Gálatas 4 - Manityanati Tupax

Chɨtɨpɨ kumanakaxɨki oñɨ ta aɨtoxti

¹ Ixhanka sukanañɨ aume axɨna sane: Axtɨ simiantiki naki uiche ñana asuriuti axɨmanio ɨriotɨ tɨkañe, chepatai nakaxti aɨbuti taman kumanakax auki nipoxti, sane axtɨ tyonenti naki esache nanaiña.

² Aboma axɨbama asaramatɨ tyakuti asaramatityo tyaku axɨmanu enaxiboti, chepe axtɨ iñatai ñana axɨmanu nanenes ɨriotɨ uiti yaɨtoti.

³ Saneityo tɨkañe usaɨbu: naukiche chiñataikipɨ nuyarusɨrɨkɨ, makokonaunka ɨmo yakɨpukuxɨma mayɨriabuka ikuki axɨna kɨx.

⁴ Naukiche tiñatai axɨmanu nanenes, bakɨpuruti Tupax ɨmoti Aɨtoxti, naki anati iku kɨx kɨtɨpɨki taman paɨx, ikokotatityo bakɨpukux uiti Moisés,

⁵ nauki utaesɨbu uiti pɨnanaki axɨmanu bakɨpukux saneityo basuriu taruku nupukɨnunku takana axɨbama aɨtoxti Tupax.

⁶ Nauki atusi ta aɨtoxti oñɨ, axti Tupax bakɨpuruti nesaxti Espíritu Aɨtoxti au nuyausasɨ. Maniki Espíritu tosibikoti: “¡Abbá! ¡Iyaɨ!”

⁷ Sane kaɨma chɨtɨpɨ kumanakaxɨkɨki, ta aɨtoxti Tupax. Tyopiki aɨtoxtikɨ, tyone noñemaxti Tupax atoxityo aemo nenaxixhti tyopikiti Cristo.

⁸ Tɨkañe naukiche chausuputakatikipɨ Tupax, kumanakax año ɨmoma axɨbama chɨtɨpɨ matupaka.

⁹ Tapɨ kaɨma axɨna tausuputakati Tupax, saneityo, tisuputarati año Tupax, ¿kausane amenotɨ tatityo apikokoroma axɨmanuma champɨ nɨriakaxɨma, nauki kumanakax tatityo año uimia?

¹⁰ Axaño apiñanaunkio naneneka, panka, nanaiña naskɨbeka.

¹¹ ¡Taruku nixhuku tapɨ munatai axɨna niyachɨkoi isamute tanu abaxɨpeku!

Akiontoboti Pablo

¹² Masarukityaiki, apasamu nuxia iñemo: apisamuse takana axɨñɨ, tyopiki axɨñɨ isamute axɨna nisɨboriki takana axaño. Chiñemopɨ apisamute axɨmanu chuxiampɨ.

¹³ Chauki tɨtusiu aume, naukiche kusɨrɨbo suraboi ausukarɨ axɨba omixhia manityakax isamute sane tyopiki anankañɨ ichakisɨrɨka ui niñaunxokoko.

¹⁴ Axɨmanu noxokox tyone makokotox aume, champɨ axtɨ chisuasɨrɨkapɨ aume chapipenekapɨñɨ tyopiki axɨmanu niñaunxokoko, apasukiukañɨ takana ɨmoti taman ángel yakɨpusuxti Tupax, ¡takana axtɨ tyonentiatoe Cristo Jesús!

¹⁵ ¿Kauta niyɨkɨx axɨmanu taruku naupukɨnunku? Sukanañɨ sane axtɨ anempɨ nikiubu año, apikiaɨbukiompɨ nausɨto nauki apityoximianio iñemo.

¹⁶ Tapɨ kaɨma, ¿ensapɨ chuxiampɨ sobi aume ui axɨna sukanañɨ aume axɨna ñemanauntu?

¹⁷ Axɨmanuma mañoñɨnka taruku nonxɨkɨxɨma autaku, chɨtɨpɨ ɨmo uxia axɨmanu nixhankaxɨma. Axɨna nixhantɨmoma ta nauki apiñanaño pese somopɨnanaki, nauki kaɨma axaño amonxɨka tyakuma.

¹⁸ Uxia axtɨ oñonxɨka tyaku makiataka, ta aɨbu axɨna uxia numakionko. Taikiana sane aboi, tapɨ saneantai aboi axtɨ yaka auchepe.

¹⁹ Masaɨtaiki, ichakisɨrɨka tatityo takana axɨna xhanx ane meku, chepe axtɨ sɨroti Cristo ñana aukɨtɨpɨ.

²⁰ ¡Ixhankapɨpae yaka akamanu abaxɨpeku nauki xhanitya aupu axɨna kiatax nisura, tyopiki chɨmastakaxɨpɨ iñemo autaku!

Nausɨpɨtu Agar chepe Sara

²¹ Amukanaño iñemo, axaño, axɨbama auxianka apikoko axɨmanu bakɨpukux uiti Moisés: Unka amonkoi axɨna nantɨ axɨmanu bakɨpukux.

²² Tyopiki nantɨ ta aboma toxɨma aɨtoxti Abraham: tamanti auki nikumanakataxti, tapɨti kiatax auki nikɨpostotiatoe.

²³ Axti maniki anati iku kɨx auki nikumanakataxti tyonenti ikuki axɨnantai kɨx. Tapɨti maniki auki nikɨpostotiatoe anati iku kɨx nauki uxiane axɨmanu tɨkañe ɨriotɨ uiti Tupax.

²⁴ Axɨna sane ane nurapoi. Axɨmanio tox paɨka tyoneio axɨmanu tɨkañe tox chepe ñakionkoxti Tupax aɨbuti Abraham: axɨmanu taman tyone axɨmanu yirityux Sinaí, ane au nɨri Agar tyone nipiakɨtoti maniki kumanax ñana.

²⁵ Sane Agar tyone axɨmanu yirityux Sinaí au Arabia, tyone kaɨma nesa Jerusalén, tyopiki axɨbama po'osoma au Jerusalén kumanakaxɨma aɨbu namanaiña.

²⁶ Tapɨ axɨmanu Jerusalén auki napes champɨ kausane ɨmo, axoñɨ kaɨma naɨbosixh oñɨ.

²⁷ Tyopiki axɨmanu Nikorox nantɨ: “Taruku napukɨnunku, axɨkɨ paɨx chaɨbosikiapɨ tyopiki, champɨti apaɨmaka. Atosibi ui napukɨnunku, tyopiki chɨtusiupɨ aemo noxokox axtɨ tɨkuatati simia iku kɨx. Tyopiki axɨna paɨx onkonoma sɨrɨmanama ñana aɨtaiki pɨnanaki axɨna paɨx anati ikiana.”

²⁸ Masarukityaiki, axaño tyoneantoe nabaka takanati Isaac: axaño tyonema axɨbama aɨtoxti Tupax ɨriotɨ tɨkañe uiti.

²⁹ Sane takana au axɨmanio tɨkañe naskɨbeka axti maniki simia anati iku kɨx takana axɨbamantai ikuki axɨna kɨx chuxiampɨ uiti ɨmoti maniki anati iku kɨx ui noñemaxti Espíritu Santo, saneityo isamutema kaɨma.

³⁰ ¿Isane axɨna nantɨ iku Nikorox? Nantɨ sane: “Aipene tyɨrɨpo axɨmanu kumanakax aɨbuti ipiaɨmakax, tyopiki axti maniki ipiaɨmakax axɨmanu kumanakax chɨtoxiopɨ ñana ɨmoti nenaxixhti Yaɨtoti takanati maniki naɨto nikɨpostotiatoe.”

³¹ Sane naukiche, masarukityaiki, axoñɨ chɨtɨpɨ naɨto axɨmanu kumanakax, ta naɨto axɨmanu nikɨpostotiatoe.