1 Corintios 16 - Manityanati Tupax

Axɨna makumanatax

¹ Axɨna makumanatax ɨmo axɨbama ikokoromati Jesús, apisamuse takana axɨna nixhakɨpuku ɨmoma axɨbama ikokoromati Jesús auki Galacia.

² Tominko, taikianati taman abaxɨpekuki tari ikiamanati axɨna toxiobo uiti isiu nisubaiki axɨna matamɨnanati au axɨmanio naneneka nauki axtɨ iñatai tanu anankatai tɨkiamana.

³ Axtɨ iñatai tanu, ikɨpukama au Jerusalén axɨmanuma mañoñɨnka uxia au napakionko, nauki uimia aikiama axɨmanio makumanataka aboi aɨbu kichonimiakax.

⁴ Axtɨ uxia nauki yɨrotɨ yɨkatityo, axɨma sɨromatɨ chepeñɨ.

Koborioti Pablo

⁵ Auki niyɨkɨ yɨkatɨ auki Macedonia, aukimanu yɨkatɨ tanu au Corinto.

⁶ Chɨtusiupɨ nuxia iñemo axtɨ yasikia tanu auchepe ñome mantukubatai naneneka, axtɨ sane akamanu yasikia ɨmo nanaiña axɨmanio naneneka taruku ximianene. Auki axaño amekatɨ saɨbuñɨ axɨna kauta niyɨkɨ.

⁷ Chixhankapɨ yasarañoantai ixhanka yasikia auchepe ñome mantukubatai naneneka, axtɨ sane noñemaxti Yɨriabux Jesús.

⁸ Axɨñɨ yasikia au Éfeso chepe axtɨ tiñatai Pentecostés,

⁹ tyopiki ubaurɨbo iñemo tyuruka nauki xhanuneka, tusiu iñemo aboma sɨrɨmanama axɨbama chuxiampɨ ɨmoma.

¹⁰ Axtɨ iñataiti Timoteo abaxɨpeku, apapache nikiubu año nauki uxia nakaxti abaxɨpeku, tyopiki axti baserebiotityo ɨmoti Yɨriabux Jesús takana axɨñɨ.

¹¹ Sane naukiche tapɨ anati naki chuxiampɨ ɨmoti nakaxti abaxɨpeku. Ta ausiapata chepeti nauki uxia niyekixhti asaratiñɨ, tyopiki axɨñɨ chepema axɨbama ikokoromati Jesús suixhanka sumasarati.

¹² Axti usaruki Apolo, sukanañɨ ɨmoti asamuti nuxia aɨrotitɨ tanu asarati año chepema axɨbama usarukityaiki, ta kaɨma chixhanxtipɨ au kiataxapae ñana sɨrotitɨ.

Makuansomokokox

¹³ Taikiana amasankatɨ nuxia, tapɨ apiñokota axɨna napakokonaunku ɨmoti Jesús. Apiña nuxia tapɨ apiñokota axɨna tɨtusiu aume.

¹⁴ Nanaiña axɨna napachɨkoi apisamuse aɨbu naukuasɨrɨkɨ aumeampatoe.

¹⁵ Masarukityaiki, axaño tusiu aume axɨbama aɨtoxti Estéfanas auki Acaya tyonema axɨbama kusɨrɨboma aikokoromati Jesús, auki tyonema axɨbama baserebioma ɨmoma namanaiña axɨbama ikokoromati Jesús.

¹⁶ Ixhanka nauki axaño apakokonau ɨmoma axɨbama takana axɨma, ɨmo namanaiña axɨbama baserebioma axɨbamaintyo tyone yachɨkoimia.

¹⁷ Taruku nipukɨnunku tyopiki kuatati Estéfanas, chepeti Fortunato axtityo Acaico, tyopiki axaño chabekapɨtɨ

¹⁸ uimia uxia tato nixhakionko, takanaintyo axaño. Taikiana uxia aboi ɨmo makiataka mañoñɨnka takana axɨna nakaxɨma.

Makionkox

¹⁹ Axɨbama ikokoromati Jesús auki Asia ñakionkoxɨma tanu aume. Axti Áquila axtityo Priscila aɨbu namanaiña axɨbama iyoberabaramakɨ au nipoxti ñakionkoxɨma tanu aume au nɨrixhti Yɨriabux Jesús.

²⁰ Apasusiu ñakionkoxɨma namanaiña axɨbama usarukityaiki. Apanki nuxia aɨbu napatañumeki aumeampatoe au nɨrixhti Yɨriabux Jesús.

²¹ Axɨñɨ, Pablo, xhakonomoka tanu aume axɨna nixhakionko nixhakonomosoatoe.

²² Axtɨ anati naki chɨkuasɨrɨtipɨ Yɨriabux Jesús ɨmoti, ¡tari pauxamanati uiti Tupax!

²³ Tari ikunusɨankanati año Yɨriabux Jesús.

²⁴ Axɨna naukuasɨrɨkɨ iñemo au nɨrixhti Cristo Jesús, taikiana ane auchepe, Amén.