2 Corintios 2 - Manityanati Tupax

¹ Sane naukiche chiyakapɨtɨ tanu yasaraño nauki tapɨ usucheka.

² Tyopiki axtɨ ausucheka sobi, ¿ñakutipɨ naki uiche ipukɨnunka, axañoantai axɨbama ausucheka sobi?

³ Sane naukiche sane axɨmanu nixhakonomoso aume, tyopiki chixhankapɨ yɨrotɨ tanu nauki isuche aboi, abo ixhankapɨ ipukɨnu aboi. Axɨna nipukɨnunku au nixhakionko tyoneintyo naupukɨnunku,

⁴ ui taruku nichakisɨrɨkɨ uityo nisucheki niyausasɨ xhakonomoka aume aɨbu nisareo, chɨtɨpɨ nauki ausucheka uixh, ta nauki amasarai axɨna taruku naukuasɨrɨkɨ iñemo.

Maximiakatax uiti Pablo

⁵ Axtɨ anati naki masuchemakanati, chaxɨpɨñɨantai isucheka, ta namanaiña axaño ausucheka.

⁶ Axɨmanu manityomokotox aboi ɨmoti maniki ñoñɨnx, chauki tuxia.

⁷ Axɨna kaɨma apachɨkoboibo aɨbuti ta apixhimiaka ɨmoti axɨmanu nipɨnatenti amasasatɨtyo tyakuti, tapɨ tarukapae nisuchekixhti.

⁸ Sane naukiche sukanañɨ aume apasamu nuxia apityusianka tatityo ɨmoti nikuasɨrɨkɨxti aume.

⁹ Tixhakonomoka aume aukutanu kɨtɨpɨ axɨna sane, nauki atusi iñemo axtɨ ñemanauntu apikokota axɨna nixhanunekaka.

¹⁰ Axtɨ anati naki ɨmoche apixhimiakata nipɨnatenti, axɨñɨntyo xhimiakana sobi ɨmoti. Ixhimiakata ɨmoti, axtɨ ane tyopikiche xhimiakana ɨmoti ui nipukɨru autaku sukarɨti Cristo.

¹¹ Sanenti chobores chɨsɨrotipɨ okɨtɨpɨ, tyopiki tusiu nuxia oemo axɨna chuxiampɨ nisɨborikixhti.

Anati Pablo au Troas

¹² Naukiche iñatai au Troas, nauki suraboi axɨba omixhia manityakax kɨtɨpɨti Cristo, baurɨbo sɨmenuñɨ tyuruka nauki xhanuneka nuraxti Yɨriabux Jesús.

¹³ Chuxiampɨ nixhakionko, tyopiki chɨtabɨkotipɨ sobi axti isaruki Tito. Auki ñasamuka nariox ɨmoma nauki yɨrotɨ au Macedonia.

Machampienkakax

¹⁴ Chapie ɨmoti Tupax uiti aikianati oñɨ nantax yopɨrɨkɨ nanaiña aɨbuti Cristo, auki osoi usuraboi nuraxti, tyone axɨna sɨrotɨ au nanaiña takana axɨna koñoxatai norimia.

¹⁵ Tyopiki axoñɨ takana axobe uxiantai noborixh axɨna ñakumanataxti Cristo ɨmoti Tupax, tyone sɨrotɨ axɨpekuma namanaiña axɨbama ane maximiakatax ɨmoma takanaintyo axɨbama champɨ maximiakatax ɨmoma.

¹⁶ Ɨmoma axɨbama champɨ maximiakatax axɨna uxiantai norixh oriotɨ nori konkox ɨmoma, tapɨ axɨbama ane maximiakatax ɨmoma tyone nori sɨborikixh. ¿Ñakuti naki ane uiti nanaiña ɨmo axɨna sane?

¹⁷ Axɨsomɨ chɨsomekapɨtɨ tanu supakobɨra ityobo nuraxti Tupax, takana isamutema makiataka. Chɨsanempɨ, supanityaka axɨna ñemanauntu sukarɨti Tupax, ui yakɨpukuxti suiñemo supanuneka aɨbuti Cristo.