1 Corintios 8 - Manityanati Tupax

Axɨba makumanataka ɨmo axɨbama matupaka

¹ Axɨba makumanataka ɨmoma axɨbama matupaka. Ñemanauntu axɨna namatɨ: namanaiña tusiu oemo axɨna ñemanauntu. Ui axɨna tusiu oemo au numakionko champɨti kiatax oñopɨrɨkɨ, tapɨ axɨna nukuasɨrɨkɨ oemoantoe uixh uxia nosɨboriki.

² Axti naki au ñakionkoxti ane tusiu ɨmoti, chɨtusiupɨ nanaiña ɨmoti.

³ Tapɨ axtɨ anati naki kuasɨrɨti Tupax ɨmoti, axti Tupax isuputarati.

⁴ Axtɨ ubaka axɨba makumanataka ɨmoma axɨbama matupaka nisamuku mañoñɨnka, tɨtusiu oemo axɨmanuma matupaka nisamuku mañoñɨnka champɨ nanenekichema iku axɨna kɨx, anati kunauntañati Tupax.

⁵ Aboma au napes iku axɨnaintyo kɨx nɨrixhimia matupaka (sane naukiche aboma sɨrɨmanama matupaka sɨrɨmanamaintyo mayɨriabuka),

⁶ oemo anati kunauntañatiatai Tupax, naki Uyaɨ. Axti naki uiche ɨmotityo aisamunenti nanaiña axɨba abe iku axɨna kɨx.

Axɨna nixhantɨmo nukuasɨrɨkɨ oemantoe

⁷ Chɨtɨpɨ namanaiña tusiu ɨmoma, aboma axɨbama iñuñetema ñanaunkuxɨma ɨmoma axɨbama matupaka nisamuku mañoñɨnka, basoma takana axtɨ axɨmanu utuburiboma tyone makumanatax ɨmo matupaka nisamuku mañoñɨnka. Ui axɨna chɨkusɨurupɨ nikɨtɨpɨxɨma, au ñakionkoxɨma sɨsio kɨtɨpɨma axɨmanu iñatema.

⁸ Axtɨ yasuriuruti Tupax oñɨ, chɨtɨpɨ ui axɨna umate. Chɨtɨpɨ ui axɨna umate uxia nosɨboriki, axtɨ chubakapɨ uixh chuxiampityo nosɨboriki.

⁹ Amasasai nuxia aɨbu axɨna apisamute tapɨ uixh tapenekoma axɨbama apekiatai ñakokonaunkuxɨma.

¹⁰ Tyopiki axtɨ axɨkɨ tusiu nuxia aemo nanaiña, axtɨ anati naki asaratiyɨ atɨmoka a'a kauta manaunuma ɨmoma matupaka nisamuku mañoñɨnka, axti naki apekiatai ñakokonaunkuxti asaratiyɨ, asiukikɨ basotityo axɨmanu pemakax makumanatax ɨmo matupaka nisamuku mañoñɨnka.

¹¹ Ui axɨna aisamute sane, tyopiki tusiu nuxia aemo, axti maniki aruki apekiatai ñakokonaunkuxti sɨrotitɨ apɨnanakikɨ, axti naki tyopikitityo tɨkañe akonti Cristo.

¹² Ui axɨna sane chuxiampɨ aisamute aɨbuma axɨbama arukityaiki apekiatai ñakokonaunkuxɨma, ane naipɨnate aɨbuti Cristo.

¹³ Axtɨ tyopiki pemakax axti isaruki tapenekoti, chanantopɨ tato ixha nañes, tapɨ auki niyaka atapeneti.