1 Corintios 5 - Manityanati Tupax

Anati taman isiu nikɨpostoti kiatax

¹ Tɨtusiu anati taman abaxɨpeku tanu ane isiuti nikɨpostoti yaɨtoti. Axɨna sane nisɨborikixhti chuxiampɨ, axɨna sane isamutema, chisamutempɨma axɨbama chisuputaramatipɨ Tupax.

² ¡Ui axɨna au napakionko champɨti kiatax amopɨrɨkɨ! ¡Abo uixh tarukupɨ nausucheki! Axti maniki ñoñɨnx sane nisɨborikixhti apipenesoti abaxɨpekuki.

³ Tapɨ axɨñɨ, axtɨ chiyakapɨ aɨbu nisɨtɨpɨ akamanu abaxɨpeku, ta yaka aɨbu niyausɨpɨ. Chauki tɨsukanañɨ apipenesoti abaxɨpekuki axti maniki sane nisɨborikixhti.

⁴ Axtɨ apiyoberabakaño au nɨrixhti Yɨriabux Jesucristo, axɨñɨ yakaityo akamanu auchepe au niyausɨpɨ, axɨnaintyo noñemaxti Yɨriabux Jesucristo ane auchepe. Auki kaɨma au nɨrixhti Yɨriabux Jesús,

⁵ axti maniki ñoñɨnx tari apityoximiasati ɨmoti Chobores, nauki ako axɨmanu nikɨtɨpɨxti nauki atɨrai tato nausɨpɨxti eanaki nomɨnantɨ au axɨmanu nanenes ñana axtɨ tɨkuatati tato Yɨriabux Jesús.

⁶ Axaño champɨ tyopikiche au napakionko champɨti kiatax amopɨrɨkɨ. Tɨtusiu aume axɨmanu piarakax: “Ui simiantai levadura ikianɨ ape nanaiña axɨmanu pan.”

⁷ Sane naukiche aparusaɨbu tyɨrɨpo axɨmanu nanankax levadura axɨna uiche amameso nausɨboriki, nauki axaño takana axɨmanu pan uxiante ui iyebo tubaxixh. Axaño ñemanaunkuxatoe, takana axɨmanu pan champɨ levadura eana axɨna umatamoebo au axɨmanu nanenes Pukɨnunkux. Tyopiki axti Cristo, tyonenti axɨna Nobixhax ɨmo axɨna Paxkua, tyonenti koiñoti ɨmo makumanatax utaku.

⁸ Sane naukiche uisamunena nupukɨnunku aɨbu pan axɨna champɨ levadura eana, ta tyone axɨna besɨro numapanaunku, tapɨ aɨbu axɨmanu nanankax levadura tyone axɨna aruki nanaiñantai nomɨnantɨ.

⁹ Iku axɨmanu kiatax nixhakonomoso, sukanañɨ aume tapɨ abasikia chepema axɨbama aboma isiu nikɨpostoti kiatax.

¹⁰ Ui axɨna sane chixhankapɨ sukanañɨ aume nauki apiñanaño pese pɨnanakimia axɨbama champɨ ñanaunkuxɨma ɨmo nikɨpostoxɨma makiataka, pɨnanakityo axɨbama taruku nixhankaxɨma ɨmo monixh, makusɨpɨka, axɨbama anati kiatax Tupax ɨmoma, axtɨ auxianka sane aboi tari apikiaɨbusaño ikuki axɨna kɨx.

¹¹ Axɨmanu nixhanka sukanañɨ aume ta tapɨ abasikia chepeti naki axtɨ usarukiti isamutenti axɨba chomixhampɨ, axti naki taruku nixhankaxti ɨmo monixh, axti naki anati kiatax tupax ɨmoti, axti naki ñapauxamax, yorisɨbabox, kusɨpɨx. Axɨbama sane nisɨborikixhimia, tapɨ aubaka chepema.

¹² Champɨ tyopikiche yasarai nisɨborikixhimia makiataka. Tari uiti Tupax asaraiti.

¹³ Sane naukiche apikiaɨbusti abaxɨpekuki maniki chuxiampɨ nisɨborikixhti.