Filipenses 4 - Manityanati Tupax

Yachɨkoboiboma axɨbama ikokoromati Jesús

¹ Masarukityaiki axɨbamaintyo ichurapataiki, taruku nipukɨnunku autopiki. ¡Ñemanaunkuxatoe isucheka abapa! ¡Apiña nuxia tapɨ apiñokota napakokonaunku ɨmoti Yɨriabux Jesús!

² Sukanañɨ ñome Evodia, chepe Síntique apasamu nuxia nauki chepe ñupakionkox, tyopiki chepeio opikokoroti Cristo.

³ Axɨkɨtyo naki anankɨ chepeñɨ ɨmo axɨna niyachɨkoi, asamu nuxia iñemo ayurasio. Tyopiki axio, chepeti Clemente namanaiñaintyo axɨmanuma amonkoma chepeñɨ ɨmo axɨna niyachɨkoi, amonkoma chepeñɨ uraboimia axɨba omixhia manityakax. Axɨmanuma mañoñɨnka chauki tɨkoroboma iku axɨmanu kichonimiakax kauta champɨ nityakɨru sɨborikixh.

⁴ ¡Taikiana aupukɨnu nausɨboriki aɨbuti Cristo! Tɨsukanañɨ aume, ta sukanañɨ tatityo: ¡Taikiana aupukɨnu nausɨboriki aɨbuti Cristo!

⁵ Tari namanaiña asuputarama año takana axɨbama taruku nipukɨruxɨma. Axti Yɨriabux ta anati saimia.

⁶ Tapɨ amonxɨka yubapa axɨba ausɨratai, apityusiankasio nanaiña sukarɨti Tupax auki nameanka. Apanki pɨnanakiti apachampienkaityo ɨmoti.

⁷ Sane ixhimiakatati Tupax nomɨnantɨ aboi, tyone axɨna taruku niyarusɨrɨkɨx pɨnanaki ñapanaunkuxɨma mañoñɨnka. Axɨmanu nipukɨruxti asaratɨ tyaku nabausasɨ tyakuityo napapanaunku ui noñemaxti Cristo Jesús.

⁸ Au nityakɨrux masarukityaiki, apiña napakionko ɨmo nanaiña axɨna ñemanauntu, nanaiña axɨna ane manaunkux ɨmo, nanaiña axɨna besɨro, nanaiña axɨna champɨ nomɨnantɨ kɨtɨpɨ, nanaiña axɨna uiche upukɨnunkatai, nanaiña axɨna uxia ɨmo namanaiña. Apiña napakionko yokɨtɨpɨ nanaiñantai mapanaunkuka, nanaiña axɨna koñotɨ uxia nuraxɨma kɨtɨpɨ.

⁹ Apisamuse nanaiña axɨmanio nixhanunekasa aume. Apisamuse nanaiña axɨmanu isamute ausukarɨ axɨmanuintyo amonkoi nisura. Sane anati Tupax auchepe, naki uiche uxia nusaka.

Machampienkakax

¹⁰ Taruku nipukɨnunku au nɨrixhti Yɨriabux Jesús tyopiki axaño masarukityaiki apakionkaño tatityo iyoñɨ. Tusiu iñemo ta chɨtakɨrusuikipɨ napakionko iyoñɨ, ta chenaunkupɨ aboi.

¹¹ Sukanañɨ sane chityopikipɨ tarukupɨpae axɨba nixhantɨmo, tyopiki aukiapae ipukɨnunka aɨbu axɨna ane sobi.

¹² Tusiu iñemo kausane nisɨborikixhimia axɨbama takisɨrɨma, takanaintyo nisɨborikixhimia axɨbama taruku nenaxixhimia. Ipiakaityo yasuriu nisɨboriki axtɨ ane xhutuburiuñɨ takanaintyo axtɨ champɨ. Axtɨ ane aruki nanaiñantai xhutuburiboñɨ isiuityo axtɨ champɨ.

¹³ Ui noñemaxti Cristo aruku nuxia iñemo nauki yɨro kutakikibo nanaiñantai.

¹⁴ Tapɨ axaño, uxia axɨna napachɨkoi saɨbuñɨ tyopiki apasutiutyo axɨna nichakisɨrɨkɨ.

¹⁵ Naukiche aɨboapae suraboi axɨba omixhia manityakax naukiche tɨniyɨkɨ auki Macedonia, axañoantai apayurakañɨ, axɨbama ikokoromati Jesús auki Filipos. Makiataka axɨbama ikokoromati Jesús chɨbayurarapɨma iñemo.

¹⁶ Naukiche anankañɨ au Tesalónica taikiana apakɨpuka aɨbu napakumanata iñemo.

¹⁷ Chɨsukanapɨñɨ sane nauki apakumanaka iñemo, ta nauki apukɨruti Tupax autaku.

¹⁸ Axti Epafrodito ityoximiatati nanaiña axɨmanu apakɨpuka iñemo, ta iñatai ɨmo nanaiña nixhantɨmo. Axɨmanu napakumanata tyone takana axɨmanu makumanatax koñoxtai norixh yasutiuti Tupax aɨbu nipukɨnunkuxti.

¹⁹ Sane naukiche axti naki Tupax iñemo, toxio ñana uiti aume nanaiña axɨna champɨ aboi, takana axɨna niyarusɨrɨkɨ nenaxixhti abe uiti Cristo Jesús.

²⁰ ¡Yarusɨrɨxti Tupax naki Uyaɨ ɨmo nanaiña naskɨbeka! Amén.

Tyakɨrux makionkox

²¹ Aburasoi nixhakionko tanu ɨmo namanaiña axɨbama usarukityaiki au nɨrixhti Cristo axɨbama ikokoromati Tupax. Axɨbama usarukityaiki aboma auna chepeñɨ ñakionkoxɨmaintyo tanu aume.

²² Ñakionkoxɨmaintyo tanu aume namanaiña axɨbama ikokoromati Jesús, axɨbamampae baserebioma ɨmoti yɨriabux auki Roma.

²³ Tari axti Yɨriabux Jesucristo aukunusɨankanati año.