti kaɨma iyebo osoi esati Tupax auki kiatax niyɨkɨx.

²¹ Tyonenti yarusɨrɨx yɨriabux sacerdote naki mekuche naka nipoxti Tupax au napes.

²² Sane naukiche kuri esati Tupax aɨbu kicheseña nuyausasɨ aɨbuityo ñemanauntu numakokonaunku, axɨbio nuxia nuyausasɨ pɨnanaki nanaiñantai nomɨnantɨ takanaintyo nokɨtɨpɨ axɨbio ui tux kɨcheseña.

²³ Tapɨ uiñokota numakokonaunku, tapɨ kiatax numakionko tyopiki axti Tupax chɨmapañantipɨ ta isamutenti ñana axɨmanu ensɨmunu uiti.

²⁴ Bapachera kausane nikiubu oñɨ nauki basaratɨ utakuapatoe, nauki ukuasɨrɨtyo oemoantoe sane uisamune nantax axɨna uxia.

²⁵ Tapɨ chuɨkapɨtɨ axtɨ oyoberabaka, takana aboma axɨbama isamutema sane, uisamunena aɨbu narukux oemo axɨna numakokonaunku ɨmoti Tupax, au axɨmaniampae naneneka axtɨ tɨsaimia ayetitɨ tato Jesucristo asaraiti ɨmo axɨna kɨx.

²⁶ Tyopiki axtɨ sɨsioki oñɨ numasamuku axɨba nomɨnantɨ pɨrɨkɨ axɨna ñemanauntu manunekatax uiti Tupax axɨna tusuputakai, champɨ uiche ane maximiakatax oemo.

²⁷ Champɨki kausane osoi utakuapatoe ta nauki baxɨpera kɨmenu axɨmanu yarusɨrɨx nutakisɨrɨkɨ ñana kɨmenuintyo axɨmanu nonko pes axɨna uiche atakɨruma ñana axɨba chuxiampɨ uimia ɨmoti Tupax.

²⁸ Axtɨ anati naki chikokotapɨ bakɨpukux uiti Moisés, axtɨ aboma axɨbama toxɨma o trexɨma urabomati axɨbama astaimia nomɨnantɨ uiti, toxioti ɨmo nikonkoxti champɨti okɨmanabo tyakuti.

²⁹ Ui axɨna sane ¿apikokota axaño yarusɨrɨx ñana toxiobo ityakisɨrɨkɨboma axɨbama ikɨmotemanti Aɨtoxti Tupax champɨityo nikuasɨrɨkɨ notoxti ɨmoma, axɨbama chuxiampɨ nuraxɨma ɨmoti Espíritu Santo uiti Tupax naki taruku naukuasɨrɨkɨ ɨmoti? Axɨmanu notox uixh uxiane axɨmanu ensɨmunu tɨkañe uiti, uixh aukunusɨankaka ɨmoti Tupax.

³⁰ Tusiu oemo ta axti Tupax nanti: “Iñemo koñotɨ yasarai axɨmanu uxia takana axɨna chuxiampɨ. Sobi yache ityobo.” Nantityo sane: “Axti Tupax uiti asaraiti axɨna chuxiampɨ takanaintyo axɨna uxia isamutema axɨbama aɨtoxti.”

³¹ Taruku nityakisɨrɨkɨxɨma axɨbama ane nipɨnatema mekuti Tupax, naki sɨboriko.

³² Apakionsaño tɨkañe, naukiche aɨbo apasutiu nuraxti Tupax apiñata nuxia ɨmo nautakisɨrɨkɨ ui axɨna chɨtamampatai kuantio aume.

³³ Sɨrɨmanama abaxɨpekuki takisɨrɨma ui nunkuxɨma makiataka ɨmoma, okɨsioma ɨmo sukarɨ namanaiña, makiataka sɨromatɨ chepe axɨmanuma takisɨrɨma sane.

³⁴ Axaño aupukɨruka tyakuma axɨbama amonkoma amanamampo, aupukɨnunka naukiche ikiaɨbutama amopɨnanaki namenaxi, tyopiki tusiu aume ta ane kiatax namenaxi au napes axɨna chɨmamesopɨ ñana.

³⁵ Tapɨ apiñokota napakokonaunku ɨmoti Tupax, tyopiki sane ane toxiobo aume ityobo.

³⁶ Tapɨ apatacheka ui nautakisɨrɨkɨ, nauki apisamune noñemaxti Tupax nauki sane apasuriu axɨmanu ɨriotɨ uiti aume.

³⁷ Tyopiki nantɨ iku Nikorox: “Konto, ayetitɨ naki kuabotɨ. tɨsaimia axɨna niyekixhti.

³⁸ Axti naki ikokorotiñɨ sɨborikoti. Tapɨ axtɨ iñokonotiñɨ, chipukɨnunkapɨ kuatati.”

³⁹ Axoñɨ chɨtɨpɨ takana axɨmanuma basɨkɨbɨkoma tato sɨromatɨ ɨmo nityakisɨrɨkɨxɨma, ta axɨbama iyebo uimia nisɨborikixhimia tyopiki makokonauma ɨmoti Tupax.