1 Timoteo 5 - Manityanati Tupax

Kausane nosɨboriki aɨbu makiataka

¹ Tapɨ apataikiatai aɨbuti naki yɨriabux. Tapɨ sane obi, aiñununekasaxti takana axtɨ aparikia aɨbuti aɨma. Tapɨ ɨmo axɨbama mayaɨka anitya aɨbuma takana axtɨ anityaka aɨbuti naki arukiatoe.

² Ñome axɨba poximianka anitya takana axtɨ anityaka aɨbu napakɨmantoe. Axɨba kupikikia anitya ñome takana axtɨ anityaka ñome nakiasityaiki, tari uxia nakionko yupu.

³ Asasatɨ yutaku biuraka, axɨba champɨti asarabotɨ yutaku.

⁴ Axtɨ axɨna biurax aboma aɨtaiki abomaintyo ikiarɨtox, tari tyonema akusɨrɨma asaramatɨ tyaku ñome nanaiña nixhantɨmo, sane takana tyone tɨkañe asaratɨ tyakuma. Tyone axɨna uxia uisamune sukarɨti Tupax, tyopiki sane nixhankaxti uisamune.

⁵ Axɨna biurax champɨti asarabotɨ tyaku, onkotɨ nuxia ɨmoti Tupax, mankio pɨnanakiti asaratitɨ tyaku au sapes takanaintyo au tobixh.

⁶ Tapɨ axɨna biurax ityoximianɨ ɨmo nipukɨnunkux chauki tɨkoiño auki nisɨborikixh.

⁷ Sane naukiche ukanɨ ɨmo namanaiña aisamunema axɨna tɨsukanañɨ aemo, tapɨ anati naki chuxiampɨ nuraxti ɨmoma.

⁸ Tyopiki axti naki chasaratitɨpɨ tyakuma axɨbama yarukityoboti takanaintyo axɨbama aɨtoxti chisamutentipɨ takana axɨbama ikokoromati Jesús, isamutenti takanati naki champɨ tisuputarati Tupax.

⁹ Nauki taman biurax ane nɨrixh yochepe pikiataka, tari aɨro axɨna ane sesenta naskɨbeka ɨmo axɨnaintyo tamantiatai ikiana tɨkañe.

¹⁰ Tari namanaiña asuputanema axtɨ uxia tɨkañe nisɨborikixh yusiuki axɨba omixhia isamute. Axtɨ uxia ñasunaunkukux ɨmo axɨbama aɨtaiki, axtɨ uxia uixh ɨmoma axɨbama iñataimia au nipox, axtɨ iyaxɨbita nipopesɨma axɨbama ikokoromati Jesús, axtɨ asaratɨ tyakuma axɨbama takisɨrɨma. Ta sane, nanaiña axɨba opisamute axɨba omixhia.

¹¹ Tapɨ aikonomota nobɨrixh axɨba biuraka axɨba sɨnaɨbukaiki. Tyopiki taunainki opiñokota ñupakokonaunkux ɨmoti Cristo, auki muxianx tatityo aupo aɨbuti kiatax.

¹² Ui axɨna sane ane nopipɨnate tyopiki chopisamutempɨ axɨna ɨriotɨ oboi.

¹³ Omenotityo umamenkatai ubau poka, auki taruku nomemaxikiatax. Chityoneantaipɨ nomemaxikiatax, ta ausɨrataityo nuburax axɨba chomixhampɨ, opisamute axɨna chɨkoñopɨtɨ ñome apisamune.

¹⁴ Sane naukiche ixhanka nauki axɨba biuraka kupikikiaiki, aupo tatityo, nauki aboma ñupaɨmakax, nauki amasaratɨ tyakuma. Sane axɨbama chikokoropɨmati Cristo champɨ isiukiche chuxiampɨ nuraxɨma oemo.

¹⁵ Tyopiki tɨtabe axɨba biuraka tɨmameso ñupapanaunkux, omenotɨ isiuti chobores.

¹⁶ Axtɨ anati ñoñɨnx chepe paɨx axɨbama ikokoromati Jesucristo ane biurax au nipoxɨma, tari asaramatɨ tyaku tapɨ onkomatapae ɨmo axɨbama ikokoromati Jesús. Sane axɨbama ikokoromati Jesús tari asaramatɨ yutaku axɨba biuraka champɨti asarabotɨ yutaku.

¹⁷ Axɨbama mayɨriabuka axɨpekuma axɨbama ikokoromati Jesús axtɨ isamutema nuxia niyachɨkoimia koñotɨ ɨmoma asuriuma tox bapakakax ityobo, axɨbamampae urapoimia manunekanamaintyo axɨba omixhia manityakax.

¹⁸ Tyopiki iku Nikorox nantɨ sane: “Tapɨ aityomoenta naru nabu nobiox axtɨ ikɨmote nakiyo” Nantityo sane: “Axti naki ane yachɨkoiti koñotɨ atoxi ɨmoti monixh ityobo.”

¹⁹ Axtɨ anati naki uraboti taman yɨriabux, axtɨ champɨma toxɨma o trexɨma, axɨbama sukarɨche tapɨ ane nɨmoche obi.

²⁰ Axtɨ aboma abaxɨpeku mayɨriabuka sɨsioma aɨbu nipɨnatema, aikuansomokosoma sukarɨ makiataka, nauki makiataka aixhuma tapɨ isamutema takana axɨna yachɨkoimia.

²¹ Tyone nixhakɨpuku aemo sukarɨti Tupax, sukarɨtityo Jesucristo, sukarɨmaintyo axɨbama ángeles samamekanama uiti Tupax tapɨ anati naki taruku nikuasɨrɨkɨxti aemo pɨnanaki makiataka.

²² Tapɨ aikɨsabukɨ aikunusɨankanati naki baserebiobo ɨmoti Tupax asasai nuxia, tyopiki axtɨ axti maniki ñoñɨnx isamutenti axɨna chuxiampɨ axɨkɨtyo ane naipɨnate chepeti. Tapɨ chebo obi aisamune axɨna chuxiampɨ.

²³ Tyopiki axɨkɨ taikiana oxo akɨbobikɨ, tapɨ achaka tuxtai, achaityo pariu simiantai vino.

²⁴ Axɨba nomɨnantɨ ui makiataka ane auche butusiu nuxia axtɨ chɨtoxiopɨmainki ɨmo nityakisɨrɨkɨxɨma, ane auche butusiu pɨrɨkɨ nanaiña axɨna sane.

²⁵ Saneityo axɨba omixhia uisamute, butusiu nuxia, tapɨ axɨba chomixhampɨ chɨsɨsiopɨ umanekanatai.