1 Pedro 2 - Manityanati Tupax

Axɨbama aɨbo aɨtoxti Tupax

¹ Sane naukiche, apikiaɨbu aukɨtɨpɨki nanaiña axɨba nomɨnantɨ, matachemakakax, axɨna chapisamutempɨ axɨna amukanaño, tapɨ abubatio nenaxi makiataka, tapɨ apanityaka axɨna chuxiampɨ kɨtɨpɨ makiataka.

² Takana masiomanka axɨbama aɨbo aboma iku kɨx, apapache iyo nipiaɨx auki napes axɨna champɨ ane eana, nauki uixh ausunaunka sane ane maximiakatax aume,

³ tyopiki axaño tɨtusiu aume ta axti Yɨriabux taruku nipukɨruxti.

⁴ Ausiapatate, esati Yɨriabux Jesús, tyonenti axɨmanu kanx sɨboriko axɨna yarutaɨbutama mañoñɨnka, tapɨ ɨmoti Tupax tyone axɨmanu kanx samamekana tarukapae nikuax.

⁵ Sane naukiche, oboi kanka axɨba bosɨboriko, axti Tupax masamunuti ñana ipoboti aboi, axañointyo tyonema axɨbama sacerdotes kiatax nakaxɨma, aɨbuti Jesucristo apakumanaka ñana ɨmoti Tupax makumanataka axɨba uiche pukɨnuñati.

⁶ Sane naukiche nantɨ iku Nikorox: “Samamekana sobi taman kanx axɨna taruku nikuax, sɨro sobi au Sión, nauki tyone axɨna kanx taruku nikuax ñopɨnanaki nanaiña pikiataka. Axti naki onkotitɨ ɨmo, chɨtapenekotipɨ ñana.”

⁷ Axaño axɨbama apikokokata, axɨmanu kanx taruku nikuax. Tapɨ axɨbama chikokotapɨma isamutema takana nantɨ iku Nikorox: “Axɨmanu kanx yarutaɨbutama axɨbama masamunuma poka, tyone axɨna kanx taruku nɨmoche.”

⁸ Iku Nikorox nantityo Sane: “Tyone axɨna kanx uiche sɨrɨmanama ñana taɨbɨkoma.” Axɨma taɨbɨkoma ñana axtɨ chikokotapɨma axɨmanio omixhia manityakax: tyone axɨna toxiobo ɨmoma.

⁹ Axaño tyonema axɨbama aɨtoxti Tupax samamekana año uiti, sacerdote año nauki apaserebi ɨmoti Yɨriabux, axɨbama champɨ nipɨnatema, axɨbama kaɨburuma uiti Tupax eanaki nomɨnantɨ. Axɨna sane ta nauki aburaboi axɨba champɨ tu bastai nisamukuxti Tupax, nauki aye aboi kauta taruku nanentakax esati.

¹⁰ Tɨkañe axaño champɨ isane nabaka, tapɨ kaɨma ta aɨtoxti Tupax año. Tɨkañe axti Tupax champɨ nipukɨruxti autaku, tapɨ kaɨma taruku nipukɨruxti autaku.

Apisamuse uxia nausɨboriki

¹¹ Masarukityaiki, apasamu nuxia iñemo, takana axɨbama auki kiatax kɨx ikɨnomakɨ ikuki axɨna kɨx, tapɨ chebo aboi ñome axɨba chuxiampɨ nauxiantɨmo tyopiki oboi autapeneka au nomɨnantɨ.

¹² Taikiana uxia nausɨboriki axtɨ abaka axɨpekuma axɨbama chikokoropɨmati Tupax. Sane axtɨ kaɨma chuxiampɨ nuraxɨma aume, takana axɨbama chuxiampɨ nisɨborikixhimia, astaimia ñana axɨna uxia apisamute auki machampienkanama ɨmoti Tupax uimia au axɨmanu tyakɨrux nanenes ñana.

Makokonaunkux ɨmo mayɨriabuka

¹³ Auki nakaxti Yɨriabux Jesús, apakokonau ɨmo namanaiña mayɨriabuka ikuki axɨna kɨx: takanaintyo ɨmoti yɨriabux auki Roma tyopiki tyonenti naki yarusɨrɨx nɨriakaxti,

¹⁴ apakokonauntyo ɨmo makiataka yɨriabuka axɨbama toxio ɨriakaboma uiti yɨriabux auki Roma nauki anityomokoma ɨmo axɨbama chuxiampɨ nisɨborikixhimia, nauki aityoximiamaintyo ñakumanataxɨma ɨmo axɨbama uxia nisɨborikixhimia.

¹⁵ Tyopiki axti Tupax xhanxti nauki apisamune axɨna uxia, nauki axɨbama champɨ nipiakaxɨma champɨ urapoboiboma aume.

¹⁶ Apisamuse nausɨboriki isiuki nauxiantɨmo, tyopiki axaño apaserebikia ɨmoti Tupax. Tapɨ amonkatɨapae ɨmo axɨna sane chebo aume nauki tyopiki kaɨma apisamute ausɨratai nomɨnantɨ.

¹⁷ Apiña napanaunku ɨmo namanaiña. Tari akuasɨrɨma aume axɨbama ikokoromati Jesús, apanau ɨmoti Tupax, apiñaintyo napanaunku ɨmoti yɨriabux auki Roma.

Yachɨkoboiboma axɨbama baserebioma

¹⁸ Tapɨ axɨbama kumanakakama xhakɨpuka aume apakokonau ɨmoma axɨbama ɨmoche apaserebikia aɨbutyo napanaunku ɨmoma. Tapɨ sane aboi aɨbumantai axɨbama taruku nipukɨruxɨma autaku, saneityo aboi aɨbuma axɨbama chuxiampɨ uimia aume.

¹⁹ Tyopiki enaunku atoxi oemo uiti Tupax axtɨ champɨ tyakuche utakisɨrɨka ui makiataka.

²⁰ Axtɨ anati naki takisɨrɨti tyopiki axɨna chuxiampɨ isamutenti, auki choxopɨ ɨmoti axɨmanu nityakisɨrɨkɨxti, chisamutentipɨ axɨna chantaxɨpɨ aisamunenti. Tapɨ axtɨ autakisɨrɨka tyopiki axɨna uxia apisamute, aukurusɨka ɨmoti Tupax.

²¹ Ta ɨmo axɨna sane ityasuruti año Tupax, tyopiki axti Cristo takisɨrɨti tɨkañe otopiki, sane nauki apisamune isiukiti.

²² Axti Cristo champɨ nomɨnantɨ isamutenti tɨkañe champɨityo axtɨ matachemakanati ɨmo makiataka.

²³ Naukiche unumati, chiñumutatipɨ nuraxɨma aɨbu nunkuxti ɨmoma. Naukiche takisɨrɨti uimia, chɨmatokonotipɨ tato ɨmoma axɨbama uiche atakisɨrɨti. Ta onkotitɨ ɨmoti Tupax, naki asaratitɨ tyakuti tyopiki besɨro ñapanaunkuxti aɨbu namanaiña.

²⁴ Axti Cristo omenotɨ uiti kɨtɨpɨti axɨba nomɨnantɨ osoi kɨtɨpɨ kurusɨx, nauki axoñɨ uiñokonio nomɨnantɨ nauki sane uisamune axɨna uxia. Axti Cristo obɨrio ɨmoti nauki axaño uxiankaño tato.

²⁵ Tɨkañe axaño amamenka takana axobe nobixhaka bokɨsebo, tapɨ kaɨma abekatɨ tato esati Cristo, tyonenti takanati naki asaratitɨ autaku ta okɨmanatityo autaku.