2 Timoteo 3 - Manityanati Tupax

Axɨmanio ñana tyakɨrux naneneka

¹ Atusityo aemo au axɨmanio tyakɨrux naneneka ñana taruku takisɨrɨkɨx.

² Aboma ñana mañoñɨnka axɨbama champɨ nipukɨruxɨma, taruku nixhankaxɨma ɨmo monixh, au ñakionkoxɨma champɨti kiatax pɨrɨkɨma. Chuxiampɨ nuraxɨma ɨmoti Tupax, chɨmakokonaumpɨma ɨmo axɨbama yaɨtoxɨma, chipiakapɨma ñana achampienkama, champɨ ñanaunkuxɨma ɨmoti Tupax.

³ Chɨmakumananaumpɨma ɨmo makiataka, chuxiampɨ nuraxɨma kɨtɨpɨ makiataka, isamutema ñana axɨna nixhantɨmoma aisamunema, champɨ ñana nipukɨruxɨma chuxiampityo ɨmoma nanaiña axɨna uxia.

⁴ Mapañama uxia uimia champɨ ñanaunkuxɨma, taruku ñana yapataikixhimia, yapachetioma ñana axɨna ipukɨnunkubuma tapɨti Tupax champɨ nɨmocheti uimia.

⁵ Mapañama ñana apukɨruma tyaku makiataka, tapɨ axɨna isamutema uixh atusi ta chisamutempɨma isiuki noñemaxti Tupax. Axɨmanuma sane nisɨborikixhimia tapɨ ane nɨmochema obi.

⁶ Tyonema axɨbama sɨromatɨ ubau poka atachemakama ñome paɨka axɨba sɨrɨmana nomɨnantɨ oboi, tyopiki axɨba ausɨratai niñuxantɨmo,

⁷ abe aɨbu niñuxiankax aye oboi axɨna manunekatax, tapɨ axɨna ñemanauntu chiyebopɨ oboi.

⁸ Sane takanati Janes chepeti Jambrés chuxiampɨ ɨmoma nɨriakaxti Moisés, saneityo axɨma chuxiampɨ ɨmoma axɨna ñemanauntu. Axɨbama mañoñɨnka champɨ uxia au nityanuxɨma, champɨ nanenekiche ñakokokoxɨma.

⁹ Ta chɨsɨromapɨtɨ iche, tyopiki namanaiña ñana tusiu ɨmoma ta champɨ nipiakaxɨma, sane takana axɨmanuma toxɨma chuxiampɨ ɨmoma nɨriakaxti Moisés.

Bakɨpukux ɨmoti Timoteo

¹⁰ Axɨkɨ aisamuse nuxia isiuki nixhanunekaka, isiuki nisɨboriki, axɨna nixhantɨmo isamune, nixhakokonaunku, nipukɨru tyaku makiataka, narukux iñemo, nixhakumananaunku, niñasamunaunku aɨbu makiataka,

¹¹ asutiutyo chepeñɨ axɨba nichakisɨrɨkɨ takanaintyo axɨna nityɨborixhimia, takana axɨmanio oboiche ichakisɨrɨka au Antioquía, au Iconio autyo Listra. ¡Tarukapae nityɨborixhimia iñemo! Tapɨti Yɨriabux Jesús añekanañɨ uiti ñopɨnanaki.

¹² Ñemanauntu, namanaiña axɨbama xhanxɨma besɨro nisɨborikixhimia aɨbuti Cristo Jesús tyopiki chiyaupɨ ñana nityakisɨrɨkɨxɨma.

¹³ Tapɨ axɨbama chuxhiampɨ nisɨborikixhimia axɨbamaintyo mañatachemakaka isiu nomeki naneneka ñana sɨromatɨ ɨmo axɨna tarukapae chuxiampɨ, aɨbu ñatachemakakaxɨma, tyopiki axɨma tɨkusɨrɨboma atachema uiti chobores.

¹⁴ Axɨkɨ Timoteo, aiña nuxia tapɨ aiñokota axɨna iyebo obi, tyopiki uixh axɨna sane nasɨboriki, tɨtusiu aemo ñakusanema axɨbama uiche aiñununekanamakɨ.

¹⁵ Akionsɨ aukiapae simiankɨki asuputakai axɨna Nikorox, axɨba oboiche taruku napanaunku nauki ataesɨbuka eanaki nomɨnantɨ tyopiki nakokonaunku ɨmoti Cristo Jesús.

¹⁶ Nanaiña axɨba Nikorox tyone noñemaxti Tupax taruku nɨmoche ɨmo manunekatax, makuansomokokox, ɨmo axɨna besɨro mapanaunkux,

¹⁷ nauki axɨbama ikokoromati Tupax besɨro ñapanaunkuxɨma, atusityo ɨmoma kausane aisamunema nanaiña axɨba omixhia.