1 Timoteo 2 - Manityanati Tupax

Meankax tyaku namanaiña

¹ Sukanañɨ aume, amea tyaku namanaiña, apachampienka ɨmoti Tupax tyaku namanaiña apanki pɨnanakiti aityusiankati ausukarɨ nipukɨruxti nauki asaratitɨtyo autaku.

² Amea tyaku namanaiña mayɨriabuka, nauki uxia osoi oemoantoe tapɨ ane kausane nosɨboriki, aɨbu numakokonaunku ɨmoti Tupax taikiana uxia nosɨboriki aɨbu namanaiña.

³ Axɨna sane meankax uxia, uxiaintyo ɨmoti Tupax, naki uiche utaesɨbuka eanaki nomɨnantɨ.

⁴ Tyopiki xhanxti nauki namanaiña ataesɨbuma eanaki nomɨnantɨ nauki atusityo ɨmoma:

⁵ Anati kunauntañatiatai Tupax, anatityo kunauntañatiatai naki uiche uxia uiti Tupax oemo axti Cristo Jesús.

⁶ Tyopiki ityoximiatati nisɨborikixhti nauki ataesɨbuma eanaki nomɨnantɨ namanaiña. Au axɨmanu nanenes ɨriotɨ uiti Tupax, ityusiankatati usukarɨ ta xhanxti nauki namanaiña ataesɨbuma eanaki nomɨnantɨ.

⁷ Axti Tupax ikɨpurutiñɨ suraboi axɨba omixhia manityakax sukarɨma axɨbama chɨtɨpɨ judíos. Axɨna sukanañɨ ta ñemanauntu, sane axtɨ oñonkatɨ ɨmoti Tupax. Ñemanaunkuxatoe sukanañɨ aume ta chixhapankapɨ.

⁸ Sane naukiche ixhanka nauki au nanaiña mañoñɨnka tapɨ uratokiomantai ɨmomantoe, tapɨ tɨborikomantai, ityobo axɨna sane tari uxia nisɨborikixhimia taikianaintyo eama.

⁹ Ixhankaityo nauki axɨba paɨka tari uxia nubaibikixh, tapɨ opiñata chɨtamampatai yokɨtɨpɨ. Tapɨ muxianx namanaiñantai asaramatɨ yusiu iyo axɨna ane yokɨtɨpɨ, tapɨ ubaibio axɨna tarukapae nikuax, tapɨ ane niyutarux axɨba taruku niyukuax.

¹⁰ Tari axɨba niñokoñopox tyone axɨba omixhia opisamute, sane takana axɨba paɨka taruku ñupanaunkux ɨmoti Tupax.

¹¹ Ixhanka nauki axɨba paɨka amonsaperio aɨbu ñupanaunkux axɨna manunekatax ñome.

¹² Chichebopɨ sobi nauki apanuneka axɨba paɨka axtɨ oberabarama axɨbama ikokoromati Jesús, tapɨ pakɨpuruityo ɨmo mañoñɨnka. Tari omentayoatai.

¹³ Tyopiki axti Tupax kusɨrɨboti tɨkañe Adán aisamunuti naukiche tuxiankati Adán uiti isamutentityo Eva.

¹⁴ Axti Adán chityonentipɨ naki tapenekoti uiti chobores, Eva axɨna tapeneko. Naukiche tɨtapeneko Eva, isamute nomɨnantɨ.

¹⁵ Axɨba paɨka ane maximiakatax ñome axtɨ ane niñupaɨmakax, axtɨ omonkotɨ ɨmoti Jesucristo, axtɨ pakumananaunx ɨmo makiataka axtɨ besɨro niyosɨborikixh.