Apocalipsis 18 - Manityanati Tupax

Nityaɨbɨkɨ Babilonia

¹ Yopɨrɨkɨ nanaiña axɨba sane, yasakatɨ ɨmoti kiatax ángel kuatati akɨ auki napes. Taruku nɨriakaxti, anentax iku kɨx ui nanentakaxti.

² Taruku nikɨpura nityosibixhti: “¡Tɨtaɨbɨko, tɨtaɨbɨko axɨmanu yarusɨrɨx Babilonia! ¡Tyone kaɨma nipo machoboreka, ñatanekasaxɨma arukinanaiñantai machoboreka, niñosemenu nutaumanka axɨba chomixhampɨ numukianka axɨba chuxiampɨ ubario!

³ Au nanaiña kɨx isamutema nisɨborikixhimia isiukimia manaunumaintyo ɨmo axɨbama chɨtɨpɨ matupaka. Saneityo isamutema mayɨriabuka ikuki kɨx. Axɨbama mapabentekanama nenaxixhimia ikuki kɨx tarukapae kaɨma nenaxixhimia tyopiki tyone makomporara pɨnanakimia nanaiña ñome axɨba chomixhampɨ nixhantɨmo.”

⁴ Auki ñonkoi kiatax tosibixh auki napes, nantɨ sane: “Apakicho auki axɨmanio poka, axaño axɨbama isaɨtaiki, tapɨ abeka oboi nomɨnantɨ uimia tapɨ abekaityo oboi nityakisɨrɨkɨxɨma.

⁵ Tyopiki axɨmanu nomɨnantɨ uimia tixhanx aiñanai iku napes, axti Tupax chɨtakɨrusupɨ ñakionkoxti iyo axɨba nipɨnatema.

⁶ Apatoko tato ɨmo takana axɨna niyachɨkoi ɨmo makiataka. apisamuse ɨmo tox pɨrɨkɨ axɨna isamute. apasamu ityɨpobo axɨna tox nikusɨux pɨrɨkɨ axɨmanu isamute ɨmo makiataka.

⁷ Tyone au ñakionkox tɨkañe champɨ kiatax pɨrɨkɨ, uxiantai ɨmo tɨkañe yarusɨrɨx pukɨnunkuka. Kaɨma apityakisɨnɨmaka apityakisɨnɨmaka isiu nauxianka. Tyopiki au nityusixh nantɨ ‘Yaka auna ichɨmoka takana yarusɨrɨx nɨniabux. Chɨbiuraxɨpɨñɨ, champɨ uiche ichakisɨrɨ.’

⁸ Sane naukiche au taman sapes kuantio chɨtamampatai ityakisɨrɨkɨbo: konkox, takisɨrɨkɨx chepe kɨrɨpɨx, omo ñana nikɨtɨpɨx oto pes. Tyopiki taruku nɨriakaxti Tupax, naki Yɨriabux axti naki uiche asaraiti nomɨnantɨ uixh.”

⁹ Axtɨ Babilonia omo taruku nisuchekixhimia ñana mayɨriabuka ikuki axɨna kɨx areoroma tyaku. Axɨmanuma mayɨriabuka takana Babilonia, manaunuma ɨmoma axɨbama matupaka nisamuku mañoñɨnka sɨborikoma aɨbu taruku nenaxixhimia.

¹⁰ Ui nixhukuxɨma tapɨ takisɨrɨmaintyo chepe, sɨsioma ñana icheeñantai namatɨ sane: “¡Atakisɨrɨkatai, atakisɨrɨkatai, atakisɨrɨkatai yarusɨrɨx Babilonia, axɨkɨ taruku nɨriaka! Tyopiki takana axtɨ aposikiatai manityomokonoti Tupax aemo.”

¹¹ Axɨbamaintyo makomporarama chepe axɨbama mapabentekanama ikuki axɨna kɨx areoromaintyo sucheboma tyaku Babilonia tyopiki champɨki ñakusane makomporarabo nenaxixhimia:

¹² oro, plata, omixhiantai kamanka, kamanka bupurusubi, pinu korteka kɨturiki niyokorox omixhante ui seda, nanaiñantai soeka axɨba uxiantai noborixh. Axɨba ausɨratai omixhante ui mármol, ui marfil, ui bronce, ui yerux.

¹³ Abe pikiataka nikiakaxɨma canela, axɨba uxiantai noborixh. Incienso, axɨna uxiantai norixh, aceite, vino, tubaxixh, trigo, buyeka, nobixhaka, kabayuka, karetonka, mañoñɨnkaityo pabenteoma nauki kumanakaxɨma ɨmo makiataka chepetyo axɨbama enoma auki niyaikixhimia aɨbu nikomesɨma.

¹⁴ Auki namatityo ɨmo Babilonia: “¡Champɨki nenaxi axɨba taruku nuniñakax aemo. Ɨmo nanaiña naskɨbeka ensoro apɨnanakikɨ nanaiña nakoñopo yochepe nenaxi!”

¹⁵ Axɨmanuma mapabentekanama axɨmanio sane iyebo uimia ane taruku nenaxixhimia auki Babilonia, sɨsioma ñana icheatai ui nixhukuxɨma, ñɨnana nityakisɨrɨkɨxɨma, aɨbu nareoxɨma ui nisuchekixhimia,

¹⁶ auki namatɨ: “¡Atakisɨrɨkatai, atakisɨrɨkatai yarusɨrɨx Babilonia! Chiyaupɨ nikoñokoko naibi, aɨbu naibi kɨturiki, koñokono ui oro, oboi kanka bupurusubi oboityo kanka ausɨratai niyokorox.

¹⁷ ¡Takana axtɨ aposikiatai takɨrusu nanaiña yarusɨrɨx nenaxi apɨnanakikɨ!” Namanaiña axɨmanuma mayɨriabuka ñome canoa axɨbama sɨromatɨ isuki narubaityu tux, namanaiña axɨbama mapabentekanama au narubaityu tux sɨsioma astayomatɨ ɨmo auki icheatai

¹⁸ naukiche astaimia ausiu ape ui nonkox axɨmanio poka, tosibikoma: “¿Ñakusanempɨ pikiataka poka aɨbuche uichepeka axɨna yarusɨrɨx Babilonia?”

¹⁹ Auki iñatama tɨbɨtɨx ityama, areoroma ui nisuchekixhimia, tosibikoma: “¡Atakisɨrɨkatai, atakisɨrɨkatai yarusɨrɨx Babilonia! Oboi nenaxixh taruku nenaxixhimia namanaiña axɨbama ane nesaxɨma canoa au narubaityu tux. ¡Takana axtɨ oposikiatai nanaiña iñaxio!”

²⁰ Axɨkɨ napes, apukɨnu tyopiki axɨmanu yarusɨrɨx Babilonia. Aupukɨnu axaño, axɨbama apikokokati Tupax, axɨbama apóstoles tɨkañe axɨbamaintyo profetas, tyopiki axti Tupax, manityomokonoti ɨmo Babilonia tyopiki nanaiña axɨmanio nomɨnantɨ isamutema aume.

²¹ Auki tamanti ángel naki taruku nikusɨuxti, ikiampetati taman kanx, sɨrɨmanax takana taman tarapicha, yarutaɨbutati au narubaityu tux nanti: “Sane iyaruraɨburumakɨ ñana, axɨkɨ yarusɨrɨx Babilonia, chanantopɨ tato ñana asaramakɨ.

²² Chanantopɨ rabotɨ tato yusiu nakutubiu sonixh aɨbu arpa, aɨbu buxikia, chanantopɨ aboma tato mañoñɨnka axɨbama sɨrɨmanatai yachɨkoimia, chɨrabopɨtɨkityo ñana auna batubaxikixh.

²³ Chanantopɨ anentax auna ui basarux, chɨrabotɨpityo pukɨnunkux oboi tɨbɨbɨka. Tyopiki axɨbama mapabentekana nenaxixhimia tɨkañe aukina taruku nɨriakaxɨma iku axɨna kɨx, atachemakakaityo ɨmo namanaiña ui napichara.”

²⁴ Tyopiki au axɨmanio poka tabɨko notoxɨma axɨbama profetas axɨbamaintyo champɨ nipɨnatema, namanañaintyo axɨbama koiñoma uimia iku axɨna kɨx.