Efesios 6 - Manityanati Tupax

Masiomanka chepe axɨbama yaɨtoxɨma

¹ Masiomanka, apakokonau ɨmoma axɨbama aubaɨtaiki tyopiki sane nixhankaxti Yɨriabux, tyone axɨna uxia.

² Axɨmanu kusɨrɨbo bakɨpukux anentyo uɨbo axɨmanu ɨriotɨ tyone axɨna sane: “Tari anaunuti obi aɨma chepe napakɨma,

³ nauki taruku napukɨnunku naukityo abaityux nasɨboriki iku axɨna kɨx.”

⁴ Tapɨ axaño mañonɨnka, tapɨ tɨborikoma aboi axɨbama aubaɨtaiki, ta apiñununekasama oboi axɨmanio manunekataka nixhantɨmoti Yɨriabux Jesús.

Makumanakaka chepe mayɨriabuka ɨmoma

⁵ Axaño axɨbama makumanakaka apakokonau ɨmoma axɨbama iku axɨna kɨx yɨriabuxɨma aume. Apakokonau ɨmoma aɨbu napanaunku, tapɨ apapanka ɨmoma, aɨbu narukux aume, takana axtɨ apaserebikiapɨ ɨmoti Cristo.

⁶ Tapɨ sukarɨmantai sane aboi, nauki uxia nastaxɨma aume, ta apiña takanati naki kumanakaxti ɨmoti Cristo, apisamuse ñemanaunkuxatoe noñemaxti Tupax.

⁷ Apisamuse nuxia napachɨkoi, takanati naki baserebioti ɨmoti Yɨriabux Jesús tapɨ apisamute takana axtɨ ɨmo mañoñɨnkatai.

⁸ Tari atusi aume, taikianati taman ñana axti naki kumanakax o axtɨ chɨtɨpɨ kumanakaxti, yasutiuti ñana uiti Yɨriabux Jesús isiuki axɨna isamutenti.

⁹ Axañointyo axɨbama yɨriabux año ɨmoma, saneityo aboi aɨbuma axɨbama kumanakaxɨma aume, tapɨ apipixhumukama. Apakionsaño ta axaño takanaintyo axɨma apakokonau ɨmoti Tupax naki anati au napes, naki chepatai nusaka ɨmoti.

Axɨna nikomesti Tupax

¹⁰ Au nityakɨrux masarukityaiki, apapache aukusɨubu kɨtɨpɨti Yɨriabux Jesús axɨna nikusɨuxti champɨti iñanɨ kɨmenu.

¹¹ Amokɨma nuxia autakuapatoe apiña aukɨtɨpɨ axɨmanu okɨmanabo toxio aume uiti Tupax, sane chautapenekapɨ au niñakokotoxti chobores.

¹² Tyopiki chubaikiapɨ aɨbu mañoñɨnka takana axoñɨ, ta aɨbu machoboreka axɨbama chuxiampɨ uimia au napes. Tyonema axɨbama kaɨma iñatama nɨriakaxɨma takanaintyo noñemaxɨma auna iku axɨna kɨx.

¹³ Sane naukiche, apasusiu axɨmanu okɨmanabo autaku toxio aume uiti Tupax, nauki amokɨma autakuapatoe au axɨmanu nanenes ñana chuxiampɨ. Axtɨ iñatai tyakɨru napaiki sɨsio año aɨbu narukux aume.

¹⁴ ¡Amasasatɨ nuxia! Tari axɨna ñemanauntu chepe axɨna besɨro ñapanaunkuxti Tupax ameno aukɨtɨpɨ nauki amokɨma autaku.

¹⁵ Aukobori aɨbu nauxianka aburaboi axɨba omixhia manityakax uiche uxia aboi aumeampatoe.

¹⁶ Ui axɨmanu apikokokati Tupax tari tyone okɨmanabo autaku pɨnanaki nipiayutuxti chobores.

¹⁷ Axɨna maximiakatax tari tyone axɨna okɨmanabo tyaku nautanu, tari axɨna nuraxti Tupax tyone axɨna sɨrɨmanax naukɨse axɨna toxio aume uiti Espíritu Santo.

¹⁸ Tapɨ tochenko nameanka. Apanki pɨnanakiti Tupax asamuti nuxia, apisamuse ui noñemaxti Espíritu Santo. Amasankatɨ nuxia, tapɨ apiñokota axɨna abaka aɨbu. Axtɨ ameanka apanki tyakuma namanaiña axɨbama ikokoromati Tupax.

¹⁹ Amea chakuñɨ, nauki axti Tupax acheti surapoboiboñɨ, tapɨ ixhuka suraboi axɨna nixhantɨmoti aisamunenti axɨmanu ananka anekana uiti Tupax.

²⁰ Axti Yɨriabux ikɨpurutiñɨ suraboi axɨmanu nixhantɨmoti aisamunenti, tyopiki yaka auna amanañɨmpo. Apanki pɨnanakiti Tupax tapɨ ixhuka suraboi axɨmanio omixhia manityakax.

Makionkox

²¹ Ikɨpukati tanu axti Tíquico, naki usaruki naki anankati suichepe naki baserebioti ɨmoti Cristo, tari uiti uraboiti ausukarɨ kausane nisɨboriki auna, isaneityo niyachɨkoi.

²² Sane naukiche ikɨpukati tanu aubesa, nauki uraboiti ausukarɨ kausane suisɨboriki auna nauki uiti aruku nuxia aume.

²³ Axti Tupax naki Uyaɨ axtityo Yɨriabux Jesucristo, tari ityoximianama ɨmoma axɨbama usarukityaiki ñakumananaunkuxɨma nauki uxia aboi aumeampatoe aɨbu napakokonaunku.

²⁴ Tari uiti aikunusɨankanati año namanaiña axɨbama taruku nikuasɨrɨkɨxti Yɨriabux Jesucristo ɨmoma.