2 Corintios 3 - Manityanati Tupax

Axɨbama baserebioma

¹ Axtɨ supanityaka sane, ¿aume takana axtɨ uxia supanityaka tatityo suiñemoantoe? ¿Ensapɨ sopityusiankata ausukarɨ o supankikia amopɨnanaki kichonimiakax takana axɨna isamutema makiataka?

² Axañoantoe tyone axɨmanu kichonimiakax axɨna ane korobo au nautusi tyone axɨna isuputakaimia namanaiña mañoñɨnka.

³ Tusiu nuxia axaño tyone axɨmanu kichonimiakax korobo uiti Cristo axɨna soboi sopityoximia. Axɨna chɨkorobopɨ ui kiatax ta ui nesaxti Espíritu naki Tupax sɨborikoti. Axɨna chɨkorobopɨ iku kanx, ta korobo au nausasɨ mañoñɨnka.

⁴ Axtɨ oñonkatɨ ɨmoti Tupax aɨbuti Cristo, ta ñemanauntu ñana axɨna sane.

⁵ Axɨsomɨ champɨ sopisamute soboiyapatoe. Nanaiña axɨna sopisamute toxio suiñemo uiti Tupax,

⁶ uiti aiñununekanati somɨ nauki supaserebi ɨmo axɨmanu aɨbo tratox, chɨtɨpɨ isiuki axɨmanu bakɨpukux, ta ui noñemaxti Espíritu Santo, axɨmanu bakɨpukux otoxikia uixh ɨmo nokonko tapɨti nesaxti Espíritu Tupax osɨborikia uixh.

⁷ Naukiche atusianka axɨmanu bakɨpukux uiche uɨrotɨ ɨmo konkox axɨmanu ananka korobo iku kanx uxiante aɨbu taruku nanentakax, sane naukiche axɨmanuma auki Israel chastaipɨma nisuxti Moisés, ui axɨmanu tarukapae nanentakax axɨna chɨsɨsiopɨ ñana,

⁸ ¡taruku niyarusɨrɨkɨx axɨmanu aɨbo tratox axɨna noñemaxti Espíritu Santo!

⁹ Axtɨ axɨmanu bakɨpukux ɨmo konkox taruku nanentakax tɨkañe naukiche atusianka, ¡kausane chanentaxɨpɨ nuxia axɨna urapoiti Tupax ta ane ñana maximiakatax oemo uiti!

¹⁰ Tyopiki axɨmanu tɨkañe yarusɨrɨx nɨriakax chisiupɨ nauki uichepeka aɨbu axɨna kaɨma, tyone taruku niyarusɨrɨkɨx pɨnanaki.

¹¹ Axtɨ taruku nanentakax tɨkañe axɨmanu kaɨma champɨki, kausane chanentaxɨpɨ nuxia ñana axɨna champɨ nityakɨrux.

¹² Ui axɨna tusiu nuxia suiñemo uixh supanityaka aɨbu narukux suiñemo.

¹³ Chisopisamutempɨ takanati Moisés tɨkañe, axti isumuxiankatati nisuxti nauki tapɨ astaimia axɨbama auki Israel nityakɨrux axɨna samamekana nauki atakɨru ñana.

¹⁴ Sane naukiche axɨma chixhanxɨpɨma atusi ɨmoma axɨna sane, kaɨmainki axtɨ astaimia axɨmanu nanankax tratox, ui axɨmanu nisubuxixh chiyebopɨ uimia, tyopiki chɨkarɨbupɨ isukimia ta kunauntañatiatai Cristo uiti akaɨbu.

¹⁵ Kaɨmainki, axtɨ bastai ñakonomosoxti Moisés, aninki nisubuxixh axɨmanu ñapanaunkuxɨma.

¹⁶ Ta axtɨ kuamatɨ tato esati Yɨriabux Jesús, kaɨburu axɨmanu nisubuxi ñapanaunkuxɨma.

¹⁷ Tyopiki axti Yɨriabux Jesús tyonenti naki Espíritu Santo. Axɨna kauta naka nesaxti Espíritu Yɨriabux Jesús, akamanu uxia uimia ɨmomantoe.

¹⁸ Sane naukiche nanaiña oñɨ, tɨkarɨbu nusubuxi axɨna uiche tɨkañe chubasakapɨtɨ, sane kaɨma bastai niyarusɨrɨkɨxti Tupax, uixh masamuña tusiu au nosɨboriki axɨna niyarusɨrɨkɨxtti Tupax, ui noñema nesaxti Espíritu Yɨriabux Jesús.